Урысые Iофтхьабзэу «Тепло для солдата» зыфиIорэр Адыгеим щаублагъ. Адыгеим и «НыбжьыкIэ гвардие» хэтхэмрэ тинахьыжъ гуфакIохэмрэ зэгъусэхэу мы Iофтхьабзэр пхыращы. Ащ къыдыхэлъытагъэу, ИлъэсыкIэм ехъулIэу урысые дзэкIолIхэм мэфэкIымкIэ зыщафэгушIохэрэ письмэхэр ыкIи ежьхэм ашIыщт шIухьафтынхэр афатIупщыщтых. Iофтхьабзэр 2023-рэ илъэсым чъэпыогъум и 11-м къыщегъэжьагъэу тыгъэгъазэм и 20-м нэс кIощт.

Партиеу «Единэ Россием» ипроектэу «Тинахьыжъхэр» зыфиIорэм къыдыхэлъытагъэу Урысые Iофтхьабзэу «Тепло для героя» зыфиIорэр агъэцакIэ.

— Къин алъэгъузэ хэушъхьафыкIыгъэ дзэ операцием хэлэжьэрэ тидзэкIолIхэм Хэгъэгур къаухъумэ. АхэмкIэ сыд фэдэрэ IэпыIэгъуи мэхьанэшхо иI. Арышъ, зэкIэми тызэкъотэу ахэм тызэрафэгумэкIырэрэр ядгъэшIэн фае. КIымэфэ уахътэр къэблагъэ, ащ къыхэ­кIэу тилIыхъужъхэм апае щыгъын фабэхэм яхъын пытэдзэжьы. Iофтхьабзэм къыхэлажьэмэ зышIоигъохэр ыкIи нэмыкI упчIэхэм афэгъэхьыгъэу Адыгеим и «НыбжьыкIэ гвардие» иштаб ыкIи партиеу «Единэ Россием» и Тхьаматэ ишъолъыр общественнэ приемнэ зафэжъугъэзэн шъулъэкIыщт. Зыдэщытыр: къ. Мыекъуапэ, ур. Краснооктябрьскэр, 4. Щыгъын фабэхэр (цы лъэпэдхэр, ныбалъэхэр, нэ­мыкIхэри) а чIыпIэм къешъухьылIэхэми хъущт, охътэ благъэм къыкIоцI ахэр тидзэкIолIхэм аIакIагъэ­хьащтых, — къыIуагъ Адыгеим и «НыбжьыкIэ гвардие» ипащэу, федеральнэ партийнэ проектэу «Нахьыжъхэр» зыфиIорэм шъолъырымкIэ икоординаторэу Бэрзэдж Асиет.