АР-м и Къэралыгъо камернэ музыкальнэ театрэу Хьанэхъу Адам ыцIэ зыхьырэм имэфэкI чъэпыогъум хегъэунэфыкIы.

[caption id="attachment_140239" align="aligncenter" width="800"] Сурэтыр: Ю. Сулеймановым ихъарзынэщ.[/caption]

Театрэр 1993-рэ илъэсым зэхащагъ. Лъэпкъ искусствэр цIыф жъугъэхэм зэдырябаиныгъэу ыкIи зэрыгушхохэу зыщыщыт республикэм музыкальнэ театракIэ иIэ зэрэхъугъэр лъэп­къым итарихъкIэ мэхьанэшхо зиIэ Iофэу щыт.

Камернэ музыкальнэ театрэм имэфэкI ехъулIэу гущыIэгъу ты­фэхъугъ ащ ихудожественнэ пащэу, искусствоведениемкIэ кандидатэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс.

— Сыд фэдэ спектаклэ­кIэ шъуиIофшIэгъу лъэ­хъан ежъугъажьэра, Юныс?

— Титеатрэ я 30-рэ Iоф­шIэгъу лъэхъан ригъэжьагъ, композитор цIэрыIоу Андрей Семеновым ытхыгъэ «Фанфан, Тюльпан и Аделина» зыфиIорэ мюзиклэмкIэ ар къызэIутхыгъ.

Анахь спектаклэ гъэшIэгъонэу тиIэхэм ащыщэу, непэрэ шъошакIэм диштэу ар тэлъытэ.

— Сыда театрэм ипшъэ­рылъ шъхьаIэр?

— Театрэм упчIэхэм ­джэуап къаритыжьынэу щытэп. Ащ ипшъэрылъыр щыIэныгъэм уп­чIэу къыщытэ­джыхэрэр къы­хигъэщынышъ, цIыфхэр ахэм аригъэгупшысэн­хэр ары. Къэгъэлъэгъоным мэ­хьанэу иIэм уригъэгупшысэн, уиакъыл, уизэ­хашIэ къыгъэущын фае. Артист дэгъум ыл узызэ ироль къы­зэришIырэм фэдэу, ащ еплъынэу театрэм къэкIуагъэхэм ар зэхашIэн фае. АР-м и Къэ­ралыгъо камернэ музыкальнэ театрэ иактерхэм къа­гу­­рэIо Адыгеим ынапэхэу, куль­­ту­рэм, лъэпкъ шэн­хабзэхэм язе­­хьа­кIохэу, театрэр культурнэ кIэным итамыгъэу зэрэщытхэр.

Театрэм цIыфыр епIу, а гу­пшысэр зыпхырыщыгъэ спектаклэхэр тирепертуар мымакIэу хэтых. ШIулъэгъу мыгощым ехьылIэгъэ къэгъэлъэгъонхэр ти­Iэх. Тыкъэзыуцухьэрэ чIыо­псым идэхагъэ, цIыф зэфы­щытыкIэхэм афэгъэхьыгъэри ма­кIэп. Урыс пшысэхэм атехыгъэ спектаклэхэри тэгъэуцух. Комедиехэм къэбар щхэнхэр ащызэхэпхыщтых, цIыфхэм язекIокIэ гъэшIэгъонхэр щы­плъэгъущтых. Непэрэ щыIэ­кIэ-псэукIэм ахэр ябгъапшэхэзэ, зэфэхьысыжьхэр ошIых.

— Мы театрэр зикIасэхэм сыд фэдэ къэгъэлъэгъоныкIа афэжъугъэхьазырыгъэр?

— Иоганн Штраус иопереттэу «Летучая мышь» зыфиIорэр тэгъэхьазыры, шэкIогъум и 27-м апэрэу ар къэдгъэлъэгъощт. Фридрих Вильгельм Вайскерн ипроизведениеу«Бастьен ыкIи Бастьенна» Юрий Михельсон зэридзэкIыжьыгъ, композиторыр В. А. Моцарт. Адыгэ Республи­кэм изаслуженнэ артистэу Ар­кадий Хуснияровыр оркестрэм идирижер шъхьаI. КIэрэщэ Тем­бот ытхыгъэм техыгъэу «Ша­хъом­рэ пшъэшъэ пагэмрэ» зы­фиIорэ къэгъэлъэгъоныр сэ згъэуцугъ. Орэдышъоу спектаклэм щыIурэр зэлъашIэрэ композиторэу Тхьабысым Умарэ ыусыгъ. ШъошакIэм илъэу спектаклыр тэгъэхьазыры.

— Камернэ музыкальнэ театрэм Адыгэ Респуб­ликэм икультурэ сыд фэдэ чIыпIа щиубы­тырэр?

— Адыгеим икультурэ титеатрэ чIыпIэ гъэнэфагъэ щиу­бытыгъ. Анахь цIыкIухэм къащегъэжьагъэу анахьыжъхэм анэсэу тикъэгъэлъэгъонхэм зэплъынхэ ахагъотэщт. ЦIыфхэм тызэлъашIэ, тадэжь къэкIох, къытэплъыхэрэм тафэшъыпкъэу тэлажьэ.

— ШъуапэкIэ сыд фэдэ гухэлъа шъуиIэхэр?

— ЩыIэныгъэм къэуцу иIэп, мачъэ псым фэдэу. Тэри ащ детэгъаштэ, гастрольхэр редгъэ­кIокIынхэ фае. Мары Мые­къуапэ дэсыгъэ Евгений Шварц ипроизведениеу «Обыкновенное чудо» зыфиIорэм техыгъэ спектаклэ дгъэуцущт. Лъэпкъ искусствэр зилъапIэхэм апае проектэу «Театрэм цIыфхэр зэфещэх» зыфиIорэр дгъэцэ­кIэщт.

Театрэм пIуныгъэ мэхьанэу иIэм зэрэхэхъуагъэм, ар щыIэныгъэм зэрэщыщым, лIэшIэ­гъу­хэм ыкIи лIэужхэм язэпхыныгъэхэм зэрахэлажьэрэм щэч хэлъэп.

Лъэпшъыкъо Фатим.