АР-м и Лъэпкъ тхылъеджапIэ иIофышIэ­хэм курсхэр афы­зэхащагъэх, ахэр зыфэгъэхьыгъэхэр мылъкум игъэ­зекIон ишапхъэхэр ары. Курсхэм язэхэ­щакIу УФ-м и Правительствэ дэжь щыIэ Финансовэ университетыр.

ЦIыфхэм яфинансовэ культурэ изыкъегъэIэтын анахь пшъэрылъышхоу мы IофтхьабзэмкIэ тхылъеджэпIэм зыфе­гъэуцужьы.

ТхылъеджапIэм иIофышIэхэм зэра­лъы­тэрэмкIэ, мы IофшIэным мэхьанэшхо иI, сыда пIомэ джырэ уахътэм финанс­хэм ягъэзекIон щынэгъончъэжьэп. ­Цифрэ, технологиякIэхэм хэгъэгур ­зы­щатехьэгъэ лъэхъаным финансхэм япхыгъэ шIэныгъэхэр лые хъухэрэп, ары пакIошъ, къашъхьапэх.

Шъугу къэдгъэкIыжьын, мы лъэны­къомкIэ Адыгэ Республикэм и Лъэпкъ тхылъеджапIэ Iофтхьэбзэ зэфэшъхьафхэр зэрихьагъэх. АР-м и Гупчэ Банк иIофы­шIэхэм Iэнэ хъураеу «Финансовэ культу­рэмрэ щынэгъончъэнымрэ» ыкIи «Зе­кIоным фэгъэхьыгъэ Адыгеир — хьакIэщыр» зыфиIохэрэр мыщ щызэхащэгъагъэх. Урысые Банкым и Къутамэу Адыгэ Республикэм и Лъэпкъ банк ипащэу Сергей Самойленкэр, экономи­кэмкIэ иотдел ипащэу Елена Аспидовар, лъытэн ыкIи щэн системэм исектор ипащэу Мыгу Адам ащ хэлэжьэгъагъэх ыкIи къыщыгущыIэгъагъэх. А Iофыгъомэ зэкIэмэ къакIэлъэкIо финансовэ лъэныкъом цIыфхэм нахь хэшIыкI фыряIэныр.

Джащ фэдэу тхылъеджапIэм зэпхыныгъэхэр адыриIэх Роспотребнадзорым и ГъэIорышIапIэу Адыгэ Республикэм щыIэм; «Объединение потребителей России» зыцIэ Урысые общественнэ движением и Шъолъыр къутамэ; «Центр гигиены и эпидемиологии в Республике Адыгея» зыфиIорэм. Адыгэ Республикэм и Лъэпкъ тхылъеджапIэрэ мы зыцIэ къетIуагъэхэмрэ зэгъусэхэу Iэнэ хъурае­хэр, зэIукIэхэр, Iофтхьэбзэ зэфэшъхьаф­хэр зэхащэх, цIыфхэм яшIэныгъэхэм ахагъэхъоным дэлажьэх.

Нина Плотнерчук. Лъэпкъ тхылъеджапIэм техническэ ыкIи экономическэ литературэмкIэ иотдел ипащ.