Адыгэ къэралыгъо университетым непэ апэрэ республикэ зэнэкъокъоу «Социальнэ кIэлэегъэджэ-гъэсэкIо анахь дэгъу» зыфиIорэр щыкIуагъ.

[caption id="attachment_140154" align="aligncenter" width="800"] АКъУ.[/caption]

Программэу «Патриот 2030» зыфиIорэм къыдыхэлъытагъэу ар мы апшъэрэ еджапIэмрэ АР-м гъэсэныгъэмрэ шIэны­гъэмрэкIэ и Министерствэрэ зэхащагъ.

Iофтхьабзэр къызэIуихыгъ АР-м гъэсэныгъэмрэ шIэны­гъэмрэкIэ иминистрэ игуадзэу Артем Журавель. Социальнэ кIэлэегъэджэ-гъэсакIом пшъэ­дэкIыжь ин зэрихьырэр, иIоф­шIэн зэрэкъиныр ащ игущыIэ къыщыхигъэщыгъ.

— ЩыIэныгъэм чIыпIэ къин ригъэуцогъэ сабыйхэм Iоф адэ­пшIэныр IэшIэхэп, ахэр ­гъогу занкIэ тещэгъэнхэмкIэ пшъэ­рылъ ин шъогъэцакIэ. Зыщи­щыкIагъэм ахэм шъуяушъыи, IэпыIэгъу яшъогъэкIы. Мыщ фэдэ зэнэкъокъу щыIэ зэрэ­хъугъэм мэхьанэшхо иI, ар илъэс къэс зэхэтщэн фае. Ащ ишIуагъэкIэ социальнэ кIэлэ­егъэджэ-гъэсакIом уасэу фа­шIырэм нахь зыкъыIэтыщт, мы сэнэхьатыр зэзыгъэгъотырэр нахьыбэ хъущт. Зэнэкъокъум шъузэрэхэлажьэрэм шъуишIэныгъэхэм ахигъэхъощт, нэмыкI­хэм Iоф зэрашIэрэр нэрылъэгъу къышъуфэхъущт, джыри нахь дэгъоу шъуиIофшIэн жъугъэцэкIэщт, — къыIуагъ ащ.

Гъэсэныгъэм иучреждениехэм Iоф ащызышIэрэ социальнэ кIэлэегъэджэ-гъэсакIохэм яшIэныгъэхэм ахэгъэхъогъэныр, ахэм яIофшIэн имэхьанэ къэIэтыгъэныр, анахь дэгъухэр къы­хэгъэщыгъэнхэр, гъэшIогъэнхэр ары пшъэрылъ шъхьаIэу зэхэщакIохэм зыфагъэуцужьыгъэр.

Уцугъуищэу гощыгъэу зэнэ­къокъур кIуагъэ. Апэрэм нэбгырэ 27-мэ зыкъыщагъэлъэ­гъуагъ, ахэм ащыщэу анахь дэгъуи 7-р аужырэ уцугъом ­хэлэжьагъэх. КIэлэеджакIохэм Iоф адашIэнымкIэ нахь агъэфедэрэ шIыкIэхэр ыпэрапшIэу социальнэ кIэлэегъэджэ-гъэсакIохэм къагъэлъэгъуагъ, нэ­ужым осэшIхэм яупчIэхэм джэуапхэр аратыжьыгъэх. Анахь дэгъоу зыкъэзыгъэлъэгъогъэ нэбгыри 3-р аужырэ уцугъом щызэнэкъокъугъэх.

Апэрэ чIыпIэр дэеу зэхэзы­хырэ ыкIи зымылъэгъухэрэ кIэ­лэцIыкIухэр зычIэс Адыгэ республикэ еджэпIэ-интернатым икIэлэегъаджэу Валентина Гридинам къыдихыгъ, ятIонэрэ хъугъэ Мыекъуапэ дэт медицинэ ыкIи социальнэ IэпыIэгъумкIэ психолого-педагогическэ Гупчэм щылэжьэрэ Валерий Романенкэр, Кощхьэблэ районым ит гурыт еджапIэу N 11-м Iоф щызышIэрэ Хьамырзэ Лидие ящэнэрэ чIыпIэр ыубытыгъ.

Валентина Гридинам Адыгэ къэралыгъо университетым со­циальнэ педагогикэмкIэ ифакультет къыухыгъ, 2018-рэ илъэ­сым къыщегъэжьагъэу социальнэ кIэлэегъэджэ-гъэсакIоу Iоф ешIэ. Ащ ыпэкIэ нэмыкI лъэныкъохэмкIэ Iоф ышIагъэми, мы сэнэхьатым ыгукIэ зэрэ­фэщагъэр къыгурыIуагъ ыкIи аужырэ илъэситфым ищытхъу аригъаIозэ Iоф ешIэ. Зэнэкъо­къум ишIэныгъэхэр зэрифэ­шъуашэу къыщигъэлъэгъуагъэх, зипсауныгъэкIэ илэгъухэм акIэмыхьэрэ кIэлэцIыкIухэм джэгукIэ шIыкIэм тетэу Iоф зэрадишIэрэр къаригъэлъэгъугъ. Зыныбжь имыкъухэрэм цыхьэ къыфашIыным, гумэкIыгъоу яIэ­хэр къызэрэраIощтым зэрэпы­лъыр, ахэм агу къыдищэен, щыIэныгъэм чIыпIэ гъэнэфагъэ щаубытыным зэрэфищэхэрэр Валентинэ къытиIуагъ.

ДЕЛЭКЪО Анет.