Гупчэр къызэIуахыгъ
Логистическэ гупчэу ОЗОН-м ия 3-рэ чэзыу паркэу Ромекс-Теучежский зыфиIорэм щатIупщыгъ. Адыгеим и ЛIышъхьэу КъумпIыл Мурат Iофтхьабзэм хэлэжьагъ.
Джащ фэдэу комплексым икъызэIухын хэлэжьагъэх компаниеу «Ромекс Group» ипрезидентэу Алексей Прокопенкэр, АР-м экономикэ хэхъоныгъэмрэ сатыумрэкIэ иминистрэу Шэуджэн Заур, ОЗОН-м ипащэ игуадзэу Владимир Гончаревич, Теуцожь районым ипащэу УдыкIэко Адам, Адыгэкъалэ имэрэу Хьачмамыкъо Азэмат.
Илъэсрэ ныкъорэм къыкIоцI компаниеу «Ромекс» гъомылэпхъэ ыкIи мыгъомылэпхъэ товархэм яIыгъыпIэ ишIын тегъэпсыхьэгъэ инвестиционнэ проектыр ыгъэцэкIагъ.
Псэуалъэр бэджэндэу ОЗОН имаркетплейс ратыгъ. Проектым ипхырыщын сомэ миллиарди 6,2-рэ фэдиз тефагъ, ОЗОН-м сомэ миллиарди 2,4-рэ хъурэ иинвестициехэр оборудованием хилъхьагъэх. Логистическэ комплексым квадрат метрэ мини 107-м ехъу зэлъеубыты. Ящэнэрэ чэзыур затIупщыкIэ, нэбгырэ мини 2 фэдизмэ мыщ Iоф щашIэщт. Проектыр пхыращы зэхъум административнэ, инфраструктурэ Iофыгъохэм язэшIохынкIэ, мылъкукIэ республикэм сыдигъуи инвесторым ишIуагъэ ригъэкIыщтыгъ.
Адыгеим и ЛIышъхьэ Iофтхьабзэм хэлажьэхэрэм проектыр зэрагъэцэкIагъэмкIэ афэгушIуагъ. Компаниеу «Ромекс» зыфиIорэр бэшIагъэу республикэм ицыхьэшIэгъу гъусэгъоу зэрэщытыр къыхигъэщыгъ.
ТапэкIэ компанием урысые компаниешхоу «Х5 Retail Group» зыцIэу гъомылапхъэхэр зыщэрэ тучанхэу «Пятерочка», «Чижик» зыфиIохэрэр зыгъэIорышIэрэм пае гупчитIу Адыгеим щигъэпсыгъагъ. Илъэси 5-кIэ узэкIэIэбэжьымэ, Адыгэкъалэ дэжь паркэу «Теучежский» зыфиIорэр щызэдагъэпсыгъагъ. Непэ къызэIуахыгъэ логистическэ комплексыр паркым ирезидент — компаниеу ОЗОН тегъэпсыхьагъ.
«Мы проектыр гъэхъагъэ хэлъэу агъэцэкIэнымкIэ зишIуагъэ къэкIуагъэхэр компаниеу «Ромекс Group» ипрезидентэу Алексей Прокопенкэмрэ ащ къыдэлажьэхэрэмрэ ары. ШIогъэшхо къэзытырэ, зипшъэрылъхэр икъоу зыгъэцэкIэрэ компаниеу «Ромексым» зыкъигъэлъэгъуагъ. Компаниеу ОЗОН лъэшэу сызэрэфэразэр къасIо сшIоигъу хэгъэгум и КъыблэкIэ логистическэ комплекс иныр Адыгеим щигъэпсынэу зэрэрихъухьагъэм фэшI», — къыIуагъ КъумпIыл Мурат.
Республикэм и ЛIышъхьэ компаниеу «Ромекс Group» ипащэхэм «тхьашъуегъэпсэу» ариIуагъ Адыгеим иэкономикэ ихэхъоныгъэ яIахьышIу зэрэхашIыхьагъэм фэшI ыкIи инвестиционнэ проектым ипхырыщын хэлэжьагъэхэм къэралыгъо тынхэр аритыжьыгъэх.
Адыгэ Республикэм ыпашъхьэ гъэхъэгъэ ин дэдэхэр зэрэщыриIэм фэшI пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Ромекс-Кубань» зыфиIорэм ипрезидентэу Алексей Прокопенкэм медалэу «Адыгеим и Щытхъузехь» зыфиIорэр фагъэшъошагъ. ПсэолъэшIынымкIэ гъэхъагъэхэр зэриIэхэм фэшI щытхъуцIэу «Адыгэ Республикэм изаслуженнэ псэолъэшI» зыфиIорэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Ромекс-Кубань» иинженер шъхьаIэу Андрей Стороженкэм фагъэшъошагъ. Проектым ипащэу Виктор Салафаниди, псэолъэшIын уплъэкIунхэмкIэ инженерэу ЛIые Адам АР-м и ЛIышъхьэ и Рэзэныгъэ тхылъ афагъэшъошагъ. ОЗОН-м ипащэ игуадзэу Владимир Гончаревич къэзэрэугъоигъэхэм шIуфэс къарихыгъ. Спикерым республикэм ипащэхэм «тхьашъуегъэпсэу» къариIуагъ бизнесымкIэ ищыкIэгъэ амалхэр республикэм зэрэщызэхащагъэхэм фэшI.
Компаниеу «Ромекс Group» ипрезидентэу Алексей Прокопенкэм проектышхом ипхырыщын Адыгеим и ЛIышъхьэ иIахьышIу къызэрэхишIыхьагъэр къыхигъэщыгъ. Инвестиционнэ IофшIэным IэпыIэгъу егъэгъотыгъэнымкIэ ищыкIэгъэ федеральнэ, республикэ Iофтхьабзэхэр зэрэзэрахьагъэхэр ащ хигъэунэфыкIыгъ.
ХьакIэхэм фулфилмент-гупчэм Iоф зэришIэрэм нэIуасэ зыфашIыгъ. Республикэм ипащэ зэрэхигъэунэфыкIыгъэмкIэ, ОЗОН имаркетплейс зэдэлэжьэныгъэу дыряIэм предприниматель IофшIэным республикэм нахь зыщыригъэушъомбгъущт.
КъумпIыл Мурат АР-м экономикэ хэхъоныгъэмрэ сатыумрэкIэ и Министерствэ пшъэрылъ фишIыгъ сатыушIыпIэхэм яспециалистхэм ягъусэу республикэм ибизнесменхэм апае семинархэр зэхищэнэу, япродукцие IуагъэкIынымкIэ амалыкIэу щыIэхэмкIэ предпринимательхэм макъэ аригъэIунэу.
Джащ фэдэу республикэм IофшIэнымрэ социальнэ хэхъоныгъэмрэкIэ и Министерствэрэ цIыфхэм IофшIапIэ къафэзыгъотырэ къулыкъумрэ Iофтхьабзэм пшъэрылъ щафашIыгъ логистическэ гупчакIэм Iоф щашIэнэу Адыгеим щыпсэухэрэм ащыщхэр агъэхьазырынхэу.
АР-м и ЛIышъхьэ ипресс-къулыкъу