Хабзэ зэрэхъугъэу, чъэпыогъум и 20-м пщэрыхьакIом и Мафэ хагъэунэфыкIы. Бзылъфыгъэ пэпчъ ар ипшъэрылъ шъхьаIэхэм ащыщэу алъытэ, ау мы сэнэхьатым зищыIэныгъэ гъогу езыпхыгъэу, мафэ къэс нэбгырипшI пчъагъэ зыгъашхэхэрэм уасэ афэ­пшIы­ныр атефэ.

Чэсэбый Мирэ ищытхъу аригъаIозэ мы сэнэхьатым илъэс 44-рэ хъугъэ Iоф зыришIэрэр. Пщыжъхьэблэ гурыт еджапIэм ыуж Налщык дэт технологическэ колледжым чIэхьагъ ыкIи еджэныр къызиухыгъэ 1979-рэ илъэсым къыщегъэжьагъэу а сэнэхьатым рэлажьэ. Мыекъуа­пэ дэт шхапIэу N 1-м IофшIэныр щыригъэжьагъ, бэрэ ащ щымылажьэу гурыт еджапIэу N 2-м кIожьыгъэ. Илъэс зэкIэлъыкIо­хэм кIэлэеджакIохэр ыгъэшхэнхэр ипшъэрылъ. Мы аужырэ илъэсипшIым гурыт еджапIэу N 3-м ишхапIэ Iоф щешIэ.

— КIэлэцIыкIухэм шхынымкIэ зэхэдз нахь ашIы, ахэм агу ри­хьэу упщэрыхьаныр нахь къин. Арэу щытми, тишхапIэ къекIолIэрэ кIэлэеджакIохэр дэгъоу машхэх, ащ тегъэгушIо. Сабыихэр гъэшхэкIыгъэхэу чIэ­кIыжьынхэр ары тэ типшъэ­рылъыр, — еIо тигущыIэгъу.

ПщэрыхьанымкIэ анахь разряд иныр Мирэ иI. IэшIоу, дэгъоу упщэрыхьаным шъэфэу хэлъыр зэкIэ ешIэ ыкIи иIофшIэгъухэм ишIэныгъэхэмкIэ адэ­гуащэ. Зыщыпщэрыхьэхэрэм ты­зычIахьэм, общественнэ пщэ­рыхьапIэхэм афэмыдэу, уна­гъом щыпщэрыхьэхэрэм фэдэу мэ IэшIу чIэущтыгъ. Пчэдыжьышхэр джыри арагъэшIыщтыгъ, ау пщэрыхьакIохэр щэджэгъуашхэм ишIын ыуж ихьэгъагъэх.

— КIэлэцIыкIухэм ашхыщтыр шапхъэхэм сыдигъокIи адиштэн фае, ащ лъэшэу лъэплъэх Мые­къопэ къэлэ администрацием гъэсэныгъэмкIэ и Комитет тхьа­мэфитIу къэс кIэлэцIыкIухэм ядгъэшхынэу щытыр, джащ ты­блэмыкIэу тэгъашхэх. Мафэ къэс щыугъэу ашхырэм нэмыкIэу хэтэрыкIхэр, пхъэшъхь­э-мышъхьэхэр ятэтых, щэджэ­гъуашхэм лэпс зэфэшъхьафхэр е борщ хэт. Сабыйхэм зи къы­рамынэу яттыгъэр зашхыкIэ, агу зэрэрихьыгъэр тэлъэгъу, тигуапэ мэхъу, — еIо Мирэ.

Чэсэбый Мирэ илъэс пчъагъэ хъугъэу пщэрыхьапIэм ипащэшъ, кIэлэцIыкIухэм ашхыщтымкIэ пшъэдэкIыжь ин ехьы. Анахь гъомылэ дэгъухэр сыдигъокIи къыхехых, ахэм ягъэфедэнкIэ пIалъэу яIэр еуплъэкIу. Непэрэ мафэм ехъулIэу кIэлэеджэкIо 800 фэдиз мафэ къэс агъашхэ. Пчэдыжьышхэм купиплIэу гощыгъэхэу къэкIох, щэджэгъуашхэм тIогъогогъо Iанэхэр къа­шIых. ЗэкIэмкIи шхапIэм тIысыпIэ 220-рэ иI. А 1-рэ классхэм къыщегъэжьагъэу я 4-м нэс ып­кIэ хэмылъэу агъашхэх, джащ фэдэу гъот макIэ зиIэ, унэгъо Iужъухэм къарыкIыгъэхэм фэгъэкIотэнхэр яIэх. ШхапIэм дыхэтэу буфетым Iоф ешIэ, мафэ къэс булкэ цIыкIухэр ащ щагъажъэ, ахэр ныбжьыкIэхэм якIасэх.

Мирэ иIофшIэгъухэр игъу­сэхэу къэбзэныгъэм лъэшэу лъэплъэх, зэрыпщэрыхьэхэрэ хьакъу-­шыкъухэм уакъырыщэу, зэпэлыдыжьэу пщэрыхьапIэм чIэтых, сыд фэдэ комиссие къафэкIуагъэми, щыкIагъэ къахагъэщырэп, зэрифэшъуашэу Iоф ашIэ.

— БлэкIыгъэ илъэсхэм ялъы­тыгъэмэ, тиIофшIэн зэхапшIэу нахь псынкIэ хъугъэ, игъэкIотыгъэ гъэцэкIэжьынхэм яшIуагъэкIэ аужырэ шапхъэхэм ади­штэрэ оборудование къытфы­чIагъэуцуагъ. Тызыщыпщэры­хьэрэ хьакухэр, Iэмэ-псымэхэр зэкIэ кIэ, гъэучъыIэлъи 5 къытфычIагъэуцуагъ, шъхьафэу пцэ­жъыехэр, былымылыр, чэтылыр, щэм хэшIыкIыгъэхэр адэлъых. НэмыкIэу тищыкIагъэхэри джы тиIэх, — еIо тигущыIэгъу.

Мирэ «сыпащ» ымыIоу, зыщищыкIагъэм иIофшIэгъухэм IэпыIэгъу афэхъу.

— ТызэгурыIожьэу тиIофшIэн тэгъэцакIэ, нэбгырэ пэпчъ ищытхъу пIонэу Iоф ешIэ, зэкIэми япшъэрылъхэр зэрифэшъуа­шэу агъэцакIэ. Пчэдыжьым сы­хьатыр 6-м IофшIэныр аублэ. Тхьацум хашIыкIыщтхэр рагъа­жьэх. КIэлэеджакIохэр купкупэу къызэрэкIохэрэм къы­хэ­кIыкIэ ма­фэ къэс Iанэм гъогогъуи 6 къытырагъэуцо, тыра­хыжьы. Зэ­кIэми тызпылъыр зы — унэгъо шхыным фэдэу, кIэлэцIыкIухэм агу рихьэу тыпщэ­рыхьаныр, къафытедгъэуцоныр, гушIохэзэ тадэжь къэкIонхэр ары, — къыIуагъ ащ.

Чэсэбый Мирэ илъэс зэкIэлъыкIохэм ежь исабыйхэм афэ­дэу кIэлэеджэкIо мин пчъагъэмэ ыупщэрыхьыгъэ шхынхэр аригъэшхыгъ. Зы мафи къыхихыгъэ сэнэхьатым рыкIэгъожьыгъэп, Iоф зыщишIэрэ шхапIэр анахь дэгъукIэ къызэрахэщыщтым сы­дигъуи фэлэжьагъ.

ДЕЛЭКЪО Анет. Сурэтхэр: А. Iэшъын.