Джащ тетэу сеплъы Шэуджэн Асхьад итхылъэу «Адыгэхэр» зыфиIорэм.

А тхылъым лъэтегъэуцо фашIыгъэу «Адыгэ макъэм» итэу зысэлъэгъум, ащ седжэнэу сыфаеу сыхъугъ, лъэпкъым фэгъэхьыгъэ тхыгъэхэр сикIасэх, зэкIэ сшIэмэ сшIоигъу. А сишIоигъоныгъэ Асхьад зызэхехым, тхылъитIури къысфаригъэхьыгъ гущыIэ дахэхэр тетхагъэ­хэу. Гопэшхо сщыхъугъ. Зы мафи тесымыгъашIэу езгъажьи седжагъ ыкIи теубытагъэ хэлъэу къэсIон слъэкIыщт: ащ фэдэ тхылъ ытхыгъэу адыгэхэм къахэкIыгъэп.

Тхылъыр къызэрэзэгопхэу Сталиным адыгэмэ афэгъэхьыгъэу къыIуагъэр нэм къыкIедзэ: «Адыгэхэр хэмытэу Кавказыр Кавказэп». Ащ къеушыхьаты адыгэхэр лъэпкъышхохэу, лъэпсэшIуи щыряIэу Кавказым зэрисыгъэхэр. ЯкъежьапIэ къыщыублагъэу джырэ лъэхъаным щыкIэкIыжьэу, шъхьэрышъхьэу зэтеутыгъэу, гурыIогъошIоу тхыгъэ.

Асхьад лъэпкъым фишIагъэм пае фагъэшъошэнэу аIуагъэхэм анэмыкIэу ежь зыдэс Адыгэкъалэ ифэшъуашэм тетэу IофшIагъэм уасэ щыфэшIыгъэн фаеу, ащ ипчэгу стенд горэ щыфагъэуцуныр игъоу сэлъытэ мыщ фэдэ гущыIэхэр кIэтхагъэхэу: «Лъэпкъым ип­къэу, икIэсэн, игъундж, исаугъэт». Сэ симызакъоу, тхылъым еджагъэхэми, Iэшъхьэтетхэми къыздырагъэштэнэу сыщэгугъы.

Къэбэртэе-Бэлъкъарым икъэлэ шъхьа­Iэ къикIыгъэхэу хьакIэхэр къызытфа­кIохэм, тхылъыр ядгъэлъэгъугъ, гуапэ ащыхъоу нэ­Iуасэ зыфашIыгъ. Тхылъыр агъоты­мэ ашIоигъоу къа­Iуагъ. Педучилищым къыщызде­джагъэхэм, сиIоф­шIэгъугъэхэм ащыщхэр тхылъ­еджапIэхэм ачIэ­хьагъэх, ау агъотыгъэп. АщкIэ къас­Iомэ сшIои­гъор тхылъеджапIэхэм ар алъагъэ­Iэсымэ цIыфмэ зэ­рягопэщтыр, зэреджэщтхэр ары.

Сэ сышIэныгъэлэжьэп, сыкIэлэегъэджэ къызэрыкIу. Ау кIэлэегъаджэр арыба тхакIомэ атхыгъэхэр кIэлэцIыкIухэм къафэзыIуатэхэрэр, аIузылъхьэхэрэр?! Сэ Iоф сшIэжьырэп, ау еджакIохэм, цIыф жъугъэхэм зэIукIэгъухэр адысиIэхэу мэхъушъ, тхылъыр лъэпкъым зэрэфэлэжьагъэр агурызгъэIоныр сипшъэры­лъэу сэлъытэ.

Къощэгъу (Мамый) Нуриет. Пэнэжьыкъуай.