Абхъаз Республикэм илъэпкъ гъэзетэу «Апсны» иредактор шъхьаIэу, абхъаз-адыгэ филологием и Гупчэу Абхъаз къэралыгъо университетым хэтым ипащэу Ахра Анкваб, Гупчэм иаспирантэу Асмат Беиа мы мафэхэм «Адыгэ макъэм» ихьэкIагъэх.

«Рифмы на Рице» зыфиIорэ фестивалэу Къаныкъо Заринэ Абхъазым илъэсиплI хъугъэу щызэхищэрэм тыхэлэжьэнэу зэрэхъугъэм фэгъэхьыгъэ тхыгъэу тигъэзет къыщыхэтыутыгъагъэм Ахра Анкваб нэIуасэ тызэрэфэхъугъэри, гъэзетэу «Апсны» иредакцие ыкIи аб­хъаз-адыгэ филологием и Гупчэ тызэрэрагъэблэгъагъэри къыщыттхыгъагъ. Джы абхъаз лъэныкъом иджэуап къэкIогъоу мыр хъугъэ. «Адыгэ макъэм» иIофы­шIэхэм хьакIэхэр нэIуасэ защафэхъугъэхэ зэхахьэ редакцием щыкIуагъ. «Адыгэ макъэм» иредактор шъхьаIэу МэщлIэкъо Саидэ гъэзетыр непэ зэрэла­жьэрэм хьакIэхэр щигъэгъозагъэх, ащ имэфэкI къыдэкIыгъо­хэмрэ Абхъазым тыкъызекIы­жьым ащ фэгъэхьыгъэ тхыгъэ­хэр къызэрыхьагъэхэмрэ хьакIэ­хэм аригъэлъэгъугъ. «Апсны» иредактор шъхьаIэу Ахра Анкваб зэкъош лъэпкъхэм ягъэзетхэм Iоф ащызышIэхэрэр зэхэхьанэу зэрэрагъэжьагъэм мэхьанэшхо зэрэритырэр, мамырныгъэр, зэкъошныгъэр гъэпытэгъэнхэм, нахь тызэрэшIэным, тызэдэлэжьэным ар зэрэфэIорышIэщтыр къыкIигъэтхъыгъ. «Адыгэ макъэм» Iутхэм ткъош абхъаз­хэм ялъэпкъ гъэзет къызэрэдагъэкIырэм, ащ Iоф зэрэдашIэрэм афэгъэхьыгъэ упчIэхэр хьакIэм ратыгъэх. Ахэм Ахра джэуапхэр къаритыжьзэ игуапэу хигъэунэфыкIыгъ: «Зы бзэ унагъом ады­гэхэмрэ абхъазхэмрэ щыщых, лъэпкъ гъэзетхэр зэрэти­Iэхэм мэхьанэшхо иI. Тибзэхэм, культурэхэм, шэн-хабзэхэм якъэухъумэн фэIорышIэхэрэм лъэпкъ гъэзетхэри зэу ащыщых. ТапэкIэ нахь игъэкIотыгъэу ты­зэдэлэжьэн, тызэхэхьан фае. Тэ ащ тыфэхьазыр».

Нэужым хьакIэхэр «Адыгэ макъэм» ихьакIэщ рагъэблэгъа­гъэх, редакциер къарагъэплъы­хьагъ, а мэфэ дэдэм АР-м и Лъэпкъ музей щыIагъэх. Мыщ инаучнэ IофышIэ шъхьаIэу Тэу Аслъан Абхъазым къикIыгъэхэр музеим икъэгъэлъэгъонхэм нэ­Iуасэ афишIыгъэх.

КъыкIэлъыкIорэ мафэм Ахра Анкваб ыкIи Асмат Беиа АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамал­хэмкIэ и Комитет итхьаматэу Шъхьэлэхъо Аскэр IукIагъэх. Ткъош республикэм щыщ хьакIэхэм сыдигъокIи гуфэбэны­гъэ хэлъэу зэрапэгъокIыхэрэм, Адыгеим икIырэ лIыкIо купхэми джащ фэдэу къазэращыпэгъо­кIыжьыхэрэм ащ игугъу къы­шIыгъ. ТекIоныгъэм и Мафэу бэмышIэу Абхъазым щыхагъэ­унэфыкIыгъэм АР-м и ЛIышъхьэу КъумпIыл Мурат зэрэхэлэжьагъэм осэшхо зэрэфашIыгъэр Ахра Анкваб хигъэунэфыкIыгъ.

Абхъазым ишъхьафитныгъэ фэбэнэгъэ адыгэ кIалэхэм яшIэжь зэрагъэлъапIэрэм игугъу къышIызэ Ахра Хъодэ Адам къызщыхъугъэ чылэу Хьалъэ­къуае икъэкIогъухэм ащыщ зэрэщыIагъэр къыIотагъ. Джащ фэдэу Адыгэ къэралыгъо университетым адыгэ филологиемрэ культурэмрэкIэ ифакультетрэ абхъаз-адыгэ филологием и Гупчэрэ зэрэзэдэлэжьщтхэм фэгъэхьыгъэ зэзэгъыныгъэм иапэрэ лъэбэкъоу ашIыгъэхэм, адыгэ кIэлэегъаджэхэм ялекциехэр Гупчэм зэрэщыкIохэрэм Ахра ягугъу къышIыгъ. Мыщ фэдэ зэпхыныгъэ тиредакциехэм азыфагу илъыным зэрэкIэ­хъопсырэр, журналистхэмкIэ тызэхъожьыным мэхьанэшхо зэриIэр къыхигъэщыгъ.

Лъэпкъхэм язэпхыныгъэ зыгъэпытэщт Iофтхьабзэхэр лъыгъэкIотэгъэнхэм ишIогъэшхо къызэрэкIэкIощтыр Шъхьэлэхъо Аскэр къыIуагъ. Урыс культурэм имафэхэр бэмышIэу

Адыгеим икъэлэ шъхьаIэ зэ­рэщы­кIуа­гъэхэр, ащ фэдэу адыгэ культурэм имафэхэри респуб­ликэм зэрэщызэхащэщтхэр ащ къыIотагъ. Къэбэр­тэе-Бэлъкъарым, Къэрэщэе-Щэрджэсым, Ставрополь ыкIи Краснодар крайхэм, Ростов хэкум ялIыкIохэр Iофтхьабзэхэм къызэрэ­ра­гъэблэ­гъагъэхэр къыхи­гъэщыгъ. Абхъазым къикIыгъэ хьакIэхэри мэфэкIэу къэб­лагъэрэм хэлэ­жьэнхэу ащ ригъэб­лэ­гъагъэх.

Адыгэ культурэм, шэн-хабзэхэм ныбжьыкIэхэр нэIуасэ защафашIырэ лагереу «Адыгэ Хабзэ» зыфиIоу зекIо зыгъэпсэфыпIэу Рыфабгъо мы мафэхэм щылажьэрэм Абхъа­зым къикIыгъэ хьа­кIэхэр зэрэщыIагъэ­хэм фэгъэхьыгъэ игъэкIотыгъэ къэбар къы­кIэ­лъыкIорэ къыдэкIыгъохэм ащыщ къыщыхэтыутыщт.