«Будущее Адыгеи в Единстве!» зыфиIорэ проектым хахьэу «Дин зэфэшъхьафхэр зылэжьырэ студентхэм язэдэгущыIэгъу» зыфиIорэ Iэнэ хъурае Мыекъопэ къэ­ралыгъо технологическэ университетым щыкIуагъ.

Iофтхьабзэм кIэщакIо фэхъугъ УФ-м иобщест­веннэ движениеу «Урысыем иныбжьыкIэхэм лъэпкъ зэфыщытыкIэхэмкIэ ясоюз» зыфиIорэм и Адыгэ республикэ шъо­лъыр къутамэ. Iэнэ хъураем хэлэжьагъэх ДиндэлэжьапIэхэм, АР-м хэгъэгу кIоцI IофхэмкIэ и Министерствэ, обще­ственнэ организациехэм ялIыкIохэр, студентхэр.

Мыекъопэ къэралыгъо технологическэ университетым иректорэу Къуижъ Саидэ ыцIэкIэ Iофтхьа­бзэм къекIолIагъэхэм шIу­фэс къарихыгъ университетым ипроректорэу БрантI Мурат. Ащ къызэриIуагъэмкIэ, 2014-рэ илъэсым къыщыублагъэу университетымрэ Дин- дэлэжьапIэхэм япащэхэм­рэ зэзэгъыныгъэ зэдашIыгъэу Iоф зэдашIэ, студентхэм аIокIэх, зэдэгущыIэгъухэр адашIых. АщкIэ ахэм яшIогъэшхо Мые­къопэ къэралыгъо университетым къырагъэкIы.

Iофтхьабзэм псэлъэ кIэкIхэр къыщашIыгъэх тарихъ шIэныгъэхэмкIэ докторэу, доцентэу Саид Мусхаджиевым, философие шIэныгъэмкIэ док­торэу Шъаукъо Асфар, нэмыкIхэми.

Мыщ фэдэ Iофтхьабзэ­хэм мэхьанэшхо зэряIэр къэгущыIагъэ пэпчъ къыхигъэщыгъ. Дин зэфэ­шъхьафхэр зылэжьырэ студентхэм яIофыгъохэр гъэсэныгъэм, культурэм, диным язы Iахьэу зэрэщытыр къыраIотыкIыгъ. Мыщ фэдэ зэдэгущыIэ­гъумкIэ мурадэу яIэр дин зэфэшъхьафхэр зылэ­жьырэ купхэм азыфагу зэгурыIоныгъэ илъыныр, шъхьэкIафэ зэфашIыныр, джащ фэдэу диным ылъэ­ныкъокIэ зэгурымыIоныгъэу ыкIи хэукъоныгъэу къыхагъэщыхэрэр дэгъэзыжьыгъэнхэр ары.

Нэужым университетым истудентхэм докладхэр къашIыгъэх, шъхьадж ди­нэу ылэжьырэм елъытыгъэу игупшысэхэр, ишIоигъоныгъэхэр къыриIотыкIыгъэх. Ахэм къаIуагъ дин зэфэшъхьафхэр зы­лэжьырэ ныбжьыкIэхэм мыщ фэдэ зэдэгущыIэ­гъухэр нахьыбэрэ ада­шIынхэм пае клубхэр, фо­­румхэр зэхэщэгъэнхэ зэрэфаер.

— Дин зэфэшъхьафхэр зылэжьырэ студентхэр зэгурыIонхэр тинепэрэ гъэсэныгъэм ипкъэоу щыт. Ащ фэдэ екIолIакIэм культурэр къегъэбаи ыкIи мамырныгъэм къыфэджэ. Тэ, студентхэм, амал тиI мыщ фэдэ зэдэгущыIэ­гъухэм тахэлэжьэнэу. Арышъ, амалэу щыIэхэр къызфэдгъэфедэзэ, зэгурыIоныгъэрэ шъхьэкIафэрэ тазыфагу илъэу дунаир нахьышIу зэрэтшIыщтым тыпылъын фае, — къы­Iуагъ студенткэу Елизавета Лорчошвили.

Мыщ фэдэ зэдэгущыIэгъухэм яшIогъэшхо къызэрэкIощтым щэч хэлъэп, ар къэгущыIагъэхэм къыхагъэщыгъ.

КIАРЭ Фатим.