Тым и Мафэ ехъулIэу республикэм икъэлэ шъхьаIэ игурыт еджапIэхэм ащыщ икIэлэеджа­кIохэр хьыкум приставхэм я Федеральнэ къулыкъу Адыгэ РеспубликэмкIэ и ГъэIорышIапIэ ихьэкIагъэх. Iофтхьабзэм хэлэжьагъэх къулыкъум ипащэхэр ыкIи кIэлэегъаджэхэр.

Тэу ущытыныр къызэрыкIоп, хъулъфыгъэ пэпчъкIэ мэхьанэшхо ыкIи пшъэ­дэкIыжьышхо зыпылъ лъэныкъу — ары гупшысэ шъхьаIэу зэдэгущыIэгъум иIагъэр.

Ты шъыпкъэу, щысэ зытепхын плъэ­кIыщтэу зигугъу къашIыгъэр ГъэIорышIапIэм ипащэ игуадзэу Шахые Налбый. Ащ шъаорэ пшъашъэрэ иI, илъфыгъэхэм арэгушхо. Мы илъэсым Налбый Аслъан ыкъом ипшъа­шъэу Джэнэт Урысые фестиваль-зэнэкъокъоу «Хрустальные звездочки» зыфиIорэм ия III-рэ едзыгъо текIоныгъэр къыщыдихыгъ. Пшъэшъэ хъупхъэм фэгушIуагъэх, къылэжьыгъэ шIухьафтыныр ратыжьыгъ.

Нэужым кIэлэеджакIохэм ГъэIорышIапIэр зычIэт унэр къарагъэплъыхьагъ, хьыкум приставхэм яIофшIэн епхыгъэу къэбархэр къафаIотагъ.