Мыекъопэ къэралыгъо технологическэ универ­ситетым и Медицинэ институт стоматологиемкIэ ифа­культет щеджэхэрэ Анастасия Кравчук, Мау­шъэ Зуралбый, Мак-Мохьмад, Ахмад Элимхановыр ыкIи Сергей Гайко я XIII-рэ Урысые студенческэ Олимпиадэм хэлэжьагъэх, «Къыблэ стоматологиер-2023-рэ» зыфи­Iорэ Дунэе зэнэкъокъури ащ къыдыхэлъытэгъагъ.

Псауныгъэр къэухъу­мэгъэнымкIэ Урысыем и Ми­нистерствэ кIэщакIо зыфэхъугъэ Олимпиадэр Пшызэ къэралыгъо медицинэ университетым щырагъэкIокIыгъ. Урысыем, Республикэу Беларусь ыкIи Узбекистан къары­кIы­гъэ командэ 14 ащ хэ­лэ­жьагъ.

Стоматологие джэгунхэм япшъэрылъыр студентхэр IофшIэным хэщэгъэнхэр, творческэ екIолIакIэ ащ къыфагъотыныр ыкIи инновационнэ шIыкIэхэр мы сэнэхьатымкIэ къызфагъэфедэшъунхэр ары.

Зэнэкъокъур лъэныкъуи­щэу гощыгъагъэ: «Командэм ишIуфэс», докладэу «ШIэныгъэлэжь ныбжьыкIэмэ япроектхэмкIэ зэнэ­къокъу» зыфиIорэр ыкIи яухьазырыныгъэ IофшIэнымкIэ къагъэшъыпкъэ­жьыныр. Стоматологием илъэныкъохэр зэкIэ олимпиадэм къыщагъэлъэгъуа­гъэх — ортопедическэр, хирургическэр, терапевтическэр, нэмыкIхэри. «Эндодонтическэ Iэзэныр» зыфиIорэ номина­циемкIэ Мыекъопэ къэ­ралыгъо технологическэ университетым истудентмэ апэрэ чIыпIэр къыдахыгъ, лъэныкъоу «Командэм ишIуфэс» зыфиIорэмкIэ ятIонэрэ хъугъэх.