ГуфэкIо фестивалэу «ШIуагъэ къэзытырэ программэр» зыфиIорэм къыдыхэлъытагъэу эко-гупчэу «Лаура» зыцIэм студент нэбгырэ 50 кIуагъэ, ахэр зэкIэ къалэу Шъачэ дэт апшъэрэ еджапIэхэмрэ техникумхэм­рэ ачIэсых, заповедникым IэпыIэгъу фэхъунхэр япшъэрылъ.

ГуфакIохэм ягупч ары зэхащакIоу Iофтхьабзэм фэхъугъэр, ар къалэу Шъа­чэ иадминистрацие ныбжьыкIэ политикэмкIэ и ГъэIорышIапI зыгъэпсы­гъагъэр. ГугъуемылIыныгъэ шэнхэр зыхэлъ ныбжьыкIэхэу къалэм дэт еджапIэхэм ащеджэхэрэр, бюджет ыкIи мысатыушI организациехэм ащыла­жьэхэрэр къыхагъэщых, IэпыIэгъу къызфагъэхъух.

Пшъэрылъ шъхьаIэу фо­румым иIэр къэлэ гуфа­кIохэм лъэныкъо зэфэ­шъхьафхэмкIэ, гущыIэм пае, экологиемкIэ, со­циальнэ IофыгъохэмкIэ, нэмыкIхэмкIэ зягъэушэтыгъэныр ары. «Къалэу Шъачэ къикIыгъэ студентхэр непэ эко-гупчэу «Лаурэм» къэкIуа­гъэх, IэпыIэгъу къытфэ­хъух, пкIашъэу чъыгмэ къапытэкъугъэхэр аугъои­жьых», — къеIуатэ Кавказ заповедникым экологие гъэсэныгъэмкIэ иIо­фышIэу Виктория Нестеренкэм.

Экологием фэгъэхьыгъэ къэбархэр гуфакIомэ къа­фаIотагъэх, заповедникыр зыфэдэм тарихъэу пы­лъым, зекIонхэм язэхэщэн ащагъэгъозагъэх. «Мыщ фэдэ Iофтхьабзэмэ бэрэ тахэлажьэу мэхъу, тэркIэ къинэп организациеу IэпыIэгъу зищыкIагъэхэм тишIуагъэ ядгъэкIыныр, ахэм нэIосакIэхэр къащытфэхъух, тишIэныгъи ащы­хэтэгъахъо», — къеIуатэ Шъачэ дэт профессиональнэ техникумым ия 3-рэ курс истуденткэу Евгения Сашинам.

Лекциемэ ауж студентхэр куп-купэу зэтыраутыгъэх, пшъэшъэжъыемэ пкIашъэхэр Iуахыгъэх, кIалэмэ яIоф нахь хьы­лъагъ — псынжъэу гъогу Iупэмэ ащызэтегъэуагъэм, хэкIхэм афэгъэзэгъагъэх.

«2019-рэ илъэсыр ары мы заповедникым апэу тызщыIагъэр, джыри мары тыкъэкIуагъэу тиамал къызэрихьэу тадэIэпыIэ», — къеIуатэ Шъачэ дэт профессиональнэ техникумым ипащэ иупчIэжьэгъоу Александра Коваленкэм.

Шъугу къэдгъэкIыжьын, Кавказ заповедникыр гуфакIохэм япрограммэ зыхэлажьэрэр илъэситф хъугъэ. ИкIыгъэ илъэсыр пштэмэ, мыщ гуфэкIо нэбгырэ 1000-м ехъу щыIагъ, мы илъэсми а пчъагъэм зэрэхэхъощтым уехъырэхъышэжьынэу щытэп.