КъэкIыхэрэмрэ хьаIу лъэпкъхэмрэ ащыщхэу Тхылъ Плъыжьым дэ­хьа­гъэхэм якъэугъоинрэ яIугъэкIынрэ апае Урысыем уголовнэ пшъэ­дэкIыжь щарагъахьызэ зэрашIыщтым фэгъэхьыгъэ унашъом кIуачIэ иIэ хъугъэ.

[caption id="attachment_140337" align="aligncenter" width="800"] ЗэIухыгъэ къэбарлъыгъэIэс амалхэр.[/caption]

«Рядовка мацутакэ» зыфиIорэ хьаIур, женьшеныр, «радиола ро­зовая» зыцIэр хэбзэнчъэу къэзыугъоихэрэм, зыщэхэрэм ягъэпщынэн фэгъэхьыгъэ законыр мы илъэсым мэлылъфэгъум Къэралыгъо Думэм идепутатхэм аштагъ. УФ-м чIыопсымкIэ и Министерствэ зэхигъэуцогъэ уна­шъом къыщепчъых анахьэу анаIэ зытырагъэтын фэе лъэныкъохэр. Урысыем и Правительствэ и Тхьаматэу Михаил Мишустиным ыIапэ а документым кIидзэ­жьыгъ.

ШIэныгъэлэжьхэм зэрагъэунэфыгъэмкIэ, хэбзэнчъэу къызэраугъоихэрэм пае ахэм япчъагъэ, чIыпIэу зэлъаубытырэм хэпшIыкIэу къакIичыгъ. Iэзэгъу уцхэу къэкIыхэрэм мы аужырэ илъэс 20-м къащыкIагъ. Аужыпкъэм къыхэкIы ахэр Урысыем ращыхэу, IэкIыб къэралыгъохэм аIэкIагъахьэу. «Ащ фэдэ хэбзэ­укъоныгъэ зышIыхэрэр тазырхэм къызэрамыгъэуцухэрэм пае нахь лъэшэу агъэпщынэнхэ фаеу зыкIэхъугъэр», — къыIуагъ Урысыем чIыопс къэкIуапIэ­хэм­кIэ ыкIи экологиемкIэ иминистрэу Александр Коз­ловым. Тхылъ Плъыжьым дагъэхьэгъэ хьаIу лъэпкъхэмрэ къэкIыхэрэмрэ хэбзэнчъэу къэзыугъоихэрэм, зыщэхэрэм шIокI зимыIэ Iоф­шIэнхэр сыхьат 480-м нэсэу арагъэгъэцэкIэщтых, е илъэси 4-м нэсэу хьапс атыралъхьащт, тазырэу сомэ миллион арагъэтыщт.

Анахьэу агъэпщынэщтхэр IэнатIэхэр зыIыгъхэр, пэшIорыгъэшъэу зэзэгъыхи, куп гъэнэфагъэм хэхьагъэхэр ары. Мыщ фэдэ бзэджэшIагъэм хэщагъэхэу зэгуцафэхэрэм афэгъэхьыгъэ къэбарыр хэбзэухъумэкIо къулыкъухэм аIэкIагъахьэзэ ашIымэ, ишIогъэшхо къызэрэкIощтым уехъырэхъышэнэу щытэп.

Урысыем и МВД, Урысыем и ФСБ и ГъэIорышIапIэу къэралыгъо гъунапкъэм ищынэгъончъагъэ фэгъэзагъэм, Федеральнэ таможеннэ къулыкъум ялIыкIохэм ащ фэдэ бзэджэшIагъэ­хэм гъогур афыпыбзыкIыгъэным анаIэ тырагъэты, рейд зэ­фэ­шъхьафхэр зэхащэх.

Урысыем чIыопсым икъэу­хъумэнкIэ и Минис­терствэ ипресс-къулыкъу