ЗэлъашIэрэ адыгэ тхакIоу, усакIоу Жэнэ Къырымызэ чъэпыогъум и 4-м къуаджэу Афыпсыпэ мыжъобгъу къыщыфызэIуахыгъ.

Жэнэ Къырымызэ адыгэ советскэ прозаик ыкIи усакIу. РСФСР-м культурэмкIэ изаслуженнэ IофышI. Гъэтхапэм и 7-м, 1919-рэ илъэсым къуаджэу Афыпсыпэ къыщыхъугъ. 1938-рэ илъэсым Адыгэ педучилищыр, 1957-м — Адыгэ къэралыгъо кIэлэегъэджэ институтыр къыухыгъэх. 1957 — 1959-рэ илъэсхэм Апшъэрэ литературнэ курсхэу М. Горькэм ыцIэ зыхьырэ Литературнэ институтым щызэхэщагъэхэм ащеджагъ.

Жэнэ Къырымызэ Хэгъэгу зэошхом иветеран, тын лъапIэхэр бэу иIагъэх. 1965-рэ илъэсым щегъэжьагъэу ар Адыгэ хэку комитетымкIэ мамырны­гъэр къэухъумэгъэным итхьамэ­тагъ. 1973-рэ илъэсым къыщы­убла­гъэу РСФСР-м итхакIохэм я Союз и Адыгэ къутамэ пшъэ­дэкIыжь зыхьырэ исекретарыгъ.

Жэнэ Къырымызэ — поэтическэ сборник 30-м нахьыбэм яавтор. Ащ итхыгъэ произведениехэм ащыщхэр нэмыкIыбзэкIэ зэрадзэкIыгъэх. Адыгэ литературэм иегъэджэн программэ ав­торым ипроизведениехэм ащыщхэр бэу хагъэхьагъэх. Лите­ратурэм ыкIи искусствэм алъэныкъокIэ усакIом иIэ гъэхъа­гъэ­хэм щытхъуцIэ лъапIэу «РСФСР-м культурэмкIэ изаслуженнэ IофышI» зыфиIорэр къа­кIэкIуагъ.

Мамырныгъэр, зэкъошныгъэр, лъэпкъхэм языкIыныгъэ, якультурэ ыкIи цIыф зэфыщытыкIэхэр Жэнэ Къырымызэ итхыгъэхэм лейтмотивэу апхырэкIы. Игеройхэм ящыIэныгъэ зэфэдэкIэ цIыфыгъэ хэбзэ мыукъожьыр, шIулъэгъур, лъэпкъ шэн-хэбзэшIухэр аухъумэу, чIыгу гупсэр ыкIи Хэгъэгур апсэ зэрэфагъа­дэрэр ащыкIэгъэтхъыгъ. Жэнэ Къырымызэ адыгэ литературэ ныбжьыкIэм, кIэлэцIыкIу литературэм лъапсэ агъотынымкIэ ыкIи ахэхъонымкIэ Iофышхо ышIагъ.

АР-м и Мафэ тефэу Тэхъутэмыкъое районым усакIом мы­жъобгъу къыщыфызэIухыгъэным фэгъэхьыгъэ Iофтхьабзэм хэлэжьагъэх районым идепутатхэм янароднэ Совет ипащэ игуадзэу Хьатит Алый, ветеранхэм я Совет районымкIэ итхьаматэу Бекух Нэфсэт, Афыпсыпэ къоджэ псэупIэм ипащэу ШIуцIэ Казбек, мы чIыпIэ псэупIэм идепутатхэр, тхакIом иIахьылхэр, нэмыкIхэри. Iофтхьабзэм ыкIэм ащ хэлэжьагъэхэм къэгъагъэхэр мыжъобгъум кIэралъхьагъэх.

(Тикорр.).