Лъэпкъ губзыгъагъэм инэпэеплъ
Адыгэ жэрыIо творчествэр лъэпкъым идунэететыкIагъэр, идунэегурыIокIагъэр, акъыл-къулаеу къолъыгъэр, зэкIэ щыIэныгъэ гъогушхоу къыкIугъэр, пэкIэкIыгъэр, шIошъхъуныгъэу, гурыгъуазэу ыкIи чыжьэрыплъагъэу хэлъыгъэр зыщызэIугъэкIагъ.
Лъэпкъыр дунаим зытетым къыщегъэжьагъэу псэукIэ-гъэпсыкIэу, шIыкIэ-хабзэхэу нэмыкI лъэпкъхэм къахэзгъэщыхэрэр зыщыгъэунэфыгъэх ыкIи зыщыпсыхьагъэх. КIэкIэу къэпIон хъумэ, адыгэ фольклорыр — лъэпкъым ынэпэ шъыпкъ, ар зэбгъашIэу, зэхэпфэу, бгъэунэшкIу къэс, лъэпкъым лъэныкъуабэкIэ шIоу хэлъыгъэр ыкIи ылэжьыгъэр нафэ къыпфэхъу.
Адыгэхэр — лъэпсэ куу зиIэ цIыф лъэпкъ, ащ уетIэ къэс, бэ гъэшIэгъонэу къычIэщырэр ыкIи ар ашIэу шIэныгъэлэжьхэм зыфагъазэ.
ТхылъыкIэ шхъомчышъо дахэу адыгэ тхыпхъэр къызэшIэкIыгъэу, лъэпкъ тамыгъэр гу сурэтэу зытетыр мэкIаим тет пстэумэ анахьэу сынэгу къыкIидзагъ.
«ХьакIэщ къэбархэр» ыцIэр. Зэу сшъхьэ щызэблэкIыжьыгъ IорIотэкIо Iазэхэу, абдзахэхэу, зэшхэу — КIуайхэу Зэфэсрэ Исмахьилэрэ афэгъэхьыгъэу гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм фольклорымкIэ иотдел иIофышIэхэм конференцие инхэу, Iэнэ хъураехэу, нэмыкI Iофтхьабзэхэу рагъэкIокIыгъэхэр. Щэч хэлъэп ахэм зэкIэм язэфэхьысыжь шIэныгъэ угъоигъэ зэгъэкIугъэу мы тхылъыр зэрэщытым.
«ХьакIэщ къэбархэр»
АдыгэхэмкIэ пасэм хьакIэщыр еджэпIэ-гъэсэпIэшхуагъ, ащ уасэу иIагъэр, мэхьанэу хэлъыгъэр шIэныгъэ угъоигъэ зэгъэзэфагъэхэу тхылъэу къыдагъэкIыхэрэм ащызэIугъэкIагъ, тхыгъэ-хэутыгъэр гъэ мин тешIагъэми кIодыщтэп.
ТхылъыкIэм иапэрэ зэгохыпIэ нэкIубгъуитIум зэратефэу лIэкъо чъыгэу, КIуай Дэунэжъыкъо Исмахьилэ къытекIыгъэхэр къэзыIуатэрэм зэлъеубыты. Чъыг лъапсэм КIуайхэм ялIэкъо тамыгъэ тет, ар шъхьалъи, КIуай Исмахьилэ текIыгъэхэм къутэмэ дахэу заубгъугъ. (Мы сурэтыр зышIыгъэр Хэкужъ Сэфэрбый).
Тхылъыр зэхэзгъэуцуагъэр, пэублэ гущыIэр, зэхэфхэр, еIолIапхъэхэр зытхыгъэр ыкIи хэутыным фэзыгъэхьазырыгъэр гуманитар ушэтынхэмкIэ Адыгэ республикэ институтэу Т. КIэращэм ыцIэкIэ щытым инаучнэ IофышIэу, филологие шIэныгъэхэмкIэ кандидатэу Нэхэе Саид.
«ХьакIэщ къэбархэр: КIуай Исмахьилэ иIотэжьхэр» зыфиIорэм къыдэхьагъэх зэлъашIэрэ IорIотэкIо-тхыдэIуатэу, орэдыIо Iазэу КIуай Дэунэжъыкъо Исмахьилэ ыгу, ышъхьэ къарынагъэхэу, лъэпкъым къыфигъэнэжьыгъэхэр.
«КIуай Исмахьилэ иIотэжьхэр ежь абдзэхабзэкIэ къызэриIотэжьыгъагъэхэу къэдгъэнэжьынхэм тыпылъыгъ. Ащ мэхьэнэ гъэнэфагъэ иIэу тэлъытэ: апэрэмкIэ, абдзэхэ къэIуакIэр зыфэдагъэр хъишъэм къыхэнэ, ятIонэрэмкIэ, адыгабзэм итхыдэ зэхэфын пылъхэмкIэ ишIуагъэ къэкIонэу тэгугъэ», — еIо Нэхэе Саидэ.
