Узбекистан иапшъэрэ еджапIэхэм адэлажьэ
Урыс унэу Ташкент дэтым щызэIукIагъэх Россотрудничествэм илIыкIо IофшIапIэу Республикэу Узбекистан щыIэм ипащэу Ирина Старосельскэмрэ Адыгэ къэралыгъо университетым илIыкIоу Узбекистан щыIэ Мухамоджон Алиевымрэ.
АКъУ-мрэ апшъэрэ еджапIэу мы хэгъэгум итхэмрэ язэдэлэжьэныгъэ зегъэушъомбгъугъэным ыкIи университетым икъутамэ Узбекистан къыщызэIухыгъэным афэгъэхьыгъэ Iофыгъохэм зэIукIагъэхэр атегущыIагъэх. Дунэе къэгъэлъэгъонэу «Урысые гъэсэныгъэм ибэдзэр. Ташкент-2023-рэ» зыфиIорэ Iофтхьабзэм а зэIукIэгъур къыдыхэлъытэгъагъ.
2018-рэ илъэсым къыщыублагъэу Адыгэ къэралыгъо университетыр Узбекистан ит апшъэрэ еджапIэхэм адэлажьэ. Ащ фэдитфымэ зэзэгъыныгъэхэр адишIыгъэх, ахэр: Узбекскэ къэралыгъо университетэу дунаим тет бзэхэр зыщызэрагъашIэрэр, Самаркандскэ къэралыгъо университетыр, Денаускэ институтэу предпринимательствэмрэ педагогикэмрэ афэгъэзагъэр, Чирчикскэ къэралыгъо кIэлэегъэджэ университетыр ыкIи Термезскэ къэралыгъо университетыр.
Апэдэдэ АКъУ-м зэзэгъыныгъэ зыдишIыгъагъэр Узбекскэ къэралыгъо университетэу дунаим тет бзэхэр зыщызэрагъашIэрэр ары. Ащ къызэрэдыхэлъытагъэу, 2019-рэ илъэсым АКъУ-м зэхэт гъэсэныгъэ программэхэр лъэныкъуитIумэ афэгъэзагъэхэу щатIупщыгъэх: «Информатикэмрэ лъытэн техникэмрэ» ыкIи «КIэлэегъэджэ гъэсэныгъэр». 2022-рэ илъэсым къыщыублагъэу Денаускэ институтэу предпринимательствэмрэ педагогикэмрэ афэгъэзагъэм гъэсэныгъэ программэу академическэ зэхъожьыныр къыдэзылъытэрэр агъэцакIэ.
Джырэ уахътэм Адыгэ къэралыгъо университетым Узбекистан щыщ студент 250-рэ щеджэ. Ахэм япчъагъи хагъэхъонэу, Узбекистани яIофхэр щылъагъэкIотэнхэу АКъУ-м ипащэхэм рахъухьэ. ХьисапымкIэ Гъэмэфэ еджапIэу Адыгеим щыIэми Узбекистан икIэлэеджакIо- хэр къырагъэблагъэхэу хъугъэ.
АКъУ-м ипресс-къулыкъу.