Адыгеим и ЛIышъхьэу КъумпIыл Муратрэ Краснодар краим иад­ми­нистрацие ипащэ игуадзэу, Пшызэ къэзэкъыдзэм иатаманэу Александр Власовымрэ зэIукIэгъу зэдыряIагъ.

Анахь Iофыгъо шъхьаIэу зытегущыIагъэхэм ащыщых ныбжьыкIэхэр яхэгъэгу фэшъыпкъэ­хэу пIугъэнхэм, лъэпкъ зэфэшъхьафхэм къахэкIыгъэхэм ыкIи дин зэмылIэужыгъохэр зылэжьхэрэм зэгурыIоныгъэ азыфагу илъыным, хэушъхьафыкIыгъэ дзэ операцием хэлажьэхэрэмрэ ахэм яунагъохэм арысхэмрэ IэпыIэгъу ятыгъэным, нэмыкI лъэ­ныкъохэм афэгъэхьыгъэхэр.

ЗэдэгущыIэгъум хэлэжьагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, Краснодар краим иадминистрацие иполномочнэ лIыкIоу Адыгэ Республикэм щыIэ Хьадыпэшъо Адам.

ЗэIукIэгъур къызэIуихызэ республикэм и ЛIышъхьэ къыхигъэщыгъ къызэрэкIуагъэм пае атаманым зэрэфэразэр ыкIи Адыгеимрэ Пшызэ шъолъыррэ гъунэгъушIу зэдэлэжьэныгъэ-зэфыщытыкIэу азыфагу илъ хъугъэм къыщыуцугъ. Мыщ къы­хеубытэ Урысые Федерацием икъэралыгъо политикэ и Стратегиеу Урысыем щыпсэурэ къэ­зэкъхэм япхыгъэу 2021 — 2030-рэ илъэсхэм Iофтхьабзэу зэшIуахын фаехэм афэгъэхьыгъэр.

«Сигуапэ джыри зэ тызэIу­кIэнэу амал щыIэ зэрэхъугъэр. Урысыем и Президентэу Владимир Путиным къэзэкъхэм хэхъоныгъэ ягъэшIыгъэным фэ­гъэхьыгъэ Указэу къыдигъэ­кIыгъэр гъэцэкIагъэ хъуным епхыгъэу республикэм тызэгъу­сэу IофшIэнышхо щытэгъэцакIэ. Адыгеим IэпыIэгъоу къешъутырэм ыкIи шъунаIэ къызэрэтетым апае сышъуфэраз. Республи­кэмрэ краимрэ гъэпсын Iофым фэгъэхьыгъэ зэфыщытыкIэ дэгъухэр азыфагу илъ хъугъэх», — къыIуагъ КъумпIыл Мурат.

Джащ фэдэу КъумпIыл Мурат къызэрэхигъэщыгъэмкIэ, ныбжьыкIэхэр яхэгъэгу шIу алъэ­гъоу, ащ фэшъыпкъэхэу пIугъэн­хэмкIэ, мамырныгъэр къэухъу­мэгъэнымкIэ, лъэпкъ зэфэшъхьафхэм къахэкIыгъэхэу ыкIи дин зэмылIэужыгъохэр зылэжьхэрэм зэгурыIоныгъэ азыфагу илъынымкIэ къэзэкъхэм Iо­фы­шхо Адыгеим щызэшIуахы. Республикэм иобщественнэ щыIакIэ къэзэкъхэр чанэу хэла­жьэх, Iофтхьэбзэ зэфэшъхьаф­хэми яIахь ахашIыхьэ.

Александр Власовым чэзыур зынэсым къызэриIуагъэмкIэ, шъолъыритIумэ азыфагу илъ хъугъэ зэфыщытыкIэхэм амал къаты къэралыгъом ипащэ къы­гъэнэфэгъэ пшъэрылъхэу анахь мэхьанэшхо зиIэхэр шIуагъэ хэ­лъэу зэшIохыгъэнхэмкIэ.

«Пшызэ шъолъыр икъэзэкъы­дзэ и Мыекъопэ къутамэ зеу­шъомбгъу, нахьыбэу кIэлэцIыкIухэр ыкIи ныбжьыкIэхэр ащ къыхэхьэх. Iофтхьабзэхэу ыкIи фестивальхэу зэхатщэхэрэр нахьыбэ хъугъэх. IэпыIэгъоу къытэшъутырэри ренэу зэхэтэшIэ. Къэзэкъхэу мобилизацием илъэхъан Адыгеим икIыгъэхэу ыкIи зэзэгъыныгъэм тетэу е ежьхэм яшIоигъоныгъэкIэ Урысыем и УIэшыгъэ КIуачIэхэм ахэхьагъэхэм ацIэкIэ шъхьафэу рэзэныгъэ гущыIэхэр къышъу­лъызгъэIэсынхэу сыфай. Дзэ­къулыкъушIэхэм ыкIи ахэм яуна­гъохэм арысхэм IэпыIэгъу ятыгъэным фытегъэпсыхьэгъэ IофшIэныр республикэм дэгъоу гъэцэкIагъэ щэхъу. Ащ ишIуагъэкIэ Адыгеим щыщхэр, Мые­къопэ къутамэм икъэзэкъхэр зыхэхьэхэрэ подразделение псау зэхэщагъэ хъугъэ. Ахэм блэнагъэ ахэлъэу япшъэрылъхэр агъэцакIэх», — къыIуагъ Пшызэ шъолъыр къэзэкъыдзэм иатаман.

КъумпIыл Мурат къызэрэхигъэщыгъэмкIэ, дзэкIолIхэм ыкIи ахэм ягупсэхэм федеральнэ, шъолъыр IэпыIэгъу ятыгъэным пае республикэм Iофтхьэбзэ гъэнэфагъэхэр щызэшIуахыгъэх. Республикэм ипащэхэм дзэ формированиехэм якомандо­вание ренэу гъусэныгъэ пытэ дыряI, ащыгъыщтымкIи, нахь игъэкIотыгъэу агъэфедэрэ пкъы­гъохэр аIэкIэгъэхьэгъэнхэмкIи фэныкъоныгъэу яIэхэр зэрарагъэкъущтхэм пылъых.

«Мобилизацием къыщыублагъэу тикIалэхэу Адыгеимрэ Краснодар краимрэ арыкIы­гъэхэм зэгъусэхэу полигонхэм защагъасэщтыгъ. Тэ дзэкIолIхэр зэкIэ зэфэтэгъадэх, амалэу тиIэм тетэу зэхэтымыдзхэу зэ­кIэми тишIуагъэ ятэгъэ­кIы», — къыIуагъ КъумпIыл Мурат.

Мы зэIукIэгъум тегъэпсыхьагъэу лъэныкъохэр зытегущыIэгъэ Iофыгъохэм ащыщ Урысыем щыпсэурэ къэзэкъхэм афэгъэ­хьыгъэ къэралыгъо политикэм и Стратегие пхырыщыгъэным пае зэдэлэжьэныгъэм иIофыгъо пстэури гъэцэкIэгъэныр.

ХэгъэунэфыкIыгъэн фае: рес­публикэм икъэзэкъ обществэхэм къэзэкъ мини 4 фэдиз ахэт. Илъэсэу икIыгъэм Адыгеим щы­псэурэ къэзэкъ ныбжьыкIэ­хэм я Союз зэхащагъ, непэкIэ ащ кIэлэ ыкIи пшъэшъэ 500-м ехъу хэхьагъ. Мыекъопэ къутамэр хэлажьэзэ илъэс къэс къэзэкъ культурэм и Дунэе фестиваль зэхащэ, патриот Iофтхьабзэхэр зэшIуахых, еджапIэхэмрэ кIэлэ­цIыкIу IыгъыпIэхэмрэ щысэтехыпIэу щыт цIыф лIыхъужъхэм афэгъэхьыгъэ десэхэр ащызэхащэх.

АР-м и ЛIышъхьэ ипресс-къулыкъу