Мыекъопэ спорт еджапIэу В.С. Максимовым ыцIэ зыхьырэм щэбзэ щэрыонымкIэ иотделение зыщызыгъасэхэрэр къалэу Химки щыкIогъэ зэнэкъокъум хэлэжьагъэх ыкIи гъэхъэгъэшIухэр ашIыгъэх.

Мыекъуапэ илIыкIохэм турнирэу «Московскэ хэкум икIымэфэ кубок» зыфиIорэм зыщаушэтыгъ. ЫпшъэкIэ зигугъу къэтшIыгъэ еджапIэм къыдыхэлъытэгъэ мы спорт лъэпкъымкIэ отделениер къызызэIуахыгъэр 2023-рэ илъэсыр ары. КIэлэцIыкIухэм ыкIи нахьыжъхэм Iоф адэзышIэрэр спортымкIэ мастерэу Александр Баламутовыр ары. Ащ ыгъэсэрэ нэбгыритIумэ турнирым дэгъоу зыкъыщагъэлъэгъуагъ. Хъулъфыгъэхэм язэнэкъокъу ятIонэрэ чIыпIэр къыщыдихыгъ Нил Денисовым, бзылъфыгъэхэмкIэ текIоныгъэр къызыфагъэшъошагъэр республикэм щыщ Алиса Кожевниковар ары.