Урысые зэнэкъокъоу «Народный участковый-2023» зыфиIорэм ишъолъыр ятIонэрэ уцугъор ыкIэм фэкIуагъ.

[caption id="attachment_140421" align="aligncenter" width="800"] АР-м и МВД.[/caption]

ЗэIухыгъэ онлайн-мэ­къэтыным изэфэхьысыжьхэмкIэ, шъолъыр зэнэ­къокъум текIоныгъэр къы­щыдихыгъ Урысыем хэ­гъэгу кIоцI IофхэмкIэ и Министерствэ иотделэу Мыекъопэ районым щыIэм полицием иуполномоченнэ участковэу, старшэ лейтенантэу Анатолий Стрелец. КъулыкъушIэм илъэс 34-рэ ыныбжь, апшъэрэ гъэсэныгъэ иI. 2018-рэ илъэсым къыщегъэжьагъэу хэгъэгу кIоцI къу­лыкъум хэт, полицием иучаст­ковэу Iоф зишIэрэр илъэситIу хъугъэ.

ИIофшIэнкIэ къэгъэлъэ­гъон инхэр зэриIэхэм фэшI АР-м хэгъэгу кIоцI IофхэмкIэ и Министерствэ ищытхъу тхылъхэр къы­фагъэшъо­шагъэх.

Старшэ лейтенантэу А. Стрелец зэрилъытэрэмкIэ, цIыфхэм цыхьэ къыфашIыным лъапсэ фэхъугъэр ягумэкIыгъохэм язэшIохынкIэ гугъуемылIы­ныгъэ къызэрэзыхимыгъа­фэрэр, упчIэжьэгъу ыкIи IэпыIэгъу зэрафэхъурэр ары. Зэпхыгъэ участкэм щыпсэухэрэм ядаохэр зэхифыхэ хъумэ, участковэ ныбжьыкIэм анахьэу ынаIэ зытыригъэтырэр кIэухышIухэр IофшIэным къыкIэлъыкIонхэр ары.

Мы уахътэм Мыекъопэ районым ит Каменно­мостскэ къоджэ псэупIэм щыпсэухэрэр ары Ана­толий Стрелец къепхы­гъэ-хэр. Ахэм ярэхьатныгъэ къыухъумэныр, бзэджэшIагъэ зэрамыхьаным фи­щэнхэр, хэукъоныгъэ зы­шIыхэрэм гущыIэгъу афэ­хъуныр, ащ фэдэ къы­хэкIыгъэмэ, къыхигъэщынхэр ипшъэрылъ шъхьаIэ- хэм ащыщ.

КъулыкъушIэм иIофшIэн псынкIэп. Мафэ къэс зэхифын фэе Iофыгъохэм къахэхъо. ЫпшъэкIэ къызэрэщытIуагъэу, къулы­къум иструктурэ зэ­рэпсаоу пштэмэ, участковэр ары цIыфхэм нахь апэблагъэр. Ащ къыхэкIэу щыIэныгъэм къыпкъырыкIыгъэ гумэкIыгъохэм къащегъэжьагъэу экономикэ, уголовнэ Iоф­хэм язэхэфын нэсэу участ­ковэм ипшъэрылъ.

ГумэкIыгъо Iофхэр участ­ковэхэм зэрэзэхафыхэрэм дакIоу ахэм афэдэхэр къэмыхъунхэм фэIорышIэрэ пэшIоры­гъэшъ Iофтхьабзэхэми мэ­хьанэшхо араты.

Полицием иучастковэ уполномоченнэ и Мафэу шэкIогъум и 17-м хагъэу­нэфыкIырэм ехъулIэу Уры­сые зэнэкъокъум те­кIоныгъэр ыкIи хагъэунэфыкIырэ чIыпIэхэр къыщыдэзыхыгъэхэм зэхэща­кIохэр афэгушIощтых, шIухьафтынхэр афашIыщтых. КIэух Урысые зэ­нэкъокъум Адыгеир къыщигъэлъэгъощт полицием истаршэ лейтенантэу Анатолий Стрелец.

КIАРЭ Фатим.