ГандболымкIэ бзылъфыгъэ суперлигэм ичемпионат изичэзыу ешIэгъу спорт Унэшхоу Кобл Якъубэ ыцIэ зыхьырэм щыкIуагъ. «АКъУ-Адыифым» Волгоград икомандэу «Динамо-Синара» игандболисткэхэм зэIукIэгъу адыриIагъ. Адыгеим и ЛIышъхьэу КъумпIыл Мурат тигандболисткэхэр зэрешIэрэм еплъыгъ, гущыIэгъу афэхъугъ.

ЕшIэгъум иапэрэ кIэлъэныкъо 8:8-у аухыгъ. Я 2-рэ кIэлъэныкъом командитIуми нахь загъэчаныгъ, ау зыми текIоныгъэр къыдихыгъэп, 20:20-у ешIэгъур ыкIэм фэкIуагъ. «АКъУ-Адыифым» бзылъфыгъэ суперлигэм итурнир таблицэ я 7-рэ чIыпIэр къыщыфэнэжьыгъ. Зичэзыу ешIэгъур тигандболисткэхэм Краснодар икупэу «Кубань» испортсменкэхэм адыряIэщт, турнир таблицэм я 6-рэ чIыпIэр ащ щиIыгъ.

ЕшIэгъум ыуж Адыгеим и ЛIышъхьэ гандболисткэхэми, клубым ипащэхэми адэгущыIагъ, гъэшIэгъонэу зэрешIагъэхэм фэшI спортсменкэхэм зэрафэразэр ариIуагъ.

«АКъУ-Адыифым» тарихъышхо иI, зэлъашIэрэ тренерэу Джэнчэтэ СултIан ыцIэ ар пытэу епхыгъ. Шъуикуп осэшхо къыфэтэшIы, ащ амалышхохэр зэриIэр тшIошъ мэхъу. Мы илъэсым къыщегъэжьагъэу финанс IэпыIэгъур хэпшIыкIэу дгъэлъэшыгъ, спонсорыкIэхэр къедгъэблэгъагъэх. ТапэкIи клубым иIофхэм язытет зыщыдгъэгъуазэзэ тшIыщт, Iофы­гъохэр зэшIотхынэу тыхьазыр. АкIуачIэ къызэрихьэу спортсменхэр ешIэнхэу, текIоны­гъакIэхэмкIэ тагъэгушIонэу тэгугъэ. Джыдэдэм командэм ухьазырыныгъэ дэгъу иI. Тиспортсменкэхэр турнир таблицэм джыри ыпэкIэ зэрэщылъыкIотэщтхэм тицыхьэ телъ», — къыIуагъ КъумпIыл Мурат.

«АКъУ-Адыифым» зэхъокIыныгъэхэр зэрэфэхъугъэхэр, клубым ипащэхэр, тренерхэр, спортсменкэхэм ащыщхэр зэрэзэблахъугъэхэр шъугу къэтэгъэкIы­жьы. Клубым игенеральнэ пащэу агъэнэ­фагъэр гандболымкIэ Урысыем спортымкIэ имастерэу, «АКъУ-Адыифым» щешIэщтыгъэ Светлана Кожубековар ары. Китаим иклубэу «Феникс» ыпэкIэ Iоф щызышIэгъэ Наталия Дерепаско тренер шъхьаIэу агъэнэфагъ.