Агу къыдащэеным пай
Партиеу «Единэ Россиемрэ» «НыбжьыкIэ Гвардиемрэ» ахэт пэрытхэр Мыекъуапэ икIэлэеджакIохэм ягъусэхэу хэушъхьафыкIыгъэ дзэ операцием хэлэжьэрэ дзэкIолIхэм письмэхэр афатхыгъэх.
«КIэлэеджакIохэм таригъусэу письмэхэр тидзэкIолIхэм афэтэтхы. ЗэкIэми дэгъоу къагурэIо ахэм агу къыдэтщэен зэрэфаер», — къеIуатэ Урысые дзэ-патриотическэ общественнэ движениеу «Юнармия» зыфиIорэм икъутамэу Мыекъуапэ щыIэм иштаб ипащэу Ирина Князевам.
«ЛIыхъужъым пае фабэр» зыфиIорэ акциер джырэ уахътэм Адыгеим щырагъэкIокIы. Партийнэ проектэу «Ныхьыжъхэр» зыфиIорэм изы лъэныкъоу «ГъэшIэ кIыхьэр зэкIэхэм апай» зыфиIорэм къыдыхэлъытагъэу ар агъэцакIэ. Партиеу «Единэ Россием» программэу ыштагъэхэм зэу ащыщ мобилизацием хэфагъэхэм ренэу адэIэпыIэнхэр.
«Письмэхэр, тхылъхэр, щыгъын фабэхэр Адыгеим къыщаугъои, гуманитар IэпыIэгъоу тидзэкIолIмэ афагъэхьыщтым ахэри ахалъхьащтых. УпчIэу къэуцухэрэм яджэуапхэр ащыжъугъотыщтых «НыбжьыкIэ Гвардием» и Адыгэ шъолъыр къутамэ иштаб ыкIи партиеу «Единэ Россием» и Тхьаматэ иобщественнэ приемнэу республикэм щыIэм. Адресыр: къалэу Мыекъуапэ, урамэу Краснооктябрьскэр,4. А чIыпIэ дэдэм письмэхэри щяшъутынхэ шъулъэкIыщт», — къыIотагъ партиеу «Единэ Россием» и Генеральнэ совет хэтэу Бэрзэдж Асиет.