Урысыем финансхэмкIэ и Министерствэ иуплъэкIокIо-ревизионнэ къулыкъухэр зызэхащагъэхэр илъэси 100 зэрэхъурэм фэгъэхьыгъэ зэIукIэ непэ Мыекъуапэ щыкIуагъ. Адыгеим и ЛIышъхьэу КъумпIыл Мурат ямэ­фэкIкIэ финанс ревизорхэм къафэгушIуагъ.

Iофтхьабзэм хэлажьэхэрэм шIуфэс къарихи, республикэм и ЛIышъхьэ къы­зэрэхигъэщыгъэмкIэ, ведомствэм игъэ­псыкIи, хэгъэгуми, бюджетми зэхъокIыныгъэхэр зэрафэхъугъэхэм емылъытыгъэу финанс уплъэкIокIо-ревизионнэ къулыкъухэм илъэси 100-м къыкIоцI опытышхо яIэ зэрэхъугъэр къагъэлъэгъуагъ.

«Финанс уплъэкIокIо къулыкъухэм яспециалистхэм пшъэдэкIыжь зыпылъ IофшIэныр дэгъоу зэрагъэцакIэрэм ишIуагъэкIэ непэ гъэхъагъэ хэлъэу Уры­сыем щыпхыращых экономикэмрэ социальнэ лъэныкъомрэ зыкъязыгъэIэтыщт къэралыгъо проектхэмрэ программэхэмрэ. ШIуагъэ къытэу бюджет мылъ­кур гъэфедэгъэным, финанс сис­темэр зыпкъ итыным ахэр яшъыпкъэу дэла­жьэх», — къыIуагъ АР-м и ЛIышъхьэ.

Республикэм ипащэ зэрэхигъэунэфыкIыгъэмкIэ, уплъэкIокIо къулыкъухэм Iоф зэрашIэрэм бэкIэ елъытыгъэщт экономикэм зыкъегъэIэтыгъэным, тиреспуб­ликэ социальнэ хэхъоныгъэ егъэшIыгъэ­ным атегъэпсыхьэгъэ къэралыгъо, муниципальнэ программэхэмрэ проектхэмрэ гъэцэкIагъэ зэрэхъущтхэр.

«Республикэм икъэралыгъо хабзэ икъулыкъухэм финанс, хъызмэт дисциплинэр ащыгъэпытэгъэным чанэу шъухэ­лажьэ, республикэм исхэм ящыIэкIэ-псэу­кIэ зыкъезыгъэIэтыщт пшъэрылъхэр шIуагъэ къытэу гъэцэкIэгъэнхэм шъунаIэ тешъогъэты», — къыIуагъ КъумпIыл Мурат.

Адыгеим и ЛIышъхьэ финанс уплъэ­кIунхэр зэхэзыщэрэ IофышIэхэм гуетыныгъэ фыряIэу, IэпэIэсэныгъэшхо ахэлъэу зэрэлажьэхэрэм фэшI зэрафэразэр къыIуагъ, анахьэу гъэхъагъэ зышIыгъэхэм тынхэр афигъэшъошагъэх.

Экономикэмрэ финансхэмрэ алъэныкъокIэ гъэхъагъэхэр зэриIэхэм фэшI щытхъуцIэу «Адыгэ Республикэм изаслуженнэ экономист» зыфиIорэр АР-м къэралыгъо финанс уплъэкIунхэмкIэ и ГъэIорышIапIэ иотдел ипащэ игуадзэу Лилия Коршуновам фагъэшъошагъ.

Экономикэмрэ финансхэмрэ алъэ­ныкъокIэ гъэ­хъагъэ­хэр зэ­ря­Iэхэм фэшI Адыгэ Рес­публи­кэм и ЛIы­шъхьэ и Рэзэныгъэ тхылъ аратыгъ Федеральнэ каз­начействэм АР-мкIэ и ГъэIо­ры­шIапIэ ипа­­щэу Жэнэ Мурат, АР-м къэ­­ра­лыгъо финанс уплъэкIунхэмкIэ и ГъэIорышIапIэ иотдел икон­суль­тан­тэу Къохъужъ Заремэ, Мыекъопэ районым иад­минист­рацие финансхэмкIэ игъэ­IорышIапIэ испе­циа­лист шъхьа­Iэу Ок­сана Клыгинам, Кощ­хьэблэ районым иадминистрацие муниципальнэ финанс уплъэкIунхэмкIэ игъэIоры­шIапIэ ипащэу Хъу­пэ Рустам.

Финансхэмрэ бюджетхэмрэ алъэныкъокIэ уплъэкIунхэр зэхэщэгъэнхэм епхыгъэ пшъэ­рылъхэм язэшIохын яIахь зэ­рэхашIыхьэрэм фэшI Урысые Федерацием финансхэмкIэ иминистрэ и Рэзэныгъэ тхылъ афагъэшъошагъ АР-м къэралыгъо финанс уплъэкIунхэмкIэ и ГъэIорышIапIэ ипащэ игуадзэу Борсэ Сусанэ, Шэуджэн районым иадминистрацие финанс­хэмкIэ игъэIорышIапIэ испециалист шъхьаIэу Хьаткъо Эммэ.

Джащ фэдэу къэзэрэугъоигъэ­хэм яюбилейкIэ къафэгушIуа-гъэх АР-м и Къэралыгъо Совет — Хасэм и Тхьаматэу Владимир Нарожнэр, АР-м финанс­хэмкIэ иминистрэу Виктор Ор­ловыр, Федеральнэ казначействэм АР-мкIэ и ГъэIорышIапIэ ипащэу Жэнэ Мурат, АР-м къэ­ралыгъо финанс уплъэкIунхэмкIэ и ГъэIорышIапIэ ипащэу Насыф Мариянэ.

ЗэIукIэм ыуж Адыгэ Респуб­ликэм итворческэ коллектив­хэмрэ иартистхэмрэ яконцерт хьакIэхэм къафатыгъ.

АР-м и ЛIышъхьэ ипресс-къулыкъу