Къалэу Шъачэ ыкIи ащ епхыгъэ къоджэ псэупIэхэм псы къабзэр зэ­пыу имыIэу аIэкIэгъэхьэгъэным фытегъэпсыхьэгъэ программэр муниципальнэ псэупIэм щыпхыращы.

— ТэркIи, тигъунэгъу къоджэ псэупIэхэмкIи мыр илъэсыбэ хъугъэу тызыгъэгумэкIырэ Iофыгъу, — къыIуагъ къуаджэу Хьаджыкъо ичIыпIэ общественнэ зыгъэIорышIэжьыпIэ Совет ипащэу Шъыжъэ Мусэ. — Псым ылъэныкъокIэ гумэкIыгъоу щы­Iэхэм бэшIагъэу ягугъу тэшIы, цIыф зэхахьэхэм мызэу-мытIоу къащытIуагъ, ПсышIопэ район администра­цием ипащэхэм, Къэлэ ЗэIукIэм идепутатхэм, «Водоканалым» илIыкIохэм апашъхьэ къыщытIэтыгъ, Шъачэ имэр иприемнэ тхыгъэ дгъа­хьэуи хъугъэ. Iофыгъом идэ­гъэзыжьын ыуж итых, тэ зэрэтIоу охътэ кIэкIкIэ зэшIохыгъэ хъурэп, ау Iэпэдэлэл ашIыгъэп, рагъэжьагъэр къызэ­тырамы­гъэуцоу лъагъэкIуатэ.

Хьаджыкъо псыр къезытырэ системэр агъэкIэжьыгъ. Специалистхэм къызэраIуагъэмкIэ, нахьыпэкIэ рагъэжьэгъагъэхэр аухыжьыхи, атIупщыгъэх, со­циальнэ псэуалъэхэм якIурэ тру­бэхэр зэблахъугъэх, псым икъэ­тын ищыкIэгъэ оборудованиер зэрагъэуцощт псынэхэр ашIыгъэх. ПстэумкIи трубэ метрэ 700-м ехъу зэблахъугъ.

— Къоджэ цIыкIоу нэбгырэ 500 нахьыбэ зыдэмысыр къу­шъхьэм лъагэу тет, хым метрэ 260-кIэ шъхьарыIэтыкIыгъэу мэхъу, — къыщыхагъэщыгъ «Водоканалым» ипресс-къулыкъу.

— ЕтIани федеральнэ автомобиль гъогум, ПсышIопэ районым иинфраструктурэу зызыушъомбгъурэм апэчыжь. Арышъ, псыр икъоу IэкIэгъэхьэныр анахь шъхьаIэхэм ащыщ, чIыпIэм хэхъоныгъэхэр ышIынхэм ар фэIорышIэщт.

ХъызмэтшIапIэм ипащэу Денис Юрковскэм къызэриIуа­гъэмкIэ, къоджэ псэупIэхэм псы къабзэр икъоу аIэкIэгъэхьэгъэным епхыгъэ IофшIэнхэр тапэкIи лъагъэкIотэщтых. Хьаджыкъо планым хэт, арышъ, щызэшIуа­хыгъэхэм къащыуцущтхэп.

Лъэпкъ культурэм и Гупчэу поселкэу ПсышIуапэ дэтым псыр езытырэ системэм игъэкIэжьын «Водоканалым» ригъэжьагъ. Ар заухыкIэ мы социальнэ псэо­лъэшхом зэпыу фэмыхъоу псыр IэкIэхьащт.

— Унэр зашIыгъэм къы­щегъэжьагъэу коммуникациеу иIэхэр зэблахъугъэхэп, — къы­щаIуагъ «Водоканалым» ипресс-­къулыкъу. — Гупчэр ПсышIопэ районым икультурнэ щыIакIэ анахьыбэу зиIахь хэзылъхьэхэрэм ащыщ, ныдэлъфыбзэм, тарихъым якъызэте­гъэнэжьын дэлажьэ. Ащ лъэпкъ гупчибл ыкIи культурэм иунэ щэкIым ехъу зэрепхых.

Учреждением псыр къезытырэ системэр зэрэщытэу агъэ­кIэжьыгъ, рыкIопIэ метри 100 зэблахъугъ, джыри IофшIэнхэр лъагъэкIуатэх. Ахэр заухыхэкIэ зэпыу фэмыхъоу псы къабзэр IэкIэхьащт, ащ щылажьэхэрэми, къекIуалIэхэрэми IофшIэкIэ амалышIухэр яIэ хъущт.

НЫБЭ Анзор.