Адыгэ къамылым фэгъэхьыгъэщт
Чъэпыогъум и 12-м сыхьатыр 3-м Адыгэ Республикэм и Лъэпкъ музей къэгъэлъэгъон проектэу «Ащэмэз икъамыл» зыфиIорэр къыщызэIуахыщт.
АР-м культурэмкIэ и Министерствэ къызэрэщаIуагъэмкIэ, Iофтхьабзэр зыфэгъэхьыгъэр адыгэ къамыл кIыхьэр ары — ар зыфэдэм, зыхашIыкIырэм, чIыпIэу ыкIи мэхьанэу адыгэ обществэмрэ орэдкъегъэIон культурэмрэ ащиубытырэм.
Къамылапщэу Джамырзэ Ибрахьимэ я XX-рэ лIэшIэгъум иапэрэ кIэлъэныкъо макъэ къэзытырэ Iэмэ-псымэу ышIыгъагъэхэр экспозицием хэхьагъэх. Къамыл зэфэшъхьафыбэ къэгъэлъэгъоным хэтыщт, фондым ащ фэдэу чIэлъыр Iэмэ-псымэ 15.
— Непэрэ лъэхъаным ашIыгъэ къамылхэри музеим щалъэгъущтых, джащ фэдэу Урысыем икъэлэ зэфэшъхьафмэ къарыкIыгъэ къамылапщэхэри Iофтхьабзэм хэлэжьэщтых. АР-м культурэмкIэ изаслуженнэ IофышIэу, лъэпкъ орэдыIоу Нэгъой Заур илъэIукIэ лъэпкъ IэпэIасэу Вячеслав Мастафовым ышIыгъэ тыжьын къамыл закъори къэгъэлъэгъоным хагъэлэжьэщт. А къамылыр къэгъэлъэгъоным ехъулIэу пIэлъэ гъэнэфагъэкIэ музеим къыратыгъ, — къыщаIуагъ АР-м культурэмкIэ и Министерствэ.