КIэу агъэуцугъэх

ЦIыфхэм пыдзэфэ пытэу къырахырэр зэралъхьащт контейнерхэр «ЭкоЦентрэм» зэблихъунхэу ригъэжьагъ. Бжыхьэр къызихьагъэм къыщыублагъэу контейнер 50 Мыекъуапэ щагъэуцугъ. Кубометрэ 1,1-рэ зэрыфэу нахьыпэкIэ щытыгъэхэр инхэмкIэ зэблахъух. — Фэтэрыбэу зэхэт унэхэм ящагухэр ары зыщыдгъэуцугъэхэр. ХэкIыр Iузыщырэ автомашинэхэр зыдэхьэгъуаехэр ахэм ахэтых. Ащ фэшI, пыдзафэхэр зэрэдащырэ пчъагъэр нахь макIэ хъунэу нахьыбэ зэрыфэхэрэмкIэ зэблэтхъугъэх. Ащ имызакъоу, контейнерыкIэхэм къалэм итеплъэ къагъэIаерэп, — къыIуагъ «ЭкоЦентрэм» и Адыгэ шъолъыр къутамэ ипащэу Алыбэрд Налбый. Контейнерхэм псэолъэшIыным къыпыкIыгъэ пыдзафэхэр, чъыг къутамэхэр, куандэхэр, псынкIэу къызкIэнэрэ пкъыгъохэр арышъутакъо зэрэмыхъущтыр джыри зэ шъолъыр операторым шъугу къегъэ­кIыжьы. ХэкIым идэщын епхыгъэу упчIэ зиIэ хъурэр мы телефонымкIэ къытеон ылъэкIыщт: 8-800-707-05-08.

Тазыр атыралъхьащт

«ЭкоЦентрэм» шхапIэхэм, хьалыгъу гъэжъапIэхэм, щапIэхэм, парикмахерскэхэм яуплъэкIун республикэм щыригъэжьагъ. Унэе предпринимателэу е юридическэ лицэхэу шъолъыр операторым хэкIыр зэрэдищыщтым пае зэзэгъыныгъэ къыдэзымышIыгъэхэр къыхэгъэщыгъэнхэр ары пшъэрылъ шъхьаIэр. — Ар зымыгъэцэкIэгъэ бизнесменхэм тазырэу сомэ мин 250-м нэсэу атын фаеу хъущт. Хэбзэгъэуцугъэм къыщыдэлъытэгъэ шапхъэхэр зымыгъэцэкIагъэхэм яспискэ хэбзэухъумэкIо къулыкъухэм аIэкIэтэгъа­хьэ, ахэм яIоф зэхафы, — къыIуагъ Алыбэрд Налбый. Джыри зэ шъугу къэтэгъэкIыжьы, унэе предпринимательхэмрэ юридическэ лицэхэмрэ хэкIэу къырахырэр зэрэIуащыщтым пае зэзэгъыныгъэ ашIын фае. Офисэу зэкIолIэщтхэр зыдэщытхэр: къалэу Мыекъуа­пэкIэ урамэу Пионерскэр 297, поселкэу ЯблоновскэмкIэ урамэу Школьнэр 10/1. Компанием иинтернет нэкIубгъо лъэIу тхылъыр щызэхагъэуцони алъэ­кIыщт. Адресхэр: https://adygea.clean-rf.ru, adg_ecocentr@clean-rf.ru. «ЭкоЦентрэм» и Адыгэ шъолъыр къутам. Сурэтыр: «ЭкоЦентрэм» и Адыгэ шъолъыр къутамэ ипресс-къулыкъу.