Сэнэхьат гъэшIэгъонэу, къыткIэхъухьэрэ кIэлэцIыкIухэр, ныбжьыкIэхэр щыIэныгъэм фэ­зыпIоу, гъэсэныгъэ ахэм языгъэгъотырэр кIэлэегъаджэр ары. Мэфэпчъым джары кIэлэегъаджэм и Мафэ зыкIыщыхэгъэунэфыкIыгъэр. Тиреспублики, зэкIэ Урысыем фэдэу, мы мэфэкIыр хабзэ зэрэхъугъэу, чъэпыогъум иапэрэ тхьаумафэ щагъэмэфэкIы.

Адыгэ Республикэм и Лъэпкъ тхылъеджапIэ кIэлэегъаджэм и Мафэ фэгъэхьыгъэ мэфэкI зэIукIэгъу щызэхащэгъагъ. Ащ хэлэжьагъэх къэлэ еджапIэхэм яеджакIохэм ыкIи якIэлэегъаджэм ащыщхэр, культурэм иIофышIэхэр, журналистхэр. МэфэкI къэгъэлъэгъон инэу «Призвание – учитель» зыфиIорэр мы цIэ иным къешIэкIыгъэ егъэджэн-гъэсэныгъэ Iофыгъохэр тикъэралыгъо зэрэщыпхыращыгъэхэм ыкIи ыпэкIэ зэрэщылъагъэкIуатэхэрэм, педагог инхэу егъэджэн Iофыр зэшIозыхэу зылэжьыгъэхэр, мы наукэм лъапсэ фэзышIыгъэхэу, гупшысэ инхэр щызгъэунэфыгъэхэр къизыIотыкIырэ литературэмкIэ къэгъэлъэгъоныр зэлъыпкIагъ. К. Д. Ушинскэм, А. С. Макаренкэм, нэмыкI гъэсагъэхэм ятхылъ гъэшIэгъонхэр, егъэджэкIэ-шIыкIэ амал зэфэшъхьафхэмкIэ учебник-IэпыIэгъухэр, художественнэ произведение зэфэшъхьафхэу Урысыем итхакIохэм ыкIи нэмыкI цIыф лъэпкъхэм къахэкIыгъэ усакIохэм, прозаикхэм ятхылъхэм мыщ чIыпIэ щагъотыгъ.

Тхылъыр – шIэныгъэ къэкIопIэ ин. Ау зыхъукIэ, сыд фэдэрэ IофыкIэ ещэжьагъи, тхылъ хэмытэу зэшIопхын плъэкIыщтэп. Апэрэу еджэпIэ пчъэшъхьаIум ебэкъогъэ кIэлэцIыкIухэу илъэси 7 зыныбжьхэр шIэныгъэ гъогу зэныбжь дахэм тезыщэныр зыфызэшIокIырэр апэрэ кIэлэегъаджэр ары. КIэлэегъадж! Ар гущыIэ къодыеп, ар кIэлэцIыкIур апэрэу дунаишхоу къещэкIыгъэм зэфэдэу хэзыщэу, хэзгъаплъэрэ. Егъэджэн-гъэсэныгъэр, пIуныгъэр зэгопчынхэу щытхэп, зы пшъэрылъ иным къыдыхэлъытагъэу а зэкIэ кIэлэегъаджэм егъэцакIэ. КIэлэцIыкIум идунэе хэушъхьафыкIыгъэ фэкъулайхэу ахэм зырагъэушъомбгъу: еджэным егугъоу, Iэдэб хэлъэу, зимыбэлэрэгъэу зэреджэн фаер гурагъаIо.

МэфэкI зэIукIэгъум хэлэжьэгъэ кIэлэеджакIохэр агу къадеIэу усэхэм къя­джагъэх, якIэлэегъаджэхэм орэдхэри къафаIуагъэх.

ТхылъеджапIэм иеджэпIэ унэ иIофышIэу Бадые Людмилэрэ абонементым ибиблиотекарь хъупхъэу Шъхьащэкъо Мирэрэ ягукъэкIкIэ мы Iофтхьабзэр зэхащагъ.

Ахэм ашIоигъуагъ, кIэлэегъаджэу мыпшъыжьэу мафэ къэс лIэужыкIэм ипIун-гъэсэн дэлажьэрэм ыцIэ къыраIонэу, ищытхъу кIагъэтхъынэу ыкIи а гупшысэр пхырыщыгъэу мэфэкIыр кIуа­гъэ. КIэлэегъэджэ цIэ лъапIэр зиIэ нэбгырэ пэпчъ, исэнэхьат ялые мэхьанэ фишIэу ышъхьэкIэ егугъоу, еджакIохэр зылъищэнхэр, ыгъэдэIонхэр, еджэным кIигъэгушIунхэр фызэшIокIэу, иIоф ыгъэ­разэу, псауныгъэ иIэу ыпэкIэ лъыкIотэнэу фаIуагъ.

Дзэукъожь Нуриет.

Сурэтхэр: А. Iэшъын.