Адыгэ Республикэм урыс лъэпкъ Iэмэ-псымэхэмкIэ и Къэралыгъо оркестрэу «Русская удаль» зыфиIоу А.В. Шипитько ыцIэкIэ щытыр зызэхащагъэр илъэс 30 хъугъэ.

Чъэпыогъум и 2-м, 1993-рэ илъэсым Адыгэ Республикэм культурэмкIэ и Министерствэ иунашъокIэ оркестрэу «Русская удаль» зыфиIорэр зэхащагъ. Илъэс 30 хъурэ гъогу купым къыкIугъ. АР-м инароднэ арти­стэу Андрей Ефименкэр орке­стрэ цIэрыIом идирижер шъхьаI ыкIи ихудожественнэ пащ.

Ащ «Адыгэ макъэр» гущы­Iэгъу фэ­хъугъ.

— Илъэс 30 зикIыхьэгъэ гъогум изэфэхьысыжь къытфэшIыба.

— Анахьэу къыхэзгъэщымэ сшIои­гъор музыкальнэ искусствэр лъэпкъ фольклорым зэригъэбаирэр ары. Титворческэ куп илъэс 30 хъурэ гъогу гъэшIэ­гъон къыкIугъ. IофшIэныр дэгъоу зэрэдгъэцакIэрэм ишIуагъэкIэ титворчестви хэпшIыкIэу хэхъо. Репертуарыр ныбжьыкIэхэми нахьыжъхэми агу рихьынэу тэгъэпсы.

— Лъэпкъ музыкальнэ искусствэр зикIасэхэм сыд афэ­жъугъэхьазырыгъэр?

— Урысыем ыкIи IэкIыбым якомпозитор цIэрыIомэ атхыгъэ пьесэхэр агъэуцугъэх. Ахэм ащыщых Кучеренкэм иеу «Наигрыши», В Коновым ытхыгъэу «Распотешься, народ», урыс лъэпкъ орэдхэу «Двор, широк двор», «Гармонь моя», «Как за Доном» зыфиIохэрэр ыкIи нэмыкIхэри. «Русское гулянье» зыфиIорэм театральнэ къэгъэлъэгъонри тимэфэкI къекIуа­лIэхэрэм ядгъэлъэ­гъущт. Тызэрыгушхорэ адыгэ мэкъамэхэр тиIэх. Ащ нэмыкIэу адыгэмэ аусыщтыгъэ орэдхэр непэрэ лъэхъаным диштэу зэхэтхынхэм фэшI Цэй Любэ ытхыгъэ «Фантазия на адыгские мелодии» зыцIэр зэхахьэм къыщыIущт. Нахь ныбжьыкIэм щегъэжьагъэу, нахьы­жъы­Iомэ анэсэу шъхьадж ыгу нэсырэ мэкъамэхэр тикъэ­гъэ­лъэгъон хигъотэщт. Оркестрэм къыригъэIорэ адыгэ лъэпкъ произведениехэр Москва, Темыр Кавказым, нэмыкI чIыпIэхэм ащэIух.

— Адыгэ Республикэм икультурэ сыд фэдэ чIыпIа щиубытырэр урыс лъэпкъ Iэмэ-псымэхэмкIэ Къэралыгъо оркестрэу «Русская удаль» зыфиIорэм?

— Оркестрэм Адыгеим икультурэ чIыпIэ гъэнэфагъэ щиубытыгъ, мэфэкIхэм тахэлажьэ, ти­къэгъэлъэгъонхэр цIыфхэм агу зэрэрихьыщтым тыпылъ.

— Сыд фэдэ пшъэрылъа зыфэжъугъэуцужьыхэрэр?

— ЛъэгэпIэ инхэм танэсыныр пшъэ­рылъ шъхьаI. ТапэкIэ хэхъо­ныгъэ тшIыным, концертэу къэт­тыхэрэм япчъагъэ нахьыбэ хъу­ным, къытэплъырэ цIыфхэр дгъэгушIонхэм тынаIэ тедгъэ­тыщт. Адыгеим ыцIэ дахэкIэ рядгъэIуным тыпы­лъыщт, — хигъэ­унэфыкIыгъ художественнэ пащэм.

«Русская удаль» зыфиIорэм чъэпыогъум и 27-м концерт Мыекъуапэ къыщитыщт. Пчыхьэзэхахьэм урыс лъэпкъ орэдхэр, шъошакIэм илъ адыгэ мэкъа­мэхэр щыIущтых. Лъэпкъ мэкъа­мэхэр жъы зэрэмыхъухэрэр зэхахьэм къыщагъэлъэгъощт, музыкальнэ искусствэр зикIасэхэм ар ашIогъэшIэгъоныщт.

Лъэпшъыкъо Фатим. Сурэтыр авторым ий.