Тхылъыр пэублэ гущыIэу Нэхэе Саидэ къышIыгъэм къызэIуехы. Ащ КIуай Исмахьилэ исурэт щытэлъэгъу. Икъуаджэу Хьакурынэхьаблэ ыкIи Шэуджэн районым, ащ фэдэ къабзэу, Адыгэ шъолъырым, лIакъом лIым ыцIэ ащыIугъэу зэрэщытыгъэр, ышIэрэм гъуни-нэзи имыIэу зэрэгубзыгъагъэр, тхыдэIотэ Iазэм шэн гъэтIылъыгъэ, гурыгъозэ ин зэриIагъэр, гукIэгъушхо зэрэхэлъыгъэр, шъхьэкIэфэныгъэшхо къызэрилэжьыгъэр щыкIэгъэтхъыгъ. ЦIыфхэм къызэраIотэжьырэмкIэ, Исмахьилэ IорIотэкIо дэгъу къодыягъэп, IофшIэкIошхуагъ, ащкIэ ныбжьи зэхэдз иIагъэп, шэнышIо-цIыфышIугъ. Чъыгхэтэ дахэ иIагъ, бжьэхъоным фытегъэпсыхьэгъагъ, имыхьамели сыдигъуи цIыфхэмкIэ тIупщыгъагъэ. ГущыIапэм ащ иавтор къыщеIо КIуай Исмахьилэ иунагъо зыфэдагъэр, Даурмэ япхъоу Нахъо ишъхьэгъусагъ, ащ унэгъо хъызмэтыр дэгъоу зэрихьэщтыгъ. Бзылъфыгъэр Iушыгъ, хъупхъагъэ, Исмахьилэрэ Нахъорэ яIорэ-яшIэрэ зэтехьэу зэдэпсэугъэх. Ялъфыгъэхэу Хьамед, Абубэчыр, Долэтбый, Нэфсэт зэдапIугъэх. Тым нахь пэблэгъагъэр ыкIи Iордэгъэзагъэр сыдымкIи Долэтбый ары.
КIуай Исмахьилэ къызхэхъухьэгъэ я ХIХ-рэ лIэшIэгъум ыкIэм щыIэкIэ-псэукIэ шапхъэу адыгэхэм ахэлъыгъэр дэгъоу пкъырыхьагъэу, ыгу риубытагъэу щытыгъэх. ХьакIэщ пчъэ къогъум къотэу, нахьыжъхэм ягущыIэ ащ бэрэ ышыпыгъ, ыпщыжьыгъ, а зэкIэ илъэпIагъ ыкIи ышъхьэ риубытагъэр, анахь «кIэлэегъэджэкIошхоу» иадыгэ лъэпкъ IуигъэкIэжьыныр фызэшIокIыгъ.
ГущыIапэм шIэныгъэлэжьэу Нэхэе Саидэ къыщеIо: «…Пшысэми, къэбарыжъми е нэмыкI IорIуатэмэ ащыщми къыIуатэ зыхъукIэ Исмахьилэ (къызэраIожьрэмкIэ) хэз ышIыщтыгъэп. Ащ шIэжь инрэ IупкIагъэрэ хэлъэу зигугъу къышIырэмэ ацIэхэр, алъэкъуацIэхэр, чIыпIацIэхэр, хъугъэ-шIагъэхэр зыщыхъугъэ илъэсхэр, мазэхэр, мафэхэр къыднигъэсыжьыщтыгъэх.
…КIуай Исмахьилэ идышъэ кон илъых мыщ фэдэ адыгэ IорIотэ зэфэшъхьафхэр: къэбарыжъхэр, пщыналъэхэр, хъишъэхэр, пшысэхэр, хъохъухэр, хырыхыхьэхэр ыкIи нэмыкI IорIуатэхэр».
Къыхэгъэщыгъэн фае лIы губзыгъэм дэжь адыгэ гъэсэгъабэ кIоу, Iоф къызэрэщашIэщтыгъэр. Ахэр: шIэныгъэлэжь-угъоякIохэу ХьэдэгъэлIэ Аскэр, Хъуажъ Махьмуд, Мэрэтыкъо Мыхъутар, Бырсыр Батырбый, нэмыкIхэри. Ащ къыIотагъэу бэ атхыгъэр, ахэр гуманитар ушэтынхэмкIэ Адыгэ республикэ институтым ихъарзынэщ хэлъых.
Зы лIым иакъыл-губзыгъагъэ къыпыкIыгъэ Iотэжьхэр, нарт къэбархэр, тхыдэхэр, джы къызнэсыгъэм тишIэныгъэлэжьхэр зыдэлажьэхэ екъу, дэгъугъэ ахэмкIэ зэрифэшъуашэу акъыл зыжьыгъэ зыхэлъ гупшысэхэр къаIэкIэкIыгъэхэмэ. Щэч хэлъэп, КIуай Исмахьилэ лъэпкъ губзыгъагъэр зыхэгощэгъагъ ыкIи ар зые адыгэхэм аIуигъэкIэжьыгъ.
НэкIубгъо 220-м ехъурэ тхылъым къыдэхьагъэх Нарт эпосым щыщ къэбархэр, адыгэ лIыхъужъ орэдхэмрэ ахэмкIэ къэбархэмрэ, фэIо-фэшIэ IорIуатэхэр, къэбархэр, пшысэхэр, уахътэр зэралъытэщтыгъэр, хырыхыхьэхэр, еIолIапхъэхэр ыкIи зэхэф гущыIалъэр.
«ХьакIэщ къэбархэр» адыгэ лъэпкъым ищыкIэгъэ IофшIэгъэ гъэнэфагъ, ащ иавтор-зэхэгъэуцуакIоу институтым фольклорымкIэ иотдел иIофышIэ шъхьаIэу Нэхэе Саидэ, къыдэкIыгъом иредактор шъхьаIэу, филологие шIэныгъэхэмкIэ докторэу Гъыщ Нухьэ, редакторэу, филологие шIэныгъэхэмкIэ докторэу Биданэкъо Марзият, рецензентэу, филологие шIэныгъэхэмкIэ докторэу Цуекъо Нэфсэт Iофышхоу зэшIуахыгъэмкIэ рэзэныгъэр къалэжьыгъ. ТхылъыкIэм «Гъогу маф!» фэтэIо.
Мамырыкъо Нуриет.