ЯIофшIэн осэшIу къыфашIыгъ
Урысые Iофтхьабзэу «Гражданский мониторинг» зыфиIорэм хахьэу АР-м хэгъэгу кIоцI IофхэмкIэ и Министерствэ епхыгъэу Iоф зышIэрэ Общественнэ советым хэтхэу Александр Девтяровымрэ Къыкъ Бэллэрэ ведомствэм икъэбарлъыгъэIэс гупчэ щыIагъэх.
Мы подразделением ипшъэрылъ хахьэхэрэр, иIофшIэн зыфэдэр хьакIэхэм къафаIотагъ хэгъэгу кIоцI къулыкъум игупчэ иотдел япащэхэу Юрий Нестеровымрэ Инесса Листопадовамрэ.
Юрий Нестеровым къызэриIуагъэмкIэ, къэралыгъо фэIо-фашIэу афагъэцакIэхэрэм анахьыбэр зыфэгъэхьыгъэр справкэ зэфэшъхьафхэр цIыфхэм ятыгъэныр ары. Нахьыбэу къызыкIэупчIэхэрэр хьапс ателъыгъэмэ е атемылъыгъэмэ къэзыушыхьатырэр ары. Мы илъэсым имэзи 9 гупчэм икъулыкъушIэхэм мыщ фэдэ тхьэпэ мин 21-рэ аратыгъ.
Электроннэ шIыкIэм тет справкэхэм ятын къэбарэу пылъым общественникхэр кIэупчIагъэх. КъэбарлъыгъэIэс гупчэм иIофышIэхэм къызэраIуагъэмкIэ, къэралыгъо фэIо-фашIэхэр афэзыгъэцэкIэрэ гупчэм ипортал цIыфхэм закъыфагъазэмэ, пIалъэу ар зэрафагъэцакIэрэр нахь макI.
ЗэIукIэгъум зэфэхьысыжьхэр къыфашIызэ Общественнэ советым хэтхэм структурнэ подразделением иIофшIэн зэрэзэхэщагъэм осэшIу къыфашIыгъ. ЦIыфхэм яфэIо-фашIэхэр афагъэцэкIэнхэмкIэ занкIэу къэбарлъыгъэIэс гупчэм екIолIэнхэ зэралъэкIыщтыр амалышIоу хагъэунэфыкIыгъ.
АР-м хэгъэгу кIоцI IофхэмкIэ и Министерствэ ипресс-къулыкъу.