ГъэIорышIапIэу «ТНС энерго Кубань» зыфиIорэм илIы­кIо­хэр къалэу Армавир игурыт еджапIэу «Развитие» зыцIэм мы мафэхэм щыIагъэх, электричествэр щынэгъончъэу гъэфедэгъэным ишапхъэхэр кIэлэеджакIохэм къафаIотагъ.

ЕджэпIэ одыджыным изытет, щаир къызэрагъэ­жъорэ пкъыгъохэм, мобильнэ телефонхэм за­рядкэ зэраратырэм, нэмы­кIэу электричествэр зэрагъэфедэхэрэм шапхъэу апылъхэм зыIукIагъэхэр ащагъэгъозагъэх. Iофтхьабзэр урысые фестивалэу «Тызэгъусэу, нахь нэфы­нэу» зыфиIорэм къыды­хэлъытэгъагъ.

ДжэгукIэхэр, виктори­нэхэр, зэнэкъокъу зэфэшъхьафхэр къызфагъэфедэхэзэ, энергообъектхэм адэжь узэрэщызе­кIонэу щыт къэбархэр кIэлэцIыкIумэ алъагъэIэсыгъэх. Джащ фэдэу видеороликхэр, мультфильмэхэр лIыкIомэ къагъэ­лъэгъуагъэх, ахэмкIэ ягу­хэлъ пхыращыныр агъэ­псынкIагъ. Егъэджэнхэм якIэухым кIэлэцIыкIумэ сурэтхэр зытет плакатхэу энергетикэм епхыгъэхэр афагощыгъэх.

ГъэIорышIапIэу «ТНС энерго Кубань» зыфиIорэм мыщ фэдэ Iофтхьа­бзэр ятIонэрэу регъэ­кIо­кIы, ахэм Краснодар край­ри Адыгеири къызэлъаубыты. Пшъэ­рылъ шъхьа­Iэр электри­ческэ токым шъобжхэр кIэлэцIыкIумэ хамыхыныр ары.