УФ-м Лъэпкъ гвардиемкIэ и Федеральнэ къулыкъу и ГъэIорышIапIэу АР-м щыIэм 2023-рэ илъэсым имэзи 9-у пыкIыгъэм Iофэу ышIагъэр мы мафэхэм зэфахьысыжьыгъ.

Ащ фэгъэхьыгъэ Iофтхьабзэм хэлэжьагъэх ГъэIорышIапIэм ипащэу, полицием игенерал-майорэу Олег Якушевыр, структурнэ подразделениехэм якомандирхэр, нэмыкIхэр.

Лъэпкъ гвардием икъулы­къушIэхэм анахьэу анаIэ зытырагъэтыгъэр къэралыгъо ыкIи общественнэ щынэгъончъэныр, цIыфхэм яфитыныгъэхэр ыкIи яшъхьафитыныгъэ къэухъумэ­гъэнхэр ары. Общественнэ-политическэ мэхьанэ зиIэ Iоф­тхьабзэу тишъолъыр щызэхащэхэрэм Лъэпкъ гвардием икъулыкъушIэхэр ахэлажьэх.

Iашэр къызэрэрагъэкIокIырэм, ащ зэрэлъыплъэхэрэм, ахэм япхыгъэ пшъэрылъхэр зэрагъэ­цакIэхэрэм ягугъу къышIыгъ лицензионнэ-Iизын гупчэм ипащэ иIэнатIэ зыгъэцэкIэрэ Андрей Сорокиным. Ащ къызэри­Iуа­гъэмкIэ, Росгвардием респуб­ликэмкIэ икъутамэ иIофышIэ­хэм нэбгырэ мин 12-м ехъоу Iэшэ зэфэшъхьаф мин 22,5-м ехъу зыгъэфедэхэрэм гъунэ алъафы. Iашэр зэрагъэфедэрэм епхыгъэу уплъэкIун 2500-м ехъу къулыкъу­шIэхэм рагъэкIокIыгъ, нэбгырэ заулэмэ административнэ пшъэ­дэкIыжьхэр арагъэ­хьыгъэх, хэб­зэгъэуцугъэр зэраукъуагъэм къыхэкIэу Iэшэ шъэ пчъагъэ къаIахыгъ, цIыфхэм ежь яшIоигъоныгъэкIэ 259-рэ къатыжьыгъ.

«Лъэпкъ гвардием вневедомственнэ ухъумэнымкIэ икъулыкъу республикэм ит псэолъэ минрэ ныкъорэм фэдиз ыкIи цIыфхэм яунэе псэолъэ мини 2-м ехъу къегъэгъунэ. 2023-рэ илъэсым имэзихэу пыкIыгъэм общественнэ рэхьатныгъэр къэ­ухъумэгъэным, щынэгъончъэныр гъэлъэшыгъэным афэшI ГъэIорышIапIэм иподразделение дэкIыгъо 900 фэдиз иIагъ, хэбзэукъоныгъи 100 щагъэзыягъ», — къыIуагъ къулыкъум ипащэу Андрей Власовым.

Республикэм ищыIэкIэ-псэукIэ нахьышIоу гъэпсыгъэнымкIэ Лъэпкъ гвардием мэхьанэшхо зэриIэм щэч хэлъэп. Арышъ, къулыкъум шIуагъэ къытэу иIоф­шIэн зэхищэным, цIыфхэм IэпыIэгъу афэхъуным, ахэр къыу­хъумэнхэм тапэкIи ынаIэ зэрэтыригъэтыщтыр ГъэIорышIапIэм ипащэ къыIуагъ.