Джэджэхьаблэ щыщ кIэлэеджакIор апэрэхэм ащыщ
КIэлэцIыкIу письмэхэмкIэ я XXI-рэ урысые зэнэкъокъоу Урысыем и Почтэ гъэ къэс зэхищэрэм зэфэхьысыжьхэр фашIыгъэх.
«Письмэм идесэ анахь дэгъур-2023-рэ» зыфиIорэ зэнэкъокъум хэлэжьагъэхэм ащыщэу кIэлэеджэкIо 48-мэ ыкIи кIэлэегъэджэ 13-мэ лъэныкъо зэфэшъхьафхэмкIэ текIоныгъэр къыдахыгъ.
Зэнэкъокъум изы лъэныкъоу «Унэгъо насыпышIом ишапхъ» зыфиIорэмкIэ лауреат хъугъэ Адыгэ Республикэм и Теуцожь район ит къуаджэу Джэджэхьаблэ дэт я 7-рэ гурыт еджапIэу Джармэкъо Нухьэ ыцIэ зыхьырэм икIэлэеджакIоу ЛIыбзыу Альбинэ.
Зэнэкъокъум хэлэжьагъэмэ анахьэу зыкъызщагъэлъэгъуагъэр патриотическэ письмэхэм ятхын ары: «ЩыI ащ фэдэ сэнэхьат — Хэгъэгур къэбгъэгъунэныр», «Сэ сыгуфакIу», «Унэгъо насыпышIом ишапхъ» зыфиIохэрэр ыкIи нэмыкIхэр. Къэралыгъом хэхъоныгъэу ышIыхэрэм, ащ ежьхэм яIахьэу халъхьэрэм, уасэ зыфашIыхэрэм ныбжьыкIэхэр къатегущыIэх.
Зэнэкъокъум ипшъэрылъыр акъылыгъэ хэлъэу ягупшысэхэр ныбжьыкIэхэм къыраIотыкIыным фэгъэсэгъэнхэр, ныдэлъфыбзэм имэхьанэ зэхягъэшIыкIыгъэныр ыкIи письмэ тхыным творческэ екIолIакIэ фашIышъоу гъэсэгъэнхэр ары.
2023-рэ илъэсыр пштэмэ, унагъом, шIулъэгъум ыкIи зэгурыIоныгъэм я Мафэ фэгъэхьыгъэу социальнэ-культурнэ шIоигъоныгъэхэм я Фондэу С. В. Медведевар зипащэм ябгъонэрэ тхылъыр къыдигъэкIыгъ, ащи зэреджагъэхэр «Унэгъо насыпышIом ишапхъ».
Аужырэ илъэсхэм зэнэкъокъум хэлэжьагъэхэм яIофшIагъэхэр «Хэгъэгур тыдэ къыщежьэра?» зыцIэ зэмышъогъу тхылъ тIокIэу тхылъеджапIэхэм аратыгъэхэм къадэхьагъэх. Зэхэт тиражыр экземпляр мин 45-рэ мэхъу. Лъэпкъ зэнэкъокъоу «Илъэсым итхылъ» зыфиIорэм лауреатыцIэр къыщыфагъэшъошагъ а тхылъхэм ащы-щэу «Сиунэ амурскэ къэплъаныр ис» зыцIэм.
КIэлэцIыкIу письмэхэм ятхылъхэм пэублэ гущыIэхэр къафашIыгъ УФ-м и Президентэу Владимир Путиным, УФ-м зыкъэухъумэжьыгъэнымкIэ иминистрэу Сергей Шойгу, къалэу Москва имэрэу Сергей Собяниным ыкIи нэмыкIхэм.