КIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение первых» зыфиIорэм ишъолъыр къутамэ ипроектхэм къадыхэлъыта­гъэу, Адыгэ Республикэм шъолъыр зэнэ­къокъу щы­зэхащагъ, ар Мые­къуапэ дэт лицееу N 34-м щыкIуагъ, зыфэгъэхьыгъагъэр цIыфхэм апэрэ IэпыIэгъу ягъэгъотыгъэныр ары.

Хабзэ зэрэхъугъэу, ахэм нэбгырэ миллионым ехъу ахэлажьэ.

КIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Движение первых» зыфиIорэм ишъо­лъыр къутамэу Адыгэ Рес­публикэм щыIэмрэ «Уры­сые Къащ Плъы­жьым» и Адыгэ шъолъыр къутамэрэ зэнэкъокъум кIэщакIо фэхъугъэх.

Зэнэкъокъум хэлэжьагъэхэр цIыфхэм япсауныгъэ икъэухъумэн, щынэ­гъончъэу щыIэнхэм, гъэсэныгъэ зыщызэрагъэ­гъотырэ организациехэм ащеджэхэрэм яшIэныгъэ­хэм ахэгъэхъогъэныр, IэпыIэгъу псынкIэр къэсыфэ апэрэ IэпыIэгъур зищыкIагъэхэм арагъэгъо­тыным фэгъэсэгъэнхэр — ахэр ары зэхэщакIомэ япшъэрылъыгъэр.

Адыгэ Республикэм щыщ кIэлэеджэкIо 72-рэ зыхэхьэрэ командэ 12 зэнэкъокъумэ ахэлэжьагъ. Ахэм яшIэныгъэхэр мыщ фэдэ лъэныкъохэмкIэ ауп­лъэкIугъэх: лъэу къичъырэр къэгъэуцугъэныр; апшъэрэ жьыкъэщапIэр зэфэшIыгъэмэ, узэрэзекIощтыр, пэм лъыр къечъы­мэ, ащ епшIэщтыр; зы­ныбжь икъугъэм ижьы­къэщэн зэпыугъэмэ, псым ытхьалэрэм, сабыим ижь къэуцугъэмэ узэрэзекIощтыр.

ЗэнэкъокъумтекIоныгъэ къыщыдэзыхыгъэхэр

Апэрэ чIыпIэр — Мые­къопэ районым икомандэу «Бригантина»;

ЯтIонэрэ чIыпIэр — Мыекъопэ медицинэ ­колледжым икомандэу «Ритм»;

Ящэнэрэ чIыпIэр — Теуцожь районым икомандэу «Сириус».

ШэкIогъум и 18 — 19-хэм къалэу Москва щыкIощт Урысые чемпио­натым Адыгэ Республикэм ыцIэкIэ хэлэжьэнэу фитыныгъэр къыдэзыхыгъэр Мыекъопэ районым икомандэу «Бригантинэр» ары.