КIэлэегъэджэ сэнэхьатыр пшъэдэкIыжь ин зыпылъхэм ыкIи мэхьанэшхо зиIэхэм ащыщ. ЛIэужыкIэм ипIун-егъэджэн республикэми, хэгъэгуми янеущырэ мафэ ар ылъапс.

КIэлэегъэджэ IэпэIасэхэр яшIэныгъэ­хэмкIэ кIэлэеджакIохэм зэрадэгуащэхэрэм имызакъоу, ахэр щыIэныгъэми фагъасэх. ШIэныгъэм идунай хащэхэзэ, ахэр тэрэзэу гупшысэнхэу, яцыхьэ зытелъыжьынэу агъасэх.

Хьатыгъужъыкъое гурыт еджапIэу Хьаткъо Ахьмэд ыцIэ зыхьырэм икIэлэ­егъаджэхэу Едыдж Нуретрэ Хьамхъокъо Разыетрэ ныбжьыкIэхэм гъэсэныгъэ дэгъу ягъэгъотыгъэным, яхэгъэгу шIу алъэгъоу, цIыфыгъэ ахэлъэу пIугъэнхэм кIуачIэу яIэр рахьылIэ. Я 9-рэ классым исхэр ахэм рагъаджэх. КIэлэеджакIохэм азыныкъо нахьыбэр я 9-рэ классым ыуж еджапIэм къычIэкIынхэу агъэнафэ.

Мы лъэхъаным ищыкIэгъэ сэнэхьат­хэм кIэлэеджакIохэр нэIуасэ афэхъун­хэм фэшI Нуретрэ Разыетрэ проект гъэшIэгъонэу «Сэнэхьатым икъыхэ­хын» зыфиIорэм кIэщакIо фэхъугъэх.

— НыбжьыкIэхэм япIун пшъэрылъ шъхьаIэу тиI. Ахэм еджапIэр къызаухыкIэ сэнэхьат тэрэз къыхахыным фэшI тадеIэн фае — еIо Едыдж Нурет. — Непэ анахь мэхьанэшхо зиIэ сэнэхьатхэм кIэлэеджакIохэр ыкIи апшъэрэ гъэсэ­ныгъэ зэзыгъэгъотыщт ныбжьыкIэхэр ащыгъуазэхэ зыхъукIэ, ялъагъо къыхахынымкIэ IэпыIэгъу къафэхъущт. Проектым ны-тыхэри къыхэлэжьэнхэ алъэкIыщт.

— Къэралыгъор зыщыкIэрэ специалистхэм зэблэхъугъэ фэхъу зэпыт, — лъегъэкIуатэ гущыIэр Хьамхъокъо Разыет. — Узэсэгъэ IофшIэным уимыгъэразэу, ащ ычIыпIэ сэнэхьатыкIэм уфе­джэн фаеу къыхэкIы. IофшIэпIэ чIыпIэ ямыIэу къэмынэнхэм фэшI гъэсэныгъэ тедзэ зэзгъэгъотыхэрэри щыIэх. Мыщ нафэ къешIы сэнэхьатэу къыхэпхырэм уегупшысэн зэрэфаер. Ащ елъытыгъ цIыфым щыIэныгъэм чIыпIэу щиубытыщтыр.

— Проектым игъэхьазырын зетэгъа­жьэм, — къеIуатэ Нурет, — дунэе хъытыум ышIыгъэ тренинг ушэтынхэр зэдгъэпшагъэх. 2024-рэ илъэсым анахьэу уасэ зиIэщтхэу дгъэунэфыгъэхэр мене­дж­ментымкIэ упчIэжьэгъу, маркетингымкIэ ыкIи щэнымкIэ специалист, дизайнер, физиотерапевт ыкIи медицинэм иIофышI, аудитор, бухгалтер, цIыфхэм (щэфа­кIохэм) Iоф адэзышIэщт менеджер, агроном, кIэлэегъадж, тренер, репетитор, инженерхэр, программист, тракторист- комбайнерхэр, ветеринар врач. Мы сэнэхьатхэм афэгъэхьыгъэ лъэтегъэуцо гъэшIэгъонхэр зэхэтэщэх, зэдэгущыIэгъухэр ретэгъэкIокIых.

— «Неущырэ мафэм ибилет» зыфиIорэ Iэнэ хъураер Iоныгъо мазэм редгъэкIокIыгъ, — тыщегъэгъуазэ Разыет. — Сэнэхьатхэм нэIуасэ зыфашIын ыкIи заушэтын амал кIэлэеджакIохэм яIагъ. Зэфэхьысыжьхэм лъэшэу тагъэ­рэзагъ, илъэс еджэгъум ыкIэм ащ джыри къыфэдгъэзэжьыщт.

Хьатыгъужъыкъое гурыт еджапIэм икIэлэегъаджэхэм Iофыгъошхо ашIэ. «Неущырэ мафэм ибилет» къыхэзы­хыщт кIэлэ­еджакIохэм IэпыIэгъу фэхъух. НыбжьыкIэм неущ исэнэхьатыщтыр къыхихыгъахэу, ащ рылэжьэшъунэу ышIо­шъ ­хъу­гъапэми, лъэныкъохэр зэкIэ къыди­мылъы­тэгъэнхэ ылъэ­кIыщт. Джащ пае ахэм яшIуагъэ арагъэ­кIы, яшIэныгъэ зэрэ­хагъэ­хъон фаер проектымкIэ агурагъаIо.

Лъэпшъыкъо Фатим. Сурэтхэр проектым хэлажьэхэрэм яхъарзынэщ.