Адыгеим исурэтышI цIыкIухэр
Адыгэ Республикэм иеджэкIо чанхэм яеджэн готэу нэмыкI творческэ IэпэIэсэныгъэхэми ягуапэу зафагъасэ.
КIэлэцIыкIум идунэелъэгъукIэ иIэпэщысэхэм къыраIотыкIы. ЯкIас зыфэдэр къэIотэгъое щыIэныгъэшхор зэрагъэшIэныр. Сабыир зытегъэпсыхьагъэм удеIэзэ фапщэмэ, къыкIэкIощтыр макIэп. КIэлэцIыкIухэм алъэгъуи, зэхахи псынкIэу агу пытэу раубытэ. АшIоигъоу зэралъэкIэу сурэт ашIыми, шъэн-хъэныр якIасэми, дышъэидэр лъэшэу агу рехьыми, пхъэм, пластилиным, тхылъыпIэм пкъыгъо горэхэр ахашIыкIхэми, аIэкIэууIае хъущтэп творчествэр, гу лъамытахэу ар къадэхъу мэхъу. Аузэ, искусствэр лъэныкъо пчъагъэкIэ аIэ къырагъахьэ, ащкIэ амалышIух искусствэхэмкIэ республикэ кIэлэцIыкIу еджапIэу Мыекъуапэ дэтыр, Адыгеим ирайон пэпчъ ащызэхэщэгъэ искусствэхэмкIэ кIэлэцIыкIу еджапIэхэр. КIэлэегъэджэ хъупхъэхэр ахэм адэлажьэх. ИцIыкIугъом къыздиштэрэ шэным еджакIомкIэ мэхьанэшхо иI. СурэтшIыныр бэмэ якIас ыкIи лъагъо афэхъу. Ау кIэлэеджакIом мы Iофышхор изакъоу зэшIуихын ылъэкIыщтэп, джащ пае Iофым хэшIыкI фызиIэ кIэлэегъаджэр, сэнаущыгъэу сабыим хэлъыр кIигъэтхъэу, сыдигъуи IэпыIэгъу фэхъун фаери.
Адыгеим исурэтышI цIыкIухэр бэ мэхъух. Ахэм Адыгэ Республикэм идэхэгъэ-кIэрэкIагъи, Мыекъуапэ икъэбзэгъэ-зэкIужьи, тарихъ хъугъэ-шIагъэхэри, пшысэхэри, цIыфым илъэпIагъи, мамырныгъэм ыуаси ясурэтхэм къащагъэлъагъо, адыгэ культурэр икъоу ашIэ. Сабыйхэм творческэ лъапсэ адзынымкIэ мэхьанэшхо зиIэр хыегъэ-гуетыныгъэр арэу зэрэщытыр хигъэунэфыкIызэ академическэ IэпэIэсагъэр зыIэкIэлъыгъэ сурэтышI инэу Пабло Пикассо ытхыгъ: «Мне понадобится вся жизнь, чтобы научиться рисовать так, как рисует ребенок». Чъыг дэчъ цIыкIум фэдэу, сабый сэнаущыгъэм зызэрэрищырэр ащкIэ кIигъэтхъыгъ.
Адыгеим исурэтышI цIыкIухэм творчествэ гъэхъагъэхэр ашIынхэмкIэ анахьэу зишIуагъэ къакIохэрэр республикэ зэнэкъокъу- къэгъэлъэгъонэу зэфэшъхьафхэу ахэм афызэхащэхэрэр ары. Темэ зэфэшъхьафхэу мыхэр гощыгъэх: гущыIэм пае, сурэтшIнымкIэ ыкIи декоративнэ-прикладной искусствэмкIэ «Связь времен» («Уахътэхэм язэпхыныгъ»).
СурэтышI цIыкIухэм яреспубликэ зэнэкъокъоу «Память поколений» («ЛIэужхэм яшIэжь»).
КIэлэцIыкIу ыкIи Iэтахъохэм апае «Прикладных рук мастер» зыфиIорэр;
«Золотая нить Сатаней» («Сэтэнае идышъэ Iудан») —дышъэидэр ылъапс ыкIи зэнэкъокъоу «Рисую свою солнечную Адыгею» («Сурэт сэшIы си Адыгей тыгъэпс») афызэхащэх. КIэлэеджакIохэр ахэм ахэлажьэх, чIыпIэхэр къащыдахых. Мыщ фэдэ мэфэкI-зэнэкъокъухэм яшIуагъэкIэ ягулъытэ къэущы, ягупшысэ нахь къэнафэ. Адыгеим цIыф лъэпкъ зэфэшъхьафыбэ зэрэщызэдэпсэурэр, ахэм абзэ, яшэн-хабзэхэр, зекIокIэ-шIыкIэхэр мэхьанэ зиIэхэу зэрэщытхэр къагурыIоу, мы лъэныкъохэмкIэ сурэтхэр ашIых. Зэкъошныгъэм, зэгурыIоныгъэм мамыр щыIакIэр къызэрагъэгоIурэм, культурэ зэфэшъхьафхэр зэрэзэгурыIохэрэм уасэ аратэу Iоф ашIэ кIэлэцIыкIухэм. УичIыгу шIу плъэгъуныр, нахьыжъ-нахьыкIэ зэфыщытыкIэхэр лъэужыкIэм къагурыIо мэхъу, сурэтхэми сюжет шъхьаIэу апхыращыхэрэр мыхэр ары.
АфэтэIо Адыгеим икIэлэцIыкIу сэнаущхэм якIэсэ искусствэм лъэгъо дахэ щыпхыращынэу, искусствэм ыкIи творчествэм ядунэе гъэшIэ- гъон чIыпIэ дахэ щыряIэнэу.
МэфэкI къэгъэлъэгъон зэфэшъхьафхэм пэрытныгъэр къащыдэзыхыгъэм ясурэтшIыгъэхэм ащыщхэр: Лавриненко Анна ышIыгъэу «Адыгский меловой круг», Лучкина Елизавета
– «Цветущий май 1945» ыкIи дышъэидэкIэ БрантIэ Миланэ ышIыгъэ паннор а 1-рэ шъуашэр зиIэ дипломым илауреатых.
«Iэпшъэхъур ыкIи тхьакIумалъэхэр ыблагъэх Дыхъу Альбинэ, я III-рэ шъуашэр зиIэ дипломыр къыфагъэшъошагъ.
Мамырыкъо Нуриет.