КIэщакIо зыфэхъугъэхэм къадырагъэштагъ
Урысыем и Къыблэ шъолъыр ипарламентхэм я Ассоциацие ия XXXIX-рэ конференцие Астраханскэ хэкум и Думэ зэхищэгъагъ.
Илъэсэу тызыхэтым мы Iофтхьабзэр Адыгеим зыщэкIом Ассоциацием и Тхьамэтэ пшъэрылъымрэ ибыракърэ мы шъолъырым ихэбзэихъухьэ къулыкъу ипащэу Игорь Мартыновыр ары зэратыжьыгъагъэр.
Адыгеим илIыкIохэу Конференцием хэлэжьагъэх Къэралыгъо Совет — Хасэм и Тхьаматэу Владимир Нарожнэр, ащ игуадзэу Цэй Эдуард, депутатхэу Шэуджэн Сэфэр, Мыгу Адам ыкIи Наталья Широковар.
Зэрэхабзэу ыпэрапшIэ Ассоциацием икомитетхэм зэхэсыгъохэр яIагъэх. Шъхьадж зыфэгъэзэгъэ лъэныкъом елъытыгъэу шъолъырхэм яхэбзэихъухьэ къулыкъухэр кIэщакIо зыфэхъугъэ джэпсалъэхэм, законопроектхэм ахэм ащытегущыIагъэх.
Ащ дакIоу дзэкIолIхэр щыIэныгъэм социальнэу хэгъэгъозэжьыгъэнхэмкIэ, ветеранхэм яIофхэмкIэ ыкIи патриотическэ пIуныгъэмкIэ Комиссием иIофшIэн епхыгъэ джэпсалъэхэм атегущыIагъэх. Мы Комиссием хэт АР-м и Къэралыгъо Совет — Хасэм хэбзэихъухьанымкIэ и Комитет ипащэ игуадзэу Мыгу Адам. ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм IэпыIэгъоу аратырэм фэгъэхьыгъэ законыр гъэкIэжьыгъэныр ары анахьэу зигугъу ашIыгъэр. Социальнэ IэпыIэгъу зэратыхэрэм зэзэгъыныгъэкIэ къулыкъу зыхьыхэрэр, УФ-м и УIэшыгъэ КIуачIэхэм пшъэрылъэу яIэхэм ягъэцэкIэн хэлажьэхэрэр, Урысыем и Лъэпкъ гвардие хэтхэм ыкIи ахэм яунагъохэр ахэгъэхьэгъэнхэ фаеу Комиссием хэтхэм зэдаштагъ.
Нэужым Урысыем и Къыблэ шъолъыр ипарламентхэм я Ассоциацие и Совет зэхэсыгъо иIагъ. Комитетхэм къагъэхьазырыгъэ повесткэм ащ щытегущыIагъэх, Iофыгъоу щыгъэнэфагъэхэм адырагъэштагъ.
Урысыем и Къыблэ шъолъыр ихэбзэихъухьэ къулыкъухэр кIэщакIо афэхъугъэхэу джэпсэлъэ ыкIи законопроект 60-мэ пленарнэ зэхэсыгъом щатегущыIагъэх. Ахэм ащыщыбэхэр хэушъхьафыкIыгъэ дзэ операцием хэлажьэхэрэм, ахэм яунагъохэм къэралыгъо ыкIи шъолъыр IэпыIэгъоу афакIорэм, никотин зыхэлъ псышъохэр IуагъэкIынхэ фимытыжьхэ шIыгъэным, хьафизэхэр щыIэныгъэм хэгъэгъозэгъэнхэм пае ящыкIэгъэ пкъыгъохэр аIэкIэгъэхьэгъэнхэм, цIыфым апэрэ медицинэ IэпыIэгъу егъэгъотыгъэнымкIэ системэм зегъэушъомбгъугъэным, псэупIэ цIыкIухэм е район гупчэхэм апэчыжьэхэм ащыпсэухэрэм Iэзэгъу уцхэр икъоу аIэкIэгъэхьэгъэнхэм, нэмыкIхэм афэгъэхьыгъэу партиеу «Единэ Россием» и Лъэпкъ программэ къыдыхэлъытагъэхэм япхыгъэх.
АР-м и Къэралыгъо Совет — Хасэм идепутатхэр кIэщакIо зыфэхъугъэхэ джэпсэлъиплIыми атегущыIагъэх. Сэкъатныгъэ зиIэхэм афэгъэхьыгъэ хэбзэгъэуцугъэм къыдыхэлъытагъэу къэбзэныгъэм фытегъэпсыхьэгъэ пкъыгъоу ыпкIэ хэмылъэу къаратыхэрэм яшапхъэ нахьыбэ шIыгъэным зыр фэгъэхьыгъ. Депутатхэм цIыфхэр зырагъэблагъэхэкIэ гумэкIыгъоу къырахьылIэхэрэм ар зэу ащыщ.
Уц шIоеу, хьацIэ-пIацIэу цIыфхэм ыкIи лэжьыгъэхэм зиягъэ языгъэкIыхэрэм апэшIуекIорэ Iофтхьабзэхэр зымыгъэцакIэхэрэм, мэз сатырхэм зэрар къафэзыхьыхэрэм, зыгъэкIодыхэрэм, мэкъумэщ хъызмэтым ичIыгухэр къэухъумэгъэнхэм, язытет нахьышIу шIыгъэным афытегъэпсыхьэгъэ шэпхъэ гъэнэфагъэхэр Iэпэдэлэл зышIыхэрэм тазырэу атыралъхьэрэр нахьыбэ шIыгъэным фэгъэхьыгъ ятIонэрэ Iофыгъор.
Бизнес цIыкIум ыкIи гурытым IэпыIэгъу ятыгъэным фэгъэхьыгъэм «иправовой базэ» бэрэ зэрэзэхъокIырэм фэшI предпринимательхэм къэралыгъо IэпыIэгъур къызIэкIагъэхьан зэрамылъэкIырэр къыщыхэгъэщыгъ. Хэбзэгъэуцугъэм хэплъэжьынхэшъ, гъэтэрэзыжьынхэр фашIынхэу тидепутатхэр кIэлъэIух.
Джащ фэдэу Адыгеим идепутатхэр кIэщакIо зыфэхъугъэ законопроектитIу повесткэм хэтыгъ. Ахэм язырэр хьылъэзещэ автомашинэшхохэм афэгъэхьыгъ. Ахэм ащыщыбэхэм шапхъэхэм ашIокIэу зэрэзэращэрэм къыхэкIэу гъогум яягъэ рагъэкIы, гъогурыкIоныр щынагъо къашIы. Ахэм нахь пхъашэу алъыплъэгъэн фаеу тидепутатхэм алъытэ. ЯтIонэрэ проектыр мэкъумэщ хъызмэтым изегъэушъомбгъун ыкIи хэгъэгур гъомылапхъэ щымыкIэным зиIахь мымакIэу хэзылъхьэрэ хъызмэтшIапIэхэм гъэстыныпхъэу ящыкIагъэр икъоу аIэкIэгъэхьэгъэным фытегъэпсыхьагъ.
Адыгеим и Парламент кIэщакIо зыфэхъугъэхэм зэкIэми къадырагъэштагъ.
Къыблэ ыкIи Темыр Кавказ федеральнэ шъолъырхэм зекIоным зыщягъэушъомбгъугъэным епхыгъэ Iофхэми Пленарнэ зэхэсыгъом щатегущыIагъэх. Адыгеим и Парламент идепутатхэр мы лъэныкъомкIэ хэбзэихъухьан опытэу яIэмкIэ адэгощагъэх, республикэм зекIонымкIэ иотраслэ хэхъоныгъэу ышIыхэрэр къафаIотагъ.
— Адыгеир зекIоным зыщиушъомбгъуным тегъэпсыхьагъэу щыт. Къушъхьэ ыкIи къушъхьэ лъэпсэ чIыпIэхэм инфраструктурэр ащыгъэпсыгъэным пае проект зэфэшъхьафхэр чанэу егъэфедэх. Нахьыбэу мы лъэныкъом инвестициехэр къыхэлъхьэгъэнхэм республикэм ипащэхэм лъэшэу Iоф дашIэ. ГущыIэм пае, мы уахътэм экокуротэу «Лэгъонакъэ» ипроектышхо Адыгеим щыпхыращы. Аужырэ илъэсищым республикэм зекIоу къихьэрэр миллионныкъом къыщыкIэрэп. Ащ Iофышхоу пащэхэм ашIэрэр къеушыхьаты, — къыIуагъ АР-м и Къэралыгъо Совет — Хасэм и Тхьаматэу Владимир Нарожнэр зэхэсыгъом къызыщэгущыIэм.
Урысыем и Къыблэ шъолъыр парламентхэм я Ассоциацие 2001-рэ илъэсэу зызэхащагъэм къыщегъэжьагъэу ащ хахьэ АР-м и Къэралыгъо Совет – Хасэ. Илъэс 20-м ехъум хэбзэгъэуцугъэхэм афэшIыгъэн фэе гъэтэрэзыжьынэу е федеральнэ къэралыгъо хэбзэ къулыкъухэм афэгъэзэгъэ джэпсалъэу 128-мэ тидепутатхэр кIэщакIо афэхъугъэх. Ахэм ащыщыбэхэр федеральнэ хэбзэгъэуцугъэхэм лъапсэ афэхъугъэх.
Зыгъэхьазырыгъэр Хъут Нэфсэт. Сурэтхэр: АР-м и Парламент.