Къыддэхъугъэхэм ащыщ
Бэрэ тызэжэгъэ егъэджэн тхылъхэу «Адыгабзэ» зыфиIоу а 1 — 11-рэ классхэм апаехэр мы илъэс еджэгъум еджапIэхэм къаIэкIэхьагъэх.
Тхылъхэм ягъэхьазырыни, якъыдэгъэкIыни охътабэ текIодагъ, ау ащ нахьи нахьыбэжь ахэм апае атхыгъэ программэхэу специалистыбэ, нэбгырэ 20-м ехъу, зыхэлэжьагъэхэр. Программэхэм ацIэхэр бэрэ зэблэхъугъэхэ хъугъэ, ары къэс тхылъхэми гъэтэрэзыжьынхэр афэшIыгъэн фэягъэ. Ау егъэжьапIэ зиIэм кIэух гори фэхъу.
Типрограммэхэм къэралыгъо статус яIэ хъугъэ. Тхылъхэри Урысые Федерацием гъэсэныгъэмкIэ и Министерствэ иунашъоу зи N 858-мкIэ Iоныгъом и 21-м, 2022-рэ илъэсым Федеральнэ переченым хэуцуагъэх. Ар шъолъыр пстэуми къадэхъугъэп, ау къыздэхъугъэмэ тащыщ. Ащ уимыгъэгушIон плъэкIырэп.
Адыгэ Республикэм гъэсэныгъэмрэ шIэныгъэмрэкIэ иминистрэщтыгъэу КIэрэщэ Анзаур иунашъокIэ программэхэри, тхылъхэри зыщагъэхьазырыгъэхэр сэнэхьатхэм зыщахагъэхъорэ Адыгэ республикэ институтэу Тхьагъо Фатимэ зипащэр ары.
Адыгэбзэ тхылъхэм адэлэжьагъэхэм Iофышхо зэшIуахыгъ. Ахэр: а 1 — 2-рэ классхэм апаер — Апыщ Фатим; я 3-рэ классхэр — КIэсэбэжъ Нэфсэт, Мэрэтыкъо Тэмар; я 4-р —
Анцокъо Сурэт, Мамый Марет; я 5-рэ классхэм апаер — Блыпэшъэо Мир, Темзэкъо Марин; я 6 — 7-рэ классхэм яер — Мурад ГощлъапI, Шъхьэлэхъо Светлан; я 8-рэ классхэр — ХьакIэмыз Мир; я 9-рэм паер — Шумэн Замир; я 10 — 11-рэ классхэр зэреджэщтхэр — Бырсыр Батырбый, КIэсэбэжъ Нэфсэт, Шумэн Замир.
ТхылъыкIэхэм игъэкIотыгъэу сакъытегущыIэн пшъэрылъ зыфэзгъэуцужьырэп, арэу щыт нахь мышIэми, гущыIэ заулэ къясIолIэн. Мыхэр ыпшъэкIэ дгъэфедэщтыгъэ тхылъхэм атекIых. Ахэр комплекс гъэнэфагъэу зэхэтых: тхы-лъыри ащ иэлектроннэ тхылъи, кIэлэегъаджэхэм апае методикэ IэпыIэгъу-хэр, ублэпIэ классхэм апае тхылъхэм тетрадь гъэнэфагъэхэр акIыгъух.
Тхылъхэм ятеплъэ дахэ. Федеральнэ переченым зэрэхэхьагъэхэм ишыхьатэу Шъолъыр логотип атет. Ащ тешIыхьагъэх тижъогъо пшIыкIутIу, тикъушъхьэхэм ядэхагъэ къизыIотыкIырэ сурэтыр ыкIи тетхагъэх адыгэ лъэпкъымкIэ мэхьанэшхо зиIэ гущыIэхэр: «Бзэр — лъэпкъым ыпс». Тхылъхэм егъэджэн материалэу адэтхэм адиштэхэу сурэтхэри шIыгъэх, япчъагъэкIи зэфэшъхьафых. Типографиеу «Качество» зыфиIоу Педченко Алексей зипащэм, охътэ кIэкIэу фагъэнэфагъэм ехъулIэу тхылъхэр къыдигъэкIыгъэх.
КIэлэеджакIохэу мы тхылъхэмкIэ еджэщтхэм шIэныгъэ куухэр къызIэкIагъэхьанэу тащэгугъы. Адыгабзэм инеущрэ мафэ лъызыгъэкIотэщт ныбжьыкIэхэм бэкIэ ялъытыгъ тиныдэлъфыбзэ ищыIэныгъи. Адыгабзэр зэрэмыкIодыщтым тицыхьэ телъ.
ТхылъыкIэхэм ядэхагъи, ядэгъугъи уасэ къязытыщтхэр кIэлэеджакIохэр, кIэлэегъаджэхэр, ны-тыхэр, шIэныгъэлэжьхэр ары. Арышъ, ахэм яшIошIхэр къыраIотыкIыным лъэшэу тыщэгугъы.
КIэсэбэжъ Нэфсэт. Сэнэхьатхэм зыщахагъэхъорэ Адыгэ республикэ институтым инаучнэ IофышI.