НыбжьыкIэхэм я Урысые Союз и Адыгэ шъолъыр къутамэ яIэпыIэгъоу Адыгэ къэралыгъо университетым бэмышIэу гъэсэныгъэ Iофтхьабзэ щызэхащагъ. АКъУ-м ыкIи Мыекъопэ къэралыгъо технологическэ университетым ястудент 350-рэ ащ хэлэжьагъ.

Адыгэ къэралыгъо университетым истудент сообществэ ипрограммэ ар хэхьэ. Студентхэм яшIэныгъэхэм ахагъэхъоныр, творческэ ыкIи социальнэ лъэныкъохэм нахь фэщэгъэнхэр, апшъэ­рэ еджапIэхэм студент сообществэхэр ащызэхэщэгъэнхэр ары пшъэрылъ шъхьа­Iэу зэхэщакIохэм зыфагъэуцужьырэр.

«Приоритет – 2030» зыфиIорэм къы­дыхэлъытагъэу проектым текIоныгъэр къыдихыгъ ыкIи грант IэпыIэгъу къыфагъэшъошагъ.

Iофтхьабзэм хэлэжьэгъэ студентхэм лъэныкъо зэфэшъхьафхэмкIэ шIэныгъэ­хэр арагъэгъотыгъэх. Джащ фэдэу студент зыгъэIорышIэжьыным ыкIи ныбжьыкIэ политикэм яэкспертхэм ныбжьыкIэхэр аIукIагъэх, творческэ, спорт Iоф­тхьабзэхэр, мастер-классхэр, тренингхэр афызэхащагъэх. Купым хэтхэу Iоф зэрашIэн фаер къафаIотагъ.

Лъэныкъуи 6 къызэлъиубытэу гъэсэныгъэ программэр гъэпсыгъагъэ. Ащ хэлэжьэнхэу Воронеж, Ростов-на-Дону, Саратов ялIыкIохэр ыкIи Урысые ныбжьыкIэ союзым и Ассоциацие итренерхэр къырагъэблэгъагъэх, тематическэ Iоф­шIэнхэр, тренингхэр, мастер-классхэр ныбжьыкIэхэм афызэхащагъэх.

Программэм хэлэжьагъэхэу егъэджэнхэр зэрифэшъуашэу зыкIугъэхэм Iоф­тхьабзэм икIэух сертификатхэр аратыжьыгъэх.

Адыгэ къэралыгъо университетым ипресс-къулыкъу. Сурэтхэр: АКъУ