Мыекъопэ спорт аэроклубым социальнэ мэхьанэ зиIэ ипро­ектэу «Адыгеим парашютнэ IэпэIэсэныгъэмкIэ иныб­жьыкIэ гупчэ щыIэныгъэм авиациер къыщыхэхыгъэнымкIэ ныбжьыкIэхэм адэIэпыIэрэ амал» зы­фиIорэм ипхырыщынкIэ Президентым игрант 2022-рэ илъэсым къыфагъэшъошагъ.

Грантым ишIуагъэкIэ пла­нерэу БРО-11МС зыфиIорэр, ар зыгъэзекIорэ пкъыгъор, ащ зыщыфэгъэсэгъэщтхэ сыхьатхэр зэха­щэнхэм пае оборудованием изэтегъэпсыхьан ищыкIагъэхэр къыращэфыгъэх. Джащ фэдэу планерым зэпымыоу Iоф рызышIэщт IофышIэхэр къалэу Новосибирскэ щырагъэджагъэх.

— АвиациемкIэ Сыбыр шIэ­ныгъэ-ушэтыпIэ институтэу С. А. Чаплыгиным ыцIэ зыхьырэм къикIыгъэ специалистхэм планерыкIэр техническэу къызэты­рагъэпсыхьагъ ыкIи Мые­къуапэ (псэупIэу Октябрьскэм дэжь) иаэродром къырабыбыхьагъ. КIэлэ­еджакIохэр ащ ребгъаджэ­хэмэ хъунэу алъытагъ. Ащ лъыпытэу мы илъэсым, шышъхьэIум и 20-м Урысыем и Ошъогу Флот и Мафэ Фэгъэхьыгъэу къэгъэлъэгъон Iофтхьабзэхэр республикэм испортсмен ныбжьыкIэхэм зэхащагъэх, — хигъэунэфыкIыгъ Мыекъуапэ испорт аэроклуб ипащэу Евгений Ан­тошкиным.

Грантым игъэфедэн епхыгъэ IофшIэнхэм къадыхэлъытагъэу ныбжьыкIэ 30 фэдиз рагъаджэ. Ахэм теоритеческэ ухьазы­ры­ны­гъэр акIугъах, джы ошъогур къабыбыхьаным иамалхэр къызIэкIагъахьэх. Евгений Антошкиным къызэрэхигъэ­щы­гъэмкIэ, республикэм ирайонхэм яныбжьыкIэхэу илъэс 12-м къехъугъэхэу ошъогум ибыбэнхэм кIэ­хъопсыхэрэм аэроклубым зыфагъэзэн алъэкIыщт. Мы спорт клубым иIофышIэхэр джы районхэм кIохэзэ ащарагъэджэнхэ амал щыIэ хъугъэ.

Iэшъынэ Сусан. Сурэтхэр: Мыекъопэ спорт аэроклубыр.