Сергей Путилиныр 2018-рэ илъэсым къы­щегъэжьагъэу Мыекъопэ къэлэ къэзэкъ обществэм икъэзэкъ хьыкум итхьамат. Я 227-рэ артилле­рийскэ бригадэм зэзэгъы­ныгъэ дыкIэтхагъэу непэ ащ ипшъэрылъхэр «кIэпсэжъыем шъхьарыкIыгъэу» егъэцакIэх. Сергей реактивнэ системэ зыхэт ма­шинэу «Ураган» зыфиIо­рэм ис. Пшызэ къэзэкъы­дзэм иатаман ищытхъу тхылъ къыфагъэшъошагъ.

Сергей Сергей ыкъор кIэлэцIыкIуи 6-мэ зэрятэм емылъытыгъэу, и Хэгъэгу къыухъумэнэу унашъо ышIыгъ. Зы такъикърэ иунагъо щыгъупшэу къы­хэкIырэп. Окоп цIынэм дэлъэу ыгу къэзыгъэфабэхэрэм зэу ащыщ бэмы­шIэу ащ шъэожъые къызэрэфэхъугъэр.

Джащ фэдэу зэолIым къыкъот ыкIи ыгу къыдещае ишъхьэгъусэу Маринэ. Урысые ухъумакIохэм зэкIэми япсауныгъэ пы­тэ­ным, ящыIэныгъэ къэухъу­мэгъэным афэгъэхьыгъэ тхьэлъэIу­хэм­кIэ ащ имафэ еублэ ыкIи ибзылъфыгъэ пшъэ­рылъхэр зэрэфэлъэ­кIэу егъэцакIэх.

— Унагъор — насыпышIо зэшъхьэгъусэх, са­быйхэм ящхы макъ, шIулъэгъур, чэфыгъор. Сэ сынасыпышIу, сыда пIомэ тиунэгъо Iужъу хэбзэ гъэ­нэфагъэ илъ: къини хъяри зэдэдгощыныр, — еIо Марина Путилинам.

Юрий Михайлиди Мые­къуапэ ирайон къэзэкъ обществэ 2014-рэ ­илъэсым къыхэхьагъ. Мы уахътэм ар Мыекъопэ къэлэ къэзэкъ обществэм иатаман игуадз. ХэушъхьафыкIыгъэ дзэ операциер рамыгъажьэзэ зэкIэ Iофтхьа­бзэу республикэм щыкIо­хэрэм къэзэкъ отделыр къащигъэлъэгъуагъ. Къэзэкъ дзэ-шъоф угъоинхэм, спорт зэнэкъокъухэм ахэлэжьагъ.

Юрэ ятэу Владимир Панает ыкъор Мыекъопэ къэзэкъ отделым изэхэщэн чанэу хэлэжьагъ.

ХэушъхьафыкIыгъэ дзэ операцием иапэрэ ма­фэхэм къащегъэжьагъэу Ю. Михайлиди къулыкъур ехьы. УIэгъэ хьылъэхэр къытыращэхи ипсауныгъэ зыпкъ зырегъэуцожьым ыуж етIани ащ ыгъэзэ­жьыгъ. Я 227-рэ Мыекъо­пэ артиллерийскэ брига­дэм водитель-механикэу хэт.

Юбилейнэ медалэу «Адыгэ Республикэр зызэхащагъэр илъэси 100 мэхъу» зыфиIорэр, къащэу «За заслуги перед Кубанским казачеством», тамыгъэу «Гвардия Российской Федерации», щытхъу ыкIи рэзэныгъэ тхылъ зэфэшъхьафхэр Юрэ къыратыгъэх. Юрэ пшъэшъэжъыитIумэ ят, ахэм арэгушхо.

«Сиунагъо сэркIэ къо­тэгъушху, сипкъэу! Ахэр сигупсэх, къыспэблэгъэ цIыфых, яфэбагъэ тыдэ сыщыIэми къыслъэIэсы. Ахэм яшIуагъэкIэ сыгу щизэу жьы къэсэщэ. СищыIэныгъэ лъызгъэкIуа­тэрэр сишъхьэгъус, сыд фэдэ унашъо сшIыгъэми ащ къыздырегъаштэ, ащкIэ инэу сыфэраз», — еIо Юрий Владимир ыкъом.

Мыекъопэ къэзэкъ отделыр.