АКъУ-м икомандэ игъэхъагъэхэр
Адыгэ къэралыгъо университетым икомандэ программированиемкIэ дунэе зэнэкъокъум хэлажьэ, финалым нэсыгъ.
2023 — 2024-рэ илъэсхэмкIэ Урысые Поволжьем ыкIи Къыблэм ячемпионатхэм язичэзыу едзыгъо ыпэрапшIэу командэм къызэринэкIыгъ. ICPC программированиемкIэ зэнэкъокъум командэ 447-рэ хэлэжьагъ, хэушъхьафыкIыгъэм — 397-рэ.
Пэрыохъу 13 командэмэ къапагъохыгъ, ары пэпчъ алгоритмэ шъхьаф къафаугупшысыгъ ыкIи программированием ыбзэкIэ тхыгъэу ахэр къатыжьыгъэх.
ШIэныгъэ хэхыгъэхэмкIэ ыкIи цифрэ технологиехэмкIэ Институтэу АКъУ-м иIэм истудентхэу Александр Кузнецовыр, Владислав Нестеровыр ыкIи Владимир Верденкэр зыхэхьэхэрэ командэм я 18-рэ чIыпIэр къыдихыгъ ыкIи чемпионатым ифинал ихьаным ифитыныгъэ иIэ хъугъэ.
Адыгэ къэралыгъо университетым икомандэ гъогогъуихэ мыщ фэдэ зэнэкъокъухэм гъэхъагъэхэр къащигъэлъэгъуагъ. Командэм итренерыр хьисапымрэ компьютернэ шIэныгъэхэмрэкIэ факультетым информационнэ технологиехэмрэ щынэгъончъэнымрэкIэ икафедрэ ипащэу Алые Марат.
Шъугу къэдгъэкIыжьын, International Collegiate Programming Contest (ICPC) зыфиIорэр программированиемкIэ дунэе зэнэкъокъу анахь инэу студентхэм афызэхащэхэрэм ащыщ. Ар 1970-рэ илъэсым къыщегъэжьагъэу рагъэкIокIы. Дунаим тет хэгъэгуи 100 фэдизмэ яапшъэрэ еджэпIэ мини 3-мэ ащеджэрэ студент анахь дэгъухэр ащ хагъэлажьэх.
Адыгэ къэралыгъо университетым ипресс-къулыкъу