Чъэпыогъу мазэм иящэнэ­рэ тхьаумафэ ясэнэхьат мэфэкI гъогу­хэм ыкIи лъэмыджхэм яшIын, яIыгъын зищыIэныгъэ езыпхыгъэу, ахэм ядэгъугъэ, ящынэгъон­чъагъэ зыIэ илъхэм. Фабэми, чъыIэми, къещхыми, къесыми гъогукIэхэр ахэм къытфашIых, илъэс псаум алъэплъэх, аIыгъых.

Мы хъызмэтым къыгъэшIа­гъэм инахьыбэр езытыгъэхэм, тиреспубликэ цIыкIу игъогухэр зэрэдахэхэм, шапхъэхэм адиштэу зэрэшIыгъэхэм зиIахь мымакIэу хэзылъхьагъэхэм ащыщ зигугъу къэтшIымэ тшIоигъор.

Атлъэскэр Заурбый илъэс 26-м ехъугъ гъогушIын хъыз­мэтым зыхэтыр. ЕтIани, а зы хъызмэтшIапIэр, Мыекъуапэ игъо­гушI организациеу «ДСУ-3-р» ары ащ фэдизым зыщылажьэрэр.

ГъогушIым тыда узщыIукIэщтыр? Къалэхэу Мыекъуапэрэ Шытхьалэрэ ягъунапкъэхэр зыщызэуалIэхэрэм дэжькIэ гъо­гур щагъэкIэжьыщтыгъ тызы­фытеом. Бригадэм иIофшIэн ыкубзыпIэм тыхэхьагъ. Заурбый грейдерым тесыгъ. Ар къэдгъэуцумэ тиягъэ зэредгъэ­кIыщтыр къыдэтлъыти, тизэдэгущыIэгъу кIыхьэ тшIыгъэп.

Заур, ары ащ зэреджэхэрэр, къалэу Санкт-Петербург къыщыхъугъ, ау ежь джыри цIы­кIугъэ янэ-ятэхэм Кощхьэблэ районым ит къуаджэу Фэдз къызащэжьым. Ащ щапIугъ, ау Мыекъуапэ щэпсэу. КъызэрэтфиIотагъэмкIэ, 1997-рэ илъэсым IофшIэпIэ чIыпIэ лъыхъузэ, а уахътэм ащ икъэгъотын псынкIагъэп, мы хъызмэтшIапIэм зыдахьэм цIыф ящыкIагъэу къы­чIэкIи, къыдэнэгъагъ.

ГъогушI къызэрыкIоу ригъэ­жьэгъагъ. Мы IофшIэным къинэу хэлъыр апэрэ мэфэ дэдэм зэхишIагъ, ау щыIэныгъэм шапхъэу къыгъэуцухэрэм адемыгъаштэмэ, упсэуныр зэрэкъиныр ыгукIэ зэрэзыдиIыгъым кIуачIэ къыритыгъагъ, охътабэ темышIэуи есэжьыгъ.

Бэрэ Iоф ымышIагъэу грейдерым тырагъэтIысхьагъ. Ащ пае Ростов хэкум икъалэу Каменск-Шахтинскэ гъогушI сэнэхьатхэм зыщафагъэсэхэрэ комбинатэу дэтым агъакIуи къыщеджагъ.

ГъогушIхэм яIофшIэн къызэ­рыкIоп. Пчэдыжьым жьэу ра­гъажьэшъ, мэзахэ охъуфэкIэ гъогум тетых. Гъэмэфэ уахътэм фэбэшхо зыхъукIэ тэ унэ чъы­Iэтагъэхэм защытэухъумэ, ежьхэр ащ хэтых.

— Арэущтэу щытми, сыкIэгъожьэу зыпарэкIи къыхэкIы­гъэп, — ыIуагъ Заурбый. — Илъэс 26-м ехъугъэу гъогум сытетышъ, сыд фэдэу къиными, сисэнэхьат зэблэсхъунэу, нэмыкI IофшIапIэ сыкIонэу сшъхьэ къихьагъэуи къэсшIэжьырэп. Сэщ нахь къин зылъэгъухэрэри бэу щыIэх, сиIофшIэгъуми ахэтых. Арышъ, сэ згъэцакIэрэр анахь къин сIон слъэкIыщтэп. Гъогоу Iоф зыщишIагъэм, ыгъэцэкIэжьыгъэм е кIэу ышIыгъэм ежь иавтомашинэкIэ рыкIоу бэрэ къыхэкIы. Асфальтыр зэшъозэщэу зытелъ гъогу щы­нэгъончъэ дахэм ишIын ежь иIахь зэрэхэлъым зэрэрыгу­шхорэм къыкIегъэтхъы. Иунагъо игъусэ зыхъукIэ, икIалэхэм «мары мы гъогу Iахьыр тэ тшIыгъэ» ариIоу бэрэ къыхэкIы.

ИIофшIэн шIу зэрилъэгъурэр, иIэшIагъэ ащ фэдэу зэрэрыгу­шхорэр арын фае ипшъашъэрэ ишъаорэ гъогушIыным ящыIэныгъэ рапхынэу зыкIырахъухьагъэр. Азидэ ятэ зыщылэжьэрэ «ДСУ-3-м» Iут, логист.

ИкIалэу Самир ятэ къыIотэрэ закъор армырэу, Iофэу ащ ышIэрэр мызэу, мытIоу зэригъэ­лъэгъугъ. Пчэдыжьым Iофы­шIэ къыдакIоу, мэфэ псаум грейдерым дытесэу бэрэ къыхэкIыгъ. Арышъ, къинэу Iофым хэлъым къымыгъащтэу къэкIощт илъэсым гурыт еджапIэр къызиу­хыкIэ, гъогушI сэнэхьатым фе­джэнэу гухэлъ зэришIы- гъэм зэ­рэрыкIэмыгъожьыщтыр нафэ.

— Сэ сызыхэт лъэныкъом зыфагъэзэнэу тIумэ язи згъэ­дэIуагъэп, ежьхэм ашIоигъоу къыхахыгъ, — еIо Заурбый. — Ау ащ епхыгъэ сэнэхьатым феджэнхэу заIоми, апэшIосыуIэягъэп. ЦIыфым ежь ыгу рихьэу, гухахъо зыхигъуатэрэр ары ышIэн фаер. ГъогушI сэнэхьатым сэнаущыгъэ горэ фысиIэми сэ сшIагъэп, ау уахътэу сызэрэрылажьэрэм джар къызэрэздэхъугъэр къызгури­гъэIуагъ.

Автомобиль гъогу дахэу, ищыкIэгъэ тамыгъэхэр зытетхэу, зыщыгъэтхъыгъэхэм е лъэс­рыкIо гъогу цIыкIоу зэшъозэщэу гъэчъыгъэм тарыкIо зыхъукIэ, ар зышIыгъэхэм тягупшысэу бэрэ къыхэкIырэп. Арэу щытми, ащ гъогушIхэм акIочIабэ зэрэ­хэлъыр нафэ. Арышъ, ахэм япрофессиональнэ мэфэкIкIэ тыгу къыддеIэу тафэгушIо, псауныгъэ пытэ яIэнэу, яунагъохэм мамыр арылъынэу, хахъо яIэнэу тафэлъаIо.

ХЪУТ Нэфсэт.

Сурэтхэр: А. Лаутеншлегер.