Непэ зисэнэхьат епхыгъэ мэфэкIыр хэзыгъэунэфыкIыхэрэр уз пстэуми яIэзакIохэу алъытэрэ врачхэр — терапевтхэр ары. Участковэ терапевтым ищыIэныгъэкIэ емыолIэгъэ цIыф щыIэп сIоми сыхэукъонэп къысшIошIы. Ахэм ясатырэ хэтэу Iоф зышIэрэ врач ныбжьыкIэхэм ащыщ непэ нэIуасэ шъуфэтшIыщт.

[caption id="attachment_140280" align="aligncenter" width="800"] З. Куржьым иунэгъо хъарзынэщ.[/caption]

Мыекъопэ къэлэ поликлиникэу N1-м иучастковэ-терапевтэу Куржь Заирэ мэфэкIым ипэгъокIэу зыIудгъэкIагъ. Ар Шэуджэн районым ит къуаджэу Пщычэу къыщыхъугъ. Хьатыгъужъыкъое гурыт еджапIэу N 6-м щеджагъ.

— Адрэ кIэлэеджэкIо пстэуми афэдэу сэри сищыIэныгъэ зэспхы сшIоигъо сэнэхьатхэм сягупшысэщтыгъ, — къеIуатэ Заирэ. — Гурыт классхэм сакъэсыгъэу, лъэшэу сыгукIэ сыфаеу, врач сыхъунэу тесыубытагъ. Ащ тегъэпсыхьагъэу анахьэу сищыкIэгъэщт предметхэми язэгъэшIэн дэсыублагъ. ТиунагъокIэ медицинэ сэнэхьатым рылажьэрэ къахэкIыгъэп, сэры апэрэр. СыгукIэ сыфаеу мыр къызэрэ­хэсхыгъэр арын фае лъэшэу сигуапэу Iоф зыкIырысшIэрэр.

Заирэ 2003-рэ илъэсым Пшызэ къэралыгъо медицинэ университетым икъу­тамэу Мыекъуапэ дэтыгъэм чIэхьагъ ыкIи зыкIэхъопсыщтыгъэ сэнэхьатыр зэригъэ­гъотыгъ. Зы илъэсрэ терапиемкIэ ординатурэр Адыгэ республикэ клиническэ сымэджэщым щикIугъ. 2019-рэ илъэсым пульмонологиемкIэ сэнэхьат тедзэ къыз­IэкIигъэхьагъ. А 1-рэ категориер икIыгъэ илъэсым къыгъэшъыпкъэжьыгъ.

— 2009-рэ илъэсым Мыекъопэ къэлэ поликлиникэу N1-м сыкъыIухьагъ. Апэрэ IофшIэгъу илъэсхэр къин къысщыхъущтыгъэх, сыда пIомэ теориер тшIэщтыгъ, ау практикэр лъэшэу тимэкIагъ. Ау илъэс пчъагъэ хъугъэу Iоф щызышIэрэ терапевтхэр упчIэжьэгъу сшIыгъэх, ежьхэми «хьау» къысамыIоу зэкIэри къызгурагъэ­Iуагъ. АщкIэ зэкIэми сафэраз. Мы поликлиникэм илъэс заулэрэ сыщылэжьагъэу, программэу «Земский доктор» зыфи­IорэмкIэ Красногвардейскэ гупчэ район сымэджэщым сыкIонэу хъугъэ ыкIи ащ илъэси 5-рэ сыкъэтыгъ. 2017-рэ илъэсым къэзгъэзэжьыгъ. IэзапIэм хэхьэрэ участкэ 30-м ехъурэмэ ащыщэу я 2-р джы сэ къысэпхыгъ, ащ нэбгырэ 1700-м ехъу къыхеубытэ, — еIо Куржь Заирэ.

ТигущыIэгъу къызэрэхигъэщыгъэмкIэ, терапевтым пшъэрылъэу иIэр узыр игъом къыхигъэщыныр, еIэзэныр ары. Ежь IэзапIэм къекIуалIэхэрэм анэмыкIэу, унэм илъ сымаджэхэм адэжь участковэ терапевтыр макIо, ищыкIэгъэ Iэзэныр къыфе­гъэнафэ. Пэтхъу-Iутхъур къызэузыхэрэм къащегъэжьагъэу гу-лъынтфэ ыкIи Iэпкъ- лъэпкъ системэхэм агъэгумэкIыхэрэм IэпыIэгъу ящыкIагъэу къафытеох. Ащ фэдэ сымэджэ купхэм «стационар на дому» зыфаIорэр афызэхащэ — IэзапIэм хэт процедурнэ кабинетым къемыкIолIэшъурэм медицинэ сестрар кIозэ уколхэр фешIых, капельницэхэр къафыритхы­кIынхэу терапевтым фитыныгъэ иIэп. Джащ фэдэу, сымаджэу щылъхэм илъэс­ныкъом е илъэсым зэ пэшIорыгъэшъ уплъэкIунхэр участковэ терапевтым афызэхещэх.

— Апэ сымаджэр зыIэкIафэрэр терапевтыр ары, — къеIуатэ Заирэ. — Ащ зэкIэ узхэм хэшIыкI куу афыриIэн фае, сыда пIомэ сымаджэм иуз о къыомыпхыгъэмэ, специалистэу зыдэбгъэкIощтыр тэрэзэу къыхэпхынэу щыт. Сымаджэхэри яшэнкIэ зэфэдэхэп. Тэ нахьыбэрэм къытэуалIэхэрэр зыныбжь хэкIотагъэхэр ары. Арышъ, нэбгырэ пэпчъ екIолIакIэ къыфэбгъотын фае. Ары пакIошъ, Iэзэгъу уцхэмкIэ узэряIазэрэм нахьи гущыIэ фабэ зищыкIагъэу, агу илъыр къыраIотыкIымэ ашIоигъоу къытэуалIэрэр макIэп. НэгушIоу сызапэгъокIыкIэ, хъужьыгъахэу къызщыхъухэрэри къахэкIых. Илъэс пчъа­гъэ хъугъэу къысфакIорэ сымаджэхэр сиIэх, ахэм цыхьэ къызэрэсфашIырэм кIуачIэ къысхелъхьэ. Шъыпкъэ, сыма­джэ­хэм къахэкIых зэпэуцужь горэхэр къэзыIэтыхэрэри. Ахэми гущыIэ гъэнэфагъэ­хэр къафэсэгъотых, тызэгурыIуагъэу IэзапIэм чIэкIыжьых. Ащ фэдэ хъугъэ- шIагъэхэм апае сыгу кIодэу хъурэп, врач сэнэхьатыр къызэрэхэсхыгъэм сырыкIэгъожьэу къыхэкIыгъэп.

Къыхэзгъэщымэ сшIоигъу, коронавирусым дунаир зызэлъекIум, зэкIэ тимедицинэ IофышIэхэм афэдэу, Заири а къиныгъохэр зэпичыгъэх.

— 2021-рэ илъэсэу а уз мэхъаджэм ижъотыпIэм сабый къыспыфагъэу унэм сисыгъ, — еIо врачым. — Ащ мэзи 5 ыныбжьэу сыкъыдэкIыжьын фае хъуи, ковиднэ бригадэм сыхэфагъ. ЗэрэтфэлъэкIэу узым тыпэуцужьыгъ, цIыфхэм япсауныгъэ тыфэбэнагъ.

ТигущыIэгъу IофшIэным дакIоу, унэгъо дахэ ышIагъ. Ишъхьэгъусэрэ ежьыррэ кIэлищ зэдапIу.

— СикIэлэ нахьыжъ илъэс 12 ыныбжь, ар стоматолог хъунэу фай. ЩыIэныгъэм хэхъухьащтыр къэшIэгъуай, зыфаер къы­дэхъумэ дэгъу. Адрэхэр цIыкIух. Ау сыд фэдэрэ сэнэхьат къыхахыщтми адезгъэ­штэщт, ны-тыхэмкIэ анахь шъхьа­Iэр ты­къамыгъэукIытэжьэу цIыф дэгъу хъунхэр ары, — къыхигъэщыгъ врачым.

Непэрэ мэфэкIыр хэзыгъэунэфыкIырэ участковэ терапевтхэм Куржь Заирэ ыцIэкIэ тафэгушIо! ШIуагъэ зыхэлъ сэнэхьатэу агъэцакIэрэм щытхъу къырахьэу, кIуачIэ къызхагъотэжьэу, псауныгъэ ежьхэми яIэу илъэсыбэрэ щыIэнхэу афэтэIо.

Iэшъынэ Сусан.