Урысые зэнэкъокъоу «Илъэсым иунагъу» зыфиIорэм текIоныгъэ къыщыдэзыхыгъэхэр непэ къэралыгъом икъэлэ шъхьаIэ щагъэшIуагъэх. МэфэкI зэхахьэм Адыгеир къыщагъэлъэгъуагъ Тэхъутэмыкъое районым щыщ Тхьаркъуахъохэм яунагъо.

Ахэм зэнэкъокъум илъэныкъоу «Унагъор – хабзэхэм яухъумакIу» зыфиIорэмкIэ текIоныгъэр къыдахыгъ.

Адыгеим и ЛIышъхьэу КъумпIыл Мурат Тхьаркъуахъохэм хъытыу нэкIубгъохэм ащыфэгушIуагъ:

«Джыри зэ сафэгушIо Тимуррэ Маретрэ текIоныгъэмкIэ ыкIи сафэраз адыгэ культурэм, унэгъо хабзэхэм япхырыщынкIэ, языкъегъэIэтыжьынкIэ илъэсыбэ IофшIэн зэрэзэшIуахырэм пае».

Шъугу къэдгъэкIыжьын, зэшъхьэгъусэхэр илъэси 10 хъугъэу зэдэпсэух, зы кIалэрэ пшъэшъищырэ зэдапIу. Тилъэпкъ хабзэхэр ныбжьыкIэхэм ахэлъхьэгъэнхэм ахэр чанэу ыуж итых, лъэпкъ спортым, Iэпэщысэхэм, искусствэм афагъасэх.