«ХэушъхьафыкIыгъэ дзэ операциер зыщыкIорэ лъэхъаным къэралыгъомрэ дин конфессие шъхьаIэхэмрэ язэдэлэжьэныгъ» зыфиIорэ Iэнэ хъурае Мыекъуапэ щыкIуагъ.

[caption id="attachment_140578" align="aligncenter" width="800"] Сурэтыр: С. Iэшъын.[/caption]

Ащ кIэщакIо фэхъугъэх Темыр Кавказым щыпсэурэ быслъы­мэнхэм я Координационнэ гупчэ, ислъам культурэм, шIэны­гъэм ыкIи гъэсэныгъэм IэпыIэгъу афэхъугъэнымкIэ Фондыр, Адыгэ Республикэм ыкIи Пшызэ шъолъыр ащыпсэурэ быслъы­мэнхэм я ДиндэлэжьапIэ.

Iофтхьабзэм хэлэжьагъэх Темыр Кавказым идин конфессие шъхьаIэхэм, къэралыгъо хабзэм къулыкъухэм, общественнэ организациехэм ялIыкIохэр, апшъэрэ еджапIэхэм ыкIи шIэныгъэ-ушэтын гупчэхэм якIэлэегъаджэхэр, ащеджэхэрэр.

Адыгеим ыкIи Пшызэ шъо­лъыр ащыпсэурэ быслъымэнхэм я ДиндэлэжьапIэ ипащэ игуа­дзэу, Координационнэ гупчэм игъэцэкIэкIо комитет хэтэу Хъущт Азэмат Iофтхьабзэр зэрищагъ. Пэублэ псалъэм ащ къызэрэхигъэщыгъэмкIэ, Къо­хьапIэм щыIэ къэралыгъохэр Украинэм ыцIэкIэ Урысыем къызыщыпэуцугъэхэ лъэхъаным дин конфессие шъхьаIэхэм екIолIакIэу къыхахыщтхэмкIэ мы зэIукIэгъур изы амалэу щыт.

— Ислъам диныр гукIэгъум, шIушIэным, шъыпкъагъэм сыдигъуи афэлажьэ. Ащ дакIоу, лъэпкъхэм азыфагу илъ зэгурыIоныгъэр ыкIи мамырныгъэр егъэпытэ. Арышъ, тикъэралыгъо непэ зэрыфэгъэ чIыпIэ мыгупсэфым къыхэкIынымкIэ зэкIэ дин организациехэм язэкъотыныгъэ елъытыгъэр бэ, — къыIуагъ ащ.

Адыгеим ыкIи Пшызэ шъо­лъыр ащыпсэурэ быслъымэнхэм ямуфтиеу Къэрдэн Аскэрбый къэзэрэугъоигъэхэм шIуфэс гущыIэхэмкIэ закъыфигъэзагъ. Урысыем и Президентэу Владимир Путиным иегъэжьэпIэ пстэуми, Украинэм щыкIорэ хэушъхьафыкIыгъэ дзэ операциеми Темыр Кавказым щыпсэурэ быслъымэнхэм я Координационнэ гупчэ зэрадыригъа­штэрэр къыхигъэщыгъ. Ткъошхэу Украинэм щыпсэухэрэри, ти­дзэкIолIхэу неонацистхэм тащызыухъумэхэрэри псаухэу, узынчъэхэу, ТекIоныгъэр яеу ягупсэхэм къафэкIожьынхэу Тхьэм зэрафелъэIухэрэр хигъэ­унэфыкIыгъ.

[caption id="attachment_140579" align="aligncenter" width="800"] Сурэтыр: ДингъэIорышIапI.[/caption]

АР-м лъэпкъ IофхэмкIэ, Iэ­кIыб къэралхэм ащыпсэурэ тилъэпкъэгъухэм адыряIэ зэп­хыныгъэхэмкIэ ыкIи къэбар жъугъэм иамалхэмкIэ и Комитет ипащэу Шъхьэлэхъо Аскэр къэралыгъо хэбзэ къулыкъухэм ацIэкIэ Iэнэ хъураем хэлэжьагъ.

— АР-м и ЛIышъхьэу Къум­пIыл Мурат ыцIэкIи, сэ сшъхьэкIи шIуфэс шъо­сэхы. Адыгеим ыкIи Пшызэ шъо­лъыр ащыпсэурэ быслъы­мэнхэм я ДиндэлэжьапIэрэ къэралыгъо хэбзэ къулыкъу­хэмрэ тызэготхэу тызэдэлэжьэныр хэбзэшIу тфэ­хъугъ. Непэ обществэр зэкъотыным мэхьанэшхо иI. ХэушъхьафыкIыгъэ дзэ операцием IэпыIэгъу фэхъугъэнымкIэ общественнэ мэхьанэ зиIэ Iофтхьабзэу рес­публикэм щызэхащэхэрэм дин ыкIи лъэпкъ-культурнэ общественнэ организациехэм япащэхэр якIэщакIоу зэрэщытым тегъэгушIо. Зыщыщхэ Хэгъэгум патриотическэ къулыкъу зэрэфахьырэм ар ищыс, — хигъэунэфыкIыгъ Шъхьэлэхъо Аскэр.

Джащ фэдэу, КъокIыпIэ Благъэм щыхъурэ-щышIэрэм епхыгъэу Iофтхьабзэм хэлажьэхэрэм ащ закъыфигъэзагъ ыкIи зэпэуцужьыр лъэныкъохэм акъылыгъэ зыхэмылъ зекIуакIэхэр зэрамыхьанхэм къыфэджагъ.

ГущыIэр лъигъэкIотагъ Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ ипащэу ПIатIыкъо Аслъан. ШIуагъэ къы­тэу шъолъыр фондым иIофшIэн зэхэщэгъэным фэшI цIыфхэми, ведомствэхэми Iоф зэрада­шIэщт шIыкIэр къыхахыгъэу зэрэзэдэ­лажьэхэрэр, ащ пае социальнэ координаторхэр рагъэджа­гъэхэу зэряIэхэр ащ къыIуагъ.

— Мэзи 5-м къыкIоцI Фондыр Iофыгъуи 860-м ехъумэ ахэплъагъ. Ахэр анахьэу зыфэгъэхьыгъэхэр: «Заом иветеран» зыфиIорэ статусыр къафагъэшъошэныр, федеральнэ ыкIи шъолъыр фэгъэкIотэнхэр ыкIи ахъщэ тынхэр къаратынхэр, япсауныгъэ зэтегъэуцожьыгъэныр ыкIи IэзэпIэ-зыгъэпсэфыпIэхэм гъэкIогъэнхэр, нэмыкIхэри. А фэIо-фашIэ­хэр афэдгъэцэкIэнхэм фэшI хэбзэ къулыкъу зэфэ­шъхьафхэм зэзэгъыныгъэ 45-рэ адэтшIыгъ. Джы тигухэлъхэм ащыщ Адыгеим ыкIи Пшызэ шъолъыр ащыпсэурэ быслъымэнхэм я ДиндэлэжьапIэрэ Мыекъопэ Епархиемрэ тадэлэжьэныр. ХэушъхьафыкIыгъэ дзэ операциер зыщыкIорэ лъэхъаным ащ шIуагъэ къытыщтэу тэлъытэ, — хи­гъэунэфыкIыгъ ПIатIыкъо Аслъан.

Динлэжьэу къэгущыIагъэхэм ащыщ Къэбэртэе-Бэлъкъар Рес­публикэм щыпсэурэ быслъымэн­хэм ямуфтие игуадзэу Сыжажэ Алим. Тикъэралыгъошхо щыпсэурэ лъэпкъ зэфэшъхьафхэм азыфагу илъ зэгурыIоныгъэр, ма­мырныгъэр, лъытэныгъэр гъэпытэгъэнымкIэ мы зэIукIэгъур лъэбэкъушIоу зэрэщытыр ащ къыхигъэщыгъ.

— Урысыем ышIыгъэ къызэрымыкIо лъэбэкъум дезымыгъэштэгъабэхэм тарехьылIэ ыкIи патриотэу зызылъытэжьыщтыгъэхэм анэгу джы къэлъэгъуагъ. Ау зэкIэми къыдгурэIо, а лъэбэ­къур ти Президент ымышIыгъэмэ, а къохьэпIэ бзэджагъэр тиунагъохэм къазэрэлъыIэсыщтыгъэр. Къэралыгъом ипащэ ышIыгъэ унашъом детэ­гъаштэ, динлэжьхэм тызэгъусэу тыкъот. Къэбар нэпцIэу къекIокIыхэрэм тызэрапэуцужьыщтым, тиныбжьыкIэхэр гъогу пхэнджым темыхьанхэм тынаIэ атетын фае, — къы­Iуагъ Сыжажэ Алим.

Украинэм щыкIорэ хэушъхьафыкIыгъэ дзэ операциер Владимир Путиным игъом зэрэригъэжьагъэр, ащ зэрэдырагъа­штэрэр дин конфессие шъхьа­Iэхэм ялIыкIохэм хагъэунэфыкIыгъ. Сыдигъуи динлэжьхэмрэ къэралыгъо хабзэм икъулыкъу­хэмрэ зэготхэу мамыр щыIакIэм зэрэфэбанэхэрэр, тапэкIи ар зэрэлъагъэкIотэщтыр ахэм къа­Iуагъ. Неонацизмэм тыщызыухъумэрэ тидзэкIолIхэм лIы­хъужъныгъэу зэрахьэрэр цIыф­хэм ащыгъупшэщтэп, охътэ благъэм къыкIоцI ахэм ТекIоныгъэр къыдахыгъэу ягупсэхэм къафэкIожьынхэу къэзэрэугъоигъэхэр афэлъэIуагъэх.

Iэшъынэ Сусан.