Пщыкъэнэ Мае итхылъ илъэтегъэуцо культурэм и Унэу Улапэ дэтым щыкIуагъ. Тхылъым икъыдэгъэкIын зиIахьышIу хэзылъхьагъэхэр, ащ къыдэхьэгъэ тхыгъэхэр зыфэгъэхьыгъэхэр Iофтхьабзэм къекIолIагъэх, мэфэкI шIыкIэм тетэу ар кIуагъэ.

Тхылъыр адыгабзэкIэ ыкIи урысыбзэкIэ тхыгъэ. Къуаджэм ищыIакIэ, заом, зэоуж лъэхъаным къоджэдэсхэм къинэу алъэ­­гъугъэм, IофшIэным щы­цIэ­рыIо­хэм, ветеранхэм, лъэпкъ зэфыщытыкIэхэм, еджапIэм ищыIакIэ ыкIи нэмыкIхэм афэгъэхьыгъэхэр ащ дэтых. Улапэ дэс цIыф къы­зэрыкIохэм якъэбар зэрэреспуб­ликэу аригъэшIагъ.

«Адыгэ макъэм» иредактор шъхьаIэу МэщлIэкъо Саидэ гущыIэ зыратым, тхылъым икъыдэгъэкIын епхыгъэ гъогур къэзэрэугъоигъэхэм къафиIотагъ. Ащ еджэрэ пстэуми Улапэ, ащ дэсхэр шIу зэраригъэлъэгъурэр къыхигъэщыгъ. Итхыгъэхэм купкI ахэлъэу, къызытегущыIэрэм цIыфым гуфэбэныгъэ фыриIоу зэрэзэхигъэуцуагъэр къыкIигъэтхъыгъ.

Илъэс 25-м ыугъоигъэ тхыгъэ­хэр мыщ къыдэхьагъэх, нэкIубгъо 600 мэхъу. Мае сыдигъокIи чанэу, къуаджэм, районым ащы­зэхащэрэ Iофтхьабзэхэм ахэлэжьагъ, илъэс пчъагъэрэ кIэлэегъаджэу Улэпэ гурыт еджа­пIэм Iоф щишIагъ, ащ ыуж илъэс 16-рэ социальнэ Iофы­шIагъ, аужырэ илъэсхэм «Адыгэ макъэм» икорреспондентэуи районым щыIагъ, ныхэм, бзылъфыгъэхэм ясоветхэм ахэт.

— Тхыгъэхэр згъэхьазырыхэ зэхъум къин къысщымыхъоу сыгу илъыр къисIотыкIыгъ. Къуа­джэм къыкIугъэ гъогур, цIыф шIагъохэр зэрэдэсхэр зэкIэми язгъашIэ сшIоигъуагъ. Тикъо­джэдэсхэм ягъэхъагъэхэр тари­хъым хэхьанхэр атефэ. Тхы­лъыр къыдэкIынымкIэ зишIуагъэ къы­сэкIыгъэхэм, непэ Iофтхьабзэм къекIолIагъэхэм, зэхахьэр зэхэзыщагъэхэм сызэрафэразэр къасIомэ сшIоигъу, — къыIуагъ Мае.

Лъэтегъэуцор гъэшIэгъонэу, художественнэ гъэпсыкIэ иIэу кIуагъэ, илъэсыбэрэ кIэлэцIыкIухэм зэрахэтыгъэр къыушы­хьатэу, ахэр сценэм тетхэу Мае къытыращагъ. КъыткIэхъухьэрэ лIэужхэм тхылъыр къызэрафэфедэжьыщтым, къуаджэм итарихъ къызэрэхахыщтым щэч хэлъэп.

Пщыкъэнэ Мае шъхьэкIафэ фэзышIэу, лъытэныгъэ езыхэу мы мафэм къэгущыIагъэр бэ. ИтеплъэкIэ рэхьатэу, Iушэу, цIыфышIоу, хьалэлэу, акъылыгъэ хэлъэу зэрэщытыр ахэм къа­Iуагъ. Iоф зыдишIагъэхэм, ри­гъэджагъэхэм, къоджэдэсхэм агурыIуагъ, агъэлъапIэ. ЦIыфхэм зэрафэгумэкIырэр къыхэщэу, уасэ афишIэу зэрэтхагъэр, къуа­джэм щыпсэурэ унагъохэр уапашъхьэ къызэрэригъэуцохэрэр къыхагъэщыгъ.

Улэпэ къоджэ псэупIэм ипащэу Куфэнэ Анзор къоджэдэсхэм ацIэкIэ Пщыкъэнэ Мае зэрэфэразэр къыриIуагъ ыкIи Щытхъу тхылъ къыритыгъ. Красногвардейскэ район администрацием культурэмкIэ и ГъэIорышIапIэ ипащэу Екатерина Макинам къызэрэхигъэщыгъэмкIэ, Пщыкъэнэ Мае щысэтехыпIэу яI, сыд фэдэрэ Iофтхьабзэ зэхащагъэми, непэ къызнэсыгъэм чанэу хэлажьэ. Ащ пае Щытхъу тхылъ къыфигъэшъошагъ.

Улапэ ыцIэ чыжьэу зыгъэIугъэ тхылъэу «Лъэныкъо гупс» зыфиIорэр зытхыгъэ бзылъфыгъэм ищытхъу бэрэ аIуагъ, псауныгъэ пытэ иIэу джыри илъэсыбэ къы­гъэшIэнэу фэлъэIуагъэх.

ДЕЛЭКЪО Анет. Сурэтхэр: А. Iэшъын.