Федеральнэ проектэу «КIэлэцIыкIу пэпчъ игъэхъагъ» зыфиIорэм къыдыхэлъытагъэу я 6 — 11-рэ классхэм ащеджэхэрэм апае «Билет в буду­щее» зыфи­Iо­рэр зэхащэ.

Ащ хэлажьэхэрэм япчъагъэ зэрэхахъорэм дакIоу предприя­тие зэфэшъхьафхэм зэзэгъыныгъэу адашIырэр нахьыбэ мэхъу. Ащ къыдыхэлъытагъэу Адыгеим ис кIэлэеджэкIо 800 фэдизмэ предприятие зэфэ­шъхьафхэр къакIухьагъэх. ГущыIэм пае къуаджэу Пэнэжьыкъуае дэт гурыт еджапIэу N 1-м щеджэхэрэм якIэлэегъаджэу Тыгъужъ Рузанэ ягъусэу пшъэ­дэкIыжьэу ыхьырэмкIэ гъунэпкъэ гъэнэфагъэ зиIэ обществэу «Дортранссервис» зыфиIорэм щыIагъэх. Ащ иIофшIэн зэрэзэхищэрэр зэрагъэлъэгъугъ.

— ЫпэрапшIэу офис шъхьа­Iэм тырагъэблэгъагъ ыкIгъогухэр агъэцэкIэжьынхэмкIэ агъэфедэрэ Iэмэ-псымэхэр тагъэлъэгъугъэх. Мыщ Iоф щызышIэхэрэм къинэу алъэгъурэр, пшъэдэкIыжь ин зэрахьырэр нэрылъэгъу тфэхъугъ, — еIо я 10-рэ классым щеджэрэ ЯхъулIэ Заур.

Красногвардейскэ районым ит гимназиеу N 1-м икIэлэ­еджа­кIохэр пшъэдэкIыжьэу ыхьы­рэмкIэ гъунэпкъэ гъэнэфагъэ зиIэ обществэу «ЮгАгроПродукт» зыфиIорэм щыIагъэх.

— Заводым иIофшIэн зэрэзэхищэрэр къытагъэлъэгъугъ, дагъэр зэрашIырэр нэрылъэгъу тфэхъугъ, тшIогъэшIэгъонэу зэ­кIэ къэтплъыхьагъ. Программэу «Билет в будущее» зыфиIорэм ишIуагъэкIэ предприятиехэр къэтэкIухьэх, сэнэхьат зэфэ­шъхьафхэр зэтэгъашIэх, тэу­шэ­тых, — къыIуагъ я 10-рэ клас­сым ис Кирилл Мироновым. Тэхъутэмыкъое районым ис кIэлэеджакIохэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «ДомБытХим» зыфиIорэм щыIагъэх.

АдыгеякIэм дэт гурыт еджапIэу N 19-м ия 8«А»-рэ класс щеджэрэ Тыгъужъ Роман къызэриIуагъэмкIэ, заводым щымыIэфэ предметэу химиер ыгу рихьыщтыгъэп, ау къарагъэ­лъэгъугъэм ишIуагъэкIэ джы ар нахь игъэкIотыгъэу зэригъэшIэ­нэу пшъэрылъ зыфигъэуцу­жьыгъ. Проектым ишIуагъэкIэ кIэлэеджакIохэм шIэныгъакIэхэр зэрагъэгъотых, ахэр ящыIэныгъэ къащышъхьапэжьыщтых.

АР-м гъэсэныгъэ тедзэмкIэ и Гупч.

Сурэтхэр: АР-м гъэсэныгъэ тедзэмкIэ и Гупч.