Мыекъопэ къэралыгъо технологическэ университетым ия 4-рэ курс щеджэрэ Вячеслав Егузовым гъэсэныгъэ ыкIи шIэныгъэ организациехэр зыхэлэжьэхэрэ урысые зэнэкъокъум апэрэ чIыпIэр къыщыдихыгъ.

Урысые ныбжьыкIэ форумэу къалэу Москва щыкIорэм ибжыхьэ сессие тыра­гъафэу студентым къылэжьыгъэ шIухьафтыныр къыратыжьыгъ. Мы Iофтхьабзэр зыфэгъэхьыгъэр ныбжьыкIэхэр къэралыгъо гъэIорышIэным хэшIыкI фыряIэу гъэсэгъэнхэр, хэбзэгъэуцугъэхэм ягъэ­псын IофшIэн хэщэгъэнхэр ары. «Сэ сихэбзэгъэуцугъэ шIоигъоныгъ» зыфиIорэ лъэныкъор ары Вячеслав зыщытекIуагъэр.

Урысые зэнэкъокъум нэбгыри 174-рэ хэлэжьагъ, ахэр шъолъыр 40-мэ къарыкIыгъэх, гъэсэныгъэ организацие 83-рэ къагъэлъагъо. ГъэшIэгъон, Вячеслав апэ Медицинэ институтыр ары зычIэхьэгъагъэр, педиатрие лъэныкъор къыхихыгъагъ. Ау уахътэ зытешIэм, МКъТУ-м чIэхьа­жьыгъ, экономикэм иинформационнэ системэхэмрэ юриспруденциемрэкIэ факультетыр ыгукIэ нахь ыштагъ. Конференцие зэфэшъхьафхэм, форумхэм, Iэнэ хъураехэм студентыр чанэу ахэлэжьагъ, ахэм апкъ къикIыкIэ ныбжьыкIэ форумым зыфигъэхьазырын ылъэкIыгъ, зэнэкъо­къум рихьылIэщт шIэныгъэ IофшIагъэр ыгъэхьазырыгъ.

Административнэ ыкIи уголовнэ правэмкIэ кафедрэм идоцентэу, социологие шIэныгъэхэмкIэ кандидатэу Наталья Суетинар ары студентым иIофшIагъэ пэщэныгъэ дызезыхьагъэр. «Мыщ фэдэ зэнэкъокъухэм, форумхэм студентхэр зэрахэлажьэхэрэм ишIуагъэкIэ, ахэм нахь заушэты, яIофшIагъэмэ уасэу къа­фа­шIырэм елъытыгъэу ыпэкIэ маплъэх, яеджакIи хэхъо», — еIо Н. Суетинам.

«Апэр мыщ фэдэ зэнэкъокъушхо сызэрэхэлажьэрэр, ащ пае тIэкIуи сэгумэкIы. Тикъэралыгъо ишъолъырыбэмэ ащыпсэухэрэм нэIуасэ сафэхъугъ, тишIэныгъэхэмкIэ тызэдэгощагъ. Тиуниверситет ипащэмэ сызэрафэразэр къыхэзгъэщы сшIоигъу, ахэр ары мы зэнэ­къокъум сыхэлэжьэнымкIэ амалышIухэр къысэзытыгъэхэр», — къыIуагъ Вячеслав.