ИлъэскIэ узэкIэIэбэ­жьы­мэ, Донецкэ ыкIи Луганскэ Народнэ республикэ­хэм, Запорожскэ ыкIи Херсонскэ хэкухэм ащы­псэухэрэр Урысыем къы­хэхьажьынхэу унашъо ашIыгъ.

А хъугъэ-шIагъэм епхыгъэу УФ-м и Президент мэфэкIыкIэ ыгъэнэфагъ — 2023-рэ ­илъэсым Iоныгъом и 30-р шъо­лъырыкIэхэр Урысыем къы­зыщы­хэхьажьыгъэхэ Маф. А уахътэм къыкIоцI мыщ зэхъо­кIыныгъэу ащыхъугъэхэм ягугъу къэтшIын.

ХэушъхьафыкIыгъэ дзэ операциер зыщырагъэжьэгъэ апэрэ мафэхэм къащыублагъэу политическэ партиеу «Единэ Россием» шIушIэ Iофтхьабзэхэр зэрехьэх. УФ-м ихэбзэгъэуцугъэ шапхъэхэм шъолъырыкIэхэр атегъэхьэгъэнхэр партием ифра­циеу УФ-м и Къэралыгъо Думэ щыIэм зэшIуихын ылъэкIыгъ. Джы ащ ишIуагъэкIэ мыщ ащыпсэурэ цIыфхэм социальнэ ыкIи къэралыгъо IэпыIэгъур агъэфедэн амал яIэ хъугъэ. Ре­ферендумыр зэрэкIорэм пар­тием илIыкIохэр лъыплъагъэх.

— ШъолъырыкIэхэм ащы­псэухэрэм сыдигъуи Урысыем щыщхэу залъытэ. Ар къеушыхьаты фаехэу ыкIи фэхьазырхэу референдумым амакъэ зэрэщатыгъэр. Тарихъ шъыпкъэныгъэр зыпкъ рагъэуцожьыным ежа­гъэх, а Iофым хэлажьэх. псэо­лъэшIыныр псынкIэу щылъэкIуа­тэ, амалыкIэхэр етIупщыгъэу ащагъэпсых. ГущыIэм пае, «Еди­нэ Россием» игукъэкIыкIэ УФ-м цифрэмкIэ и Минис­терствэ ыгъэпсыгъэ порталэу «Сэ Урысыем сыщыI» зыф­и­Iорэр къэралыгъо фэIо-фашIэхэр арагъэгъотынхэмкIэ Iэрыфэгъу. Мы уахътэм цIыфхэм ящыIэныгъэ нахьышIум ылъэныкъокIэ зэ­хъокIы, амалыкIэхэр яI, — къы­хигъэщыгъ партиеу «Единэ Россием» и Гупчэ гъэцэкIэкIо комитет ипащэу Александр Сидякиным.

Ащ къызэриIуагъэмкIэ, партием зэпымыоу гъомылапхъэ­хэр, псэолъэшI пкъыгъохэр, Iэ­зэгъу уцхэр аIэкIегъахьэх, зищыкIагъэхэм IэпыIэгъу арагъэгъоты, кIэлэцIыкIухэм Iоф­тхьабзэхэр афызэхащэх.

— Мы уахътэм къыкIоцI шIу­шIэ IэпыIэгъу тонн мин 76-м ехъу афэтщагъ. Зэпымыоу ахэр зыщагощырэ чIыпIэхэм шъо­лъыриплIыми Iоф ащашIэ. Партиеу «Единэ Россиемрэ» фондэу «Ридовка помогает!» зыфи­Iо­рэмрэ зэгъусэхэу джыри чIыпIэ тедзэ Луганскэ Народнэ Рес­публикэм къыщызэIуахыгъ. Зэ­рэкъэралыгъоу къарыкIыгъэ гуфэкIо купхэм шIушIэ IэпыIэгъум дакIоу социальнэ псэуа­лъэ­хэр, псэупIэхэр зыпкъ ра­гъэу­цожьынхэмкIэ чIыпIэ хабзэм икъулыкъухэм адеIэх, шэмбэт шIыхьафхэр зэхащэх. Ахэм шъолъырыкIэхэм ащыпсэухэрэри ягъусэх, — къыкIигъэт­хъыгъ Александр Сидякиным.

ШъолъырыкIэхэр Урысыем къызэрэхэхьажьыгъэхэм тикъэ­ралыгъо шIуагъэ къызэрэфихьыщтыр ащ къыIуагъ. АпэрэмкIэ, ипромышленнэ кIуачIэ хэхьащт, игъомылэпхъэ щынэгъончъагъи нахь ухъумагъэ хъущт.

Партиеу «Единэ Россием» и Адыгэ шъолъыр къутамэ и Сек­ретарэу КъумпIыл Мурат къызэриIуагъэмкIэ, шъолъырыкIэхэр тикъэралыгъо исоциальнэ-экономическэ ыкIи иполитическэ системэ техьэх.

— IэнатIэ зыIыгъ пащэхэм яхэдзынхэр мы чIыпIэхэм ащыкIуагъэх. Ащ дакIоу, Урысыем ишъолъырхэм яшIуагъэкIэ социальнэ IэпыIэгъу афэхъугъэным иамалхэр ащызэрахьэх. Медицинэм, гъэсэныгъэм, культурэм, къэлэгъэпсыным, кIэлэцIыкIухэм языгъэпсэфыгъо уахътэ зэхэщэгъэным алъэныкъокIэ Адыгеим ынаIэ зытыригъэтырэ Херсон хэкум и Геническэ район щыпсэухэрэм IэпыIэгъу агъоты. «Единэ Россием» ыкIи республикэм щыпсэу­хэрэм яшIуагъэкIэ шIушIэ IэпыIэгъур тэугъои, джащ фэдэу хэушъхьафыкIыгъэ дзэ операцием хэлэжьахэрэм ыкIи ахэм яунагъохэм тынаIэ атетэгъэты. Урысыер гъогу тэрэз зэрэтетым тицыхьэ телъ, — къыIуагъ Къум­пIыл Мурат.