Чъэпыогъум и 12-м урыс культурэм и  Мафэ фэгъэхьыгъэ мэфэкI Iофтхьабзэхэр Пушкиным и Унэу Мыекъуапэ дэтым щыкIуагъэх.

Ахэм ахэлэжьагъэх Темыр Кавказ федеральнэ шъолъырымрэ Къыблэ федеральнэ шъолъырымрэ ясубъектхэм ягъэцэкIэкIо хабзэ икъулыкъу­хэм ялIыкIохэр. Зэхахьэм ипрограммэ хэтыгъэх урыс лъэпкъ IэпэщысэхэмкIэ IофшIагъэхэм якъэгъэлъэгъон, урыс шхыныгъохэм яуплъэкIун, мэфэкI концертыр ыкIи Iэнэ хъураеу «Лъэпкъ хабзэхэр — урыс куль­турэм ибаиныгъ» зыфиIорэр.

Адыгэ Республикэм лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр мэфэкIыр къызэIуихыгъ, Iофтхьабзэм къекIолIагъэхэм Адыгеим и ЛIышъхьэу КъумпIыл Мурат ыцIэкIэ къафэгушIуагъ. Ащ ыуж Ставрополь щызэхэщэгъэ краевой общественнэ организациеу «Культурнэ гупчэу «Адыгэхэр» зыфиIорэм итхьаматэу Шыбзыхъу Юрэ гущыIэр зыратым, мэфэкIым мэхьэнэ ин зэриIэр къыхигъэщыгъ.

«Непэрэ мафэр зыфэгъэхьыгъэр урыс культурэм имэхьанэ изыкъегъэIэтын, лъэпкъ проектэу «Лъэпкъ хабзэхэр — урыс культурэм ибаиныгъ» зыфиIорэм зегъэушъомбгъугъэныр ыкIи лъэпкъ Iэпэщысэхэм яшIын пылъхэм IэпыIэгъу афэхъугъэныр ары, — хигъэунэфыкIыгъ Шъхьэлэхъо Аскэр. — Мыгъэ апэрэу урыс культурэм и Мафэ зэкIэ районхэм хагъэунэфы­кIыгъ. Iофтхьабзэм къедгъэблэгъагъэх Темыр Кавказ федеральнэ шъолъырымрэ Къыблэ федеральнэ шъолъырымрэ ясубъектхэм ягъэцэкIэкIо хабзэ икъулыкъухэм ялIыкIохэр. Чъэпыогъум и 26 — 27-м адыгэ культурэм и Мафэ хэ­д­гъэунэфыкIыщт, чIыпIэ зэфэ­шъхьафхэм къарыкIыщт хьа­кIэхэр ащ хэдгъэлэжьэщтых. Мы мафэхэр зэрэдгъэмэфэкIхэрэм къыгъэлъагъорэр Адыгеим зэгурыIоныгъэ зэрилъыр, ­лъэпкъ зэфэшъхьафэу мыщ щыпсэу-хэ­рэм шъхьэкIэфэныгъэ зэра­фэтшIырэр ары».

Iэнэ хъураем лъэпкъ зэхэтыкIэхэм япхыгъэ Iофыгъохэм тащытегущыIэщт. Ащ къедгъэ­блэгъагъэх гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм ишIэныгъэлэжьэу, педагогикэ шIэныгъэхэмкIэ кан­дидатэу Галина Луганскаяр, АКъУ-м ипрофессорэу Алла Со­коловар, «Союз славян ­Адыгеи» зыфиIорэ общественнэ организацием итхьаматэу Нина Коноваловар, Адыгеим культурэмкIэ иминистрэ игуадзэу Ольга Гавшинар.

Ермэлыкъым къекIолIэгъэ IэпэIасэу Николай Агошковым, Ставрополь къикIыгъэм, гущы­Iэгъу тыфэхъугъ: «Пхъэм хэ­шIыкIыгъэ Iэпэщысэхэр непэрэ мэфэкIым къэсщагъэх. Мыщ фэдэ зэхахьэхэм сигуапэу са­хэлажьэ, нэмыкI IэпэIасэхэм яIэпэщысэхэм нэIуасэ сафэхъу, кIэ горэ къахэсэхы. Унагъом ищыкIэгъэ хьакъу-шыкъухэу, фэшъхьафхэу къэгъэлъэгъоным къэсщагъэхэр цIыфхэм зэрашIогъэшIэгъоныр лъэшэу сигуапэ хъугъэ», — къыIуагъ Николай.

МэфэкI зэхахьэм ипшъэрылъ ыгъэцэкIагъ. Зэдэпсэурэ лъэпкъ­хэр нахьышIоу зэрэшIэнхэм пае мыщ фэдэ мэфэкIхэр редгъэ­кIокIынхэ фае. Джащыгъум лъэпкъхэм лъытэныгъэу зэфа­шIырэм зыкъиIэтыщт.

Лъэпшъыкъо Фатим