«ПсэупIэр ыкIи къэлэ щыIакIэр» зыфиIорэ лъэпкъ про­ектым ипхырыщын пае аштэгъэ федеральнэ проектэу «Псы къабзэм» къыдыхэлъытагъэу Красногвардейскэ районымкIэ къуаджэу Улапэ ипсырыкIуапIэхэр агъэ­кIэжьыгъэх.

ПстэумкIи километрэ 11,5-рэ ар мэхъу. УФ-м псэолъэшIынымкIэ и Министерствэ епхыгъэ ГъэIорышIапIэу «РосСтройКонтроль» зыфиIорэм, ары IофшIэнхэр зэрэкIохэрэм лъыплъэрэр, ипресс-къулыкъу къызэритыгъэмкIэ, псырыкIуапIэхэр зэрэзэблахъугъэхэм ишIуагъэ­кIэ нэбгырэ минрэ ны­къорэмэ псы къабзэу ящыкIагъэр зэпыу фэмы­хъоу аIэкIэхьащт.

— ПIалъэхэм апэ мэзищкIэ итэу мы псыры­кIуапIэхэр гъэкIэжьыгъэ хъу­гъэх. Джы псэолъакIэм дэгъоу Iоф ешIэ, къоджэ­дэсхэм псыр икъоу аIэ­кIегъахьэ, — къыIуагъ Гъэ­Iо­рышIапIэм ипащэу Вла­димир Щербининым.

Ащ къызэрэхигъэщы­гъэмкIэ, псырыкIуапIэхэм зарагъэушъомбгъугъ. Проектым къыдыхэлъытагъэу урамипшIымэ ахэр ащызэблахъугъэх, псы къа­бзэм икъэтын фытегъэ­псыхьэгъэ оборудование зэфэшъхьафхэр зэрагъэуцорэ псынэу 58-рэ агъэ­псыгъ. «РосСтройКонт­ролым» испециалистхэр Iоф­шIэнхэр зэрэкIохэрэм лъыплъагъэх, дэх имыIэу проектым итыр зэкIэ гъэ­цэкIагъэ зэрэхъугъэр ахэм къыхагъэщыгъ.

Шъугу къэдгъэкIыжьын, мы къуаджэм псы къабзэр икъоу IэкIэгъэхьэгъэным фытегъэпсыхьэгъэ проектым изы Iахь 2021-рэ илъэсым гъэцэкIагъэ хъу­гъэ. Ащ къыдыхэлъытагъэу псыкъычIэщыпIэ кIэу аубырыугъ, башнери кIэу агъэуцугъ